ນັກທ່ອງທ່ຽວຊາວອອສເຕຣເລຍ ສອງຄົນຖືກສົ່ງໄປຮັກສາທີ່ໂຮງໝໍໃນປະເທດ ໄທ ຫລັງຈາກລົ້ມປ່ວຍເພາະຄາດວ່າ ດື່ມເຫຼົ້າເຖື່ອນໃນລາວ ຕາມລາຍງານ ຂອງສື່ມວນຊົນໃນອອສເຕຣເບຍ ເມື່ອວັນອັງຄານວານນີ້ ອີງຕາມອົງການ ຂ່າວເອພີ.
ໜັງສືພິມ The Age ໃນນະຄອນເມລເບິນ ລາຍງານວ່າ ຜູ້ຍິງໄວໜຸ່ມອາຍຸ 19 ປີ ສອງຄົນເຊິ່ງເປັນນັກທ່ອງທ່ຽວແບກແພັກ (backpacker) ຊາວ ອອສເຕຣເລຍ ຖືກສົ່ງໄປປິ່ນປົວທີ່ໂຮງໝໍໃນຈັງຫວັດອຸດອນທານີ ແລະ ບາງກອກ ຫລັງຈາກລົ້ມປ່ວຍທີ່ບ້ານພັກ Nana Backpacker Hostel ໃນເມືອງວັງວຽງ ປະເທດລາວ ເຊິ່ງພວກເຂົາໄດ້ເຂົ້າໄປພັກກ່ອນໜ້ານີ້.
ທ່ານ ເດືອງ ດຶກ ໂຕນ ຜູ້ຈັດການຂອງ Nana Backpacker Hostel ກ່າວກັບອົງການຂ່າວເອພີ ວ່າ ແຂກຄົນອື່ນໆມາບອກວ່າ ໄວໜຸ່ມສອງຄົນ ດັ່ງກ່າວ ມີອາການປ່ວຍ ແລະບໍ່ໄດ້ເຊັກອອກຈາກບ້ານພັກຕາມກຳນົດ ຄືວັນທີ 13 ພະຈິກ ທາງໂຮສເທລ ຈຶ່ງໄດ້ຈັດລົດໄປສົ່ງພວກເຂົາທີ່ໂຮງໝໍ ຈາກນັ້ນຖືກ ສົ່ງໄປຮັກສາຕໍ່ທີ່ປະເທດໄທ.
ເຂົາເຈົ້າກ່າວວ່າ ເມື່ອສອງວັນກ່ອນໜ້ານັ້ນ ຜູ້ຍິງສອງຄົນນີ້ ແລະແຂກອີກກວ່າ 100 ຄົນ ເຂົ້າຮ່ວມງານປາຕີ້ທີ່ທາງໂຮສເທລ ຈັດຂຶ້ນ ແລະໄດ້ດື່ມເຫຼົ້າຂາວທີ່ ຜະລິດເອງຢູ່ໃນລາວ ຈາກນັ້ນສອງສາວໄດ້ຫາຍໄປທັງຄືນ ແລະກັບມາອີກຄັ້ງ ນຶ່ງໃນຕອນເຊົ້າມື້ຕໍ່ມາ.
ທ່ານ ເດືອງ ດຶກ ໂຕນ ບອກດ້ວຍວ່າ ແຂກຄົນອື່ນທີ່ດື່ມເຫຼົ້າຂາວນັ້ນ ບໍ່ມີໃຜ ເປັນຫຍັງ ນອກຈາກຍິງສາວຊາວອອສເຕຣເລຍສອງຄົນນີ້ ແຕ່ທາງເອພີ ຍັງບໍ່ ສາມາດຢືນຢັນຄຳກ່າວອ້າງນີ້ໄດ້.
ທາງດ້ານກະຊວງການຕ່າງປະເທດແລະການຄ້າຂອງອອສເຕຣເລຍ ລະບຸວ່າ ໄດ້ໃຫ້ການຊ່ອຍເຫຼືອດ້ານກົງສຸນແກ່ຍິງສາວທັງສອງຄົນ ແລະຄອບຄົວຂອງ ພວກເຂົາທີ່ໄດ້ເດີນທາງມາປະເທດໄທແລ້ວ ແຕ່ບໍ່ສາມາດໃຫ້ຂໍມູນໃດໆຕື່ມ ເນື່ອງຈາກເຫດຜົນດ້ານຄວາມເປັນສ່ວນຕົວ ຕາມລາຍງານຂອງເອພີ.
ຍັງບໍ່ມີຄວາມຈະແຈ້ງວ່າ ເຫຼົ້າຂາວທີ່ຜະລິດໃນລາວ ເປັນສາເຫດຂອງອາການ ປ່ວຍນີ້ຫຼືບໍ່ ແຕ່ທີ່ຜ່ານມາມີລາຍງານການໃຊ້ ເມທານອລ ໃນການປະສົມເຫຼົ້າ ໃນບາງກໍລະນີຕາມບາຣ໌ຕ່າງໆ ແລະອາດເຮັດໃຫ້ເກີດອາການປ່ວຍໜັກ ຫຼືເສຍຊີວິດກໍເປັນໄດ້.
ນາງ ແຈັສມິນ ອັນໂຕນິອຸສ ນັກທ່ອງທ່ຽວຈາກເນເທີແລນ ບອກກັບເອພີວ່າ ລາວພະຍາຍາມລະມັດລະວັງການດື່ມເຫຼົ້າຫຼື ອາລກໍຮອລຫຼາຍຂຶ້ນ ຫຼັງຈາກຂ່າວນີ້ເຜີຍແຜ່ອອກໄປ ແລະຫວັງວ່າ ນັກທ່ອງທ່ຽວຄົນອື່ນໆ ຈະລະວັງຫຼາຍຂຶ້ນເຊັ່ນກັນ.
ດ້ານຜູ້ຈັດການຂອງບ້ານພັກ Nana Backpacker Hostel ບອກວ່າ ລາວຫວັງວ່າ ການສືບສວນຈະສາມາດສ້າງຄວາມກະຈ່າງແຈ້ງ ແລະລົບ ຂໍ້ກ່າວຫາທີ່ມີຕໍ່ທາງໂຮສເທລ ໄດ້ ແຕ່ຕອນນີ້ ສິ່ງທີ່ລາວເຮັດໄດ້ຄືຢຸດການ ແຈກເຫຼົ້າຟຣີ ໃຫ້ແກ່ຜູ້ທີ່ມາພັກເຊົາທີ່ໂຮສເທລເປັນການຊົ່ວຄາວ.
ເມືອງວັງ ເຊິ່ງຢູ່ຫ່າງຈາກນະຄອນຫຼວງວຽງຈັນ ປະມານ 160 ກິໂລແມັດ ຖືເປັນສະຖານທີ່ທ່ອງທ່ຽວຍອດນິຍົມໃນກຸ່ມພວກແບກແພັກເກີທັງຫຼາຍ ທີ່ມັກການຜະຈົນໄພແລະປາຕີ້.
