ນັກທຸລະກິດອອສເຕຣເລຍ ຖືກຈັບຢູ່ສະຫະລັດ

ຕໍາຫຼວດ​ໃນ​ອອສ​ເຕຣ​ເລຍ ກ່າວ​ວ່າ ນັກທຸລະກິດ​ຊາວອອສ​ເຕຣ​ເລຍ​ຄົນນຶ່ງໄດ້ຖື​ກຈັບຢູ່
ສະ ຫະລັດ ທີ່ພົວພັນ​ກັບຄະດີ​ການໂຈມຕີ​ດ້ວຍການແຂວນລະ​ເບີດ​ປອມໃສ່​ຄໍເດັກສາວ
ຢູ່ນະຄອນຊິດນີນັ້ນ.

ຕໍາຫຼວດໃນ​ລັດ New South Wales ກ່າວໃນ​ວັນ​ອັງຄານ​ມື້​ນີ້​ວ່າ ຊາຍໄວ 50 ປີຄົນນີ້
ໄດ້ຖືກ​ຈັບ​ໃນ​ວັນ​ຈັນ​ວານ​ນີ້ ​ທີ່ເມືອງ Louisville, ລັດ Kentucky ຊຶ່ງເປັນ​ການ​ປະຕິບັດ
ງານທີ່ພົວພັນທັງຕໍາຫຼວດ​ອອສ​ເຕຣ​ເລຍ​ແລະ​ອົງການ​ສັນຕິບານ FBI ຂອງສະຫະລັດ.

ພວກ​ເຈົ້າ​ໜ້າ​ທີ່​ຍັງ​ບໍ່​ທັນ​ແຈ້ງ​ໃຫ້​ຊາບ​ ເຖິງ​ຊື່​ຂອງ​ຜູ້ກ່ຽວ ​ແຕ່ວ່າ ໜັງສືພິມ Sydney
Morning Herald ໄດ້​ລາຍງານໃນ​ວັນ​ພຸດ​ແລ້​ວນີ້ວ່າ ຜູ້​ຊາຍ​ຄົນ​ນີ້ຊື່ວ່າ ນາຍ Paul
"Dough" Peters.

ເດັກ​ສາວ Madeleine Pulver ​ໄວ 18 ​ປີ ​ໄດ້​ຖືກ​ຈູ່​ໂຈມ​ທີ່ເຮືອນ​ຂອງ​ລາວ​ໃນເຂດ​ຊານ
ເມືອງຂອງນະຄອນ Sydney ​ໃນ​ຕົ້ນ​ເດືອນນີ້ ໂດຍ​ມີຜູ້​ຊາຍ​ປິດ​ໜ້າ ຜູກສິ່ງ​ຂອງ​ຊະນິດ​
ນຶ່ງທີ່​ຄ້າຍຄື​ກັນ​ກັບ​ລະ​ເບີດ​ນັ້ນ ແຂວນໃສ່ຄໍຂອງນາງໄວ້​.

ຕໍາຫຼວດ​ເວົ້າ​ວ່າ​ຜູ້​ຊາຍ​ຄົນ​ນີ້​ໄດ້​ຂຽນ​ຂໍ້ຄວາມ​ຖີ້ມ​ໄວ້​ກ່ອນ​ຈາກ​ໄປ ​ແຕ່​ກໍ​ບໍ່​ໄດ້​ແຈ້ງໃຫ້ຊາບວ່າ​
ມີ​ໃຈຄວາມແນວໃດ.

ລະ​ເບີດ​ປອມ​ໄດ້ແຂວນຢູ່ຄໍ​ຂອງ​ເດັກສາວ ​Pulver ເປັນ​ເວລາ​ 10 ຊົ່ວ​ໂມງ​ກ່ອນທີ່​ພວກ​ກູ້​
ລະເບີດຈະ​ມາຊ່ອຍ​ເຫຼືອ​ແລະ​ປົດ​ລະ​ເບີດ​ອອກ​ໄດ້ນັ້ນ. ເດັກສາວຄົນນີ້​ບໍ່ໄດ້​ຮັບ​ບາດ​ເຈັບ​ແຕ່​
ຢ່າງ​ໃດ ​ແລະ​ຕໍ່​ມາ​ກໍ​ຄົ້ນພົບ​ວ່າສິ່ງຂອງທີ່ນໍາມາແຂວນໃສ່​ຄໍ​ນາງ​ນັ້ນບໍ່​ມີ​ລະ​ເບີດ​ແຕ່​ຢ່າງ​ໃດ.

ຕໍາຫຼວດກ່າວ​ວ່າ ພວກ​ເຂົາ​ເຈົ້າ​ຈະ​ຂໍ​ໃຫ້​ສະຫະລັດສົ່ງ​ຕົວ​ນາຍ Paul ກັບໄປຍັງອອສ​ເຕຣ
ເລຍ ​ເພື່ອ​ປະເຊີນກັບການດຳເນີນຄະດີທີ່ລາວໄດ້ກໍ່ຂຶ້ນນັ້ນ.