ຕຳຫລວດອອສເຕຣເລຍ ໄດ້ຍິງ ແລະສັງຫານ “ຜູ້ສົງໄສວ່າ
ເປັນຜູ້ກໍ່ການຮ້າຍ” ຫຼັງຈາກທີ່ຜູ້ກ່ຽວໄດ້ແທງ ຕຳຫລວດ 2 ຄົນ
ຢູ່ນອກສະຖານີຕຳຫລວດ ໃນນະຄອນ Melbourne.
ຜູ້ກ່ຽວ ຊຶ່ງເປັນໜຸ່ມໄວ 18 ປີ ໄດ້ໂຈມຕີຕຳຫລວດສອງຄົນນັ້ນ
ດ້ວຍມີດ ໃນແລງວັນອັງຄານວານນີ້ ໃນຂະນະທີ່ ຖືກສອບປາກຄຳ
ກ່ຽວກັບພຶດຕິກຳ ທີ່ເຈົ້າໜ້າທີ່ເຫັນວ່າ ພາໃຫ້ມີຄວາມກັງວົນໃຈ.
ເຈົ້າໜ້າທີ່ກ່າວວ່າ ຕຳຫລວດຄົນນຶ່ງ ໄດ້ຍິງຕອບໂຕ້ເພື່ອປ້ອງກັນ
ຕົວ ເຮັດໃຫ້ຊາຍໜຸ່ມດັ່ງກ່າວເສຍຊີວິດ. ຕຳຫລວດ 2 ຄົນທີ່ຖືກ
ທຳຮ້າຍນັ້ນ ແມ່ນມີອາການທຸ່ນທ່ຽງແລ້ວ ໃນເວລານີ້.
ເຫດການດັ່ງກ່າວມີຂຶ້ນ ໃນຂະນະທີ່ອອສເຕຣເລຍກຳລັງຢູ່ໃນສະພາບ ລະວັງໂຕສູງ ຕໍ່
ການໂຈມຕີທີ່ອາດມີຂຶ້ນ ໂດຍພວກທີ່ຖືກກຸ່ມຫົວຮຸນແຮງຈັດລັດອິສລາມ ດົນບັນດານໃຈນັ້ນ.
ບໍ່ເປັນທີ່ຈະແຈ້ງວ່າ ຜູ້ກ່ຽວໄດ້ທຳການໂຈມຕີຕາມລຳພັງຜູ້ດຽວ ຫຼືມີການພົວພັນກັບກຸ່ມ
ດັ່ງກ່າວ ທີ່ໃນອາທິດນີ້ ໄດ້ຂົ່ມຂູ່ຈະຂ້າພົນລະເມືອງຊາວອອສເຕຣເລຍ.
ທ່ານ Andrew Colvin ຮັກສາການຊົ່ວຄາວ ຕາງໜ້າຜູ້ບັນຊາການຕຳຫລວດແຫ່ງຊາດ
ອອສເຕຣເລຍ ກ່າວວ່າ ເຈົ້າໜ້າທີ່ໄດ້ຕິດຕາມເບິ່ງກິດຈະກຳຕ່າງໆ ຂອງຜູ້ຕ້ອງສົງໄສ
ຄົນນັ້ນ ມາກ່ອນແລ້ວ.
ສື່ຂ່າວທ້ອງຖິ່ນ ໄດ້ລາຍງານວ່າ ໄດ້ມີຄົນເຫັນໄວລຸ້ນຄົນນັ້ນ ຖືທຸງຂອງກຸ່ມລັດອິສລາມ ເມື່ອ ບໍ່ດົນມານີ້. ເຈົ້າໜ້າທີ່ກ່າວວ່າ ເຂົາເຈົ້າ ກຳລັງກວດສອບເບິ່ງລາຍງານເຫຼົ່ານັ້ນ.
ໃນອາທິດນີ້ ກຸ່ມຫົວຮຸນແຮງຈັດ ລັດອິສລາມ ໄດ້ຊຸກຍູ້ໃຫ້ສັງຫານບັນດາພົນລະເມືອງ
ຂອງ ອອສເຕຣເລຍ ການາດາ ຝຣັ່ງ ແລະປະເທດອື່ນໆ ທີ່ຮ່ວມຢູ່ໃນແນວໂຮມໂລກ
ຕໍ່ຕ້ານພວກນັກຕໍ່ສູ້ເພື່ອສາສະ ໜາອິສລາມ ຫຼື jihadists ນັ້ນ.
