ນັກຂ່າວຊາວຈີນ-ອອສເຕຣເລຍທີ່ຖືກຕັດສິນໂທດວ່າມີຄວາມຜິດ ໃນຂໍ້ກ່າວຫາສອດແນມທີ່ບໍ່ຈະແຈ້ງ ແລະຖືກກັກຂັງຢູ່ໃນຈີນເປັນເວລາ 3 ປີ ໄດ້ກັບຄືນໄປອອສເຕຣເລຍແລ້ວ, ນາຍົກລັດຖະມົນຕີ ແອນໂທນີ ອາລບານີສ (Anthony Albanese) ກ່າວໃນວັນພຸດນີ້, ອີງຕາມອົງການຂ່າວເອພີ.
ນາງເຊັງ ເລີຍ (Cheng Lei), ອາຍຸ 48 ປີ, ເຮັດວຽກໃຫ້ຫ້ອງການລະຫວ່າງປະເທດ ຂອງສະຖານີໂທລະພາບ CCTV ຂອງທາງການຈີນ. ນາງໄດ້ກັບມາຮວມໂຕກັບລູກສອງຄົນຂອງນາງ ອີກຄັ້ງ ໃນນະຄອນເມລເບິນ, ທ່ານ ອາລບານີສ ໄດ້ກ່າວ.
ການກັບຄືນມາຂອງນາງແມ່ນມີຂຶ້ນກ່ອນການໄປຢ້ຽມຢາມປັກກິ່ງຂອງ ທ່ານອານບານິສ (Albanese) ໃນປີນີ້ ທີ່ຍັງບໍ່ທັນໄດ້ມີການປະກາດວັນເວລາ ຢ່າງເປັນທີ່ຈະແຈ້ງເທື່ອ.
ລັດຖະບານຂອງທ່ານອາລບານີສ ໄດ້ພະຍາຍາມວິ້ງເຕັ້ນ ໃຫ້ປ່ອຍຕົວນາງເຊັງ ແລະຊາວຈີນ-ອອສເຕຣເລຍ ອີກຄົນນຶ່ງທີ່ຖືກກັກຂັງຢູ່ໃນຈີນ ນັບແຕ່ປີ 2019, ເຊິ່ງກໍ່ຄືທ່ານຢາງ ເຮັງຈຸນ (Yang Hengjun).
ສາຍພົວພັນລະຫວ່າງສອງປະເທດໄດ້ຮັບການປັບປຸງນັບໃຫ້ດີຂຶ້ນ ນັບຕັ້ງແຕ່ພັກແຮງງານອຽງຊ້າຍ ຂອງທ່ານອາລບານີສ ໄດ້ຮັບການເລືອກຕັ້ງຫຼັງຈາກປົກຄອງແບບອະນຸລັກນິຍົມ ມາເປັນເວລາ 9 ປີ. ປັກກິ່ງໄດ້ຍົກເລີກສິ່ງກີດຂວາງທາງດ້ານການຄ້າຢ່າງເປັນທາງການ ແລະບໍ່ເປັນທາງການຫຼາຍຢ່າງ ກ່ຽວກັບການສົ່ງອອກຂອງອອສເຕຣເລຍ.
