ອອສເຕຣເລຍໃຊ້ຈ່າຍເງິນປະມານ 5 ພັນລ້ານໂດລາ ສໍາລັບການຊ່ວຍເຫລືອຕ່າງປະເທດ ໃນແຕ່ລະປີ. ຕົວເລກດັ່ງກ່າວຄາດວ່າຈະເພີ່ມຂຶ້ນເປັນ 8 ພັນ ລ້ານໂດລາພາຍໃນປີ 2016 ຊຶ່ງເທົ່າກັບເຄິ່ງເປີເຊັນຂອງ ລາຍໄດ້ຂອງຊາດ.
ໃນການກ່າວປ້ອງກັນການເພີ່ມງົບປະມານການຊ່ວຍເຫລືອຕ່າງປະເທດຂຶ້ນນັ້ນ ລັດຖະມົນຕີການຕ່າງປະເທດ ເຄວິນ ຣັດ(Kevin Rudd) ກ່າວວ່າ ມັນບໍ່ແມ່ນທໍາມະຊາດຂອງອອສ ເຕຣເລຍ ທີ່ຈະບໍ່ເດືອດບໍ່ຮ້ອນຫລືບໍ່ເອົາຫົວຊາຕໍ່ ຄວາມລໍາບາກຍາກແຄ້ນຂອງຄົນອື່ນໆ.
ແຕ່ແນວໃດກໍດີ ໄດ້ມີການກ່າວຫາວ່າ ມີການສໍ້ໂກງຢ່າງແຜ່ຫລາຍຢູ່ໃນລະບົບການຊ່ວຍ ເຫລືອຕ່າງປະເທດນັ້ນ ເຖິງແມ່ນໂຕເລກຄິດໄລ່ຂອງລັດຖະບານຈະຊີ້ບອກວ່າ ເງິນທຸກໆ 1,000 ໂດລາທີ່ໃຊ້ຈ່າຍເພື່ອການຊ່ວຍເຫລືອນັ້ນ ມີພຽງ 21 ເຊັນເທົ່ານັ້ນທີ່ຖືກຍັກຍອກ.
ລັດຖະມົນຕີຕ່າງປະເທດ ເຄວິນ ຣັດ ກ່າວ
ວ່າຈະມີການດໍາເນີນຄວາມພະຍາຍາມໃໝ່
ເພື່ອປັບປຸງຄວາມໂປ່ງໃສໃນງົບປະມານ
ແລະການບໍລິຫານທຸກໆໂຄງການຊ່ວຍ
ເຫລືອ ພ້ອມທັງມີການກວດສອບ ໂດຍ ຄະນະກໍາມະການອິດສະຫລະນັ້ນນໍາ.
ທ່ານ Rudd ກ່າວຕໍ່ໄປວ່າ ການປ່ຽນແປງ ຄັ້ງໃຫຍ່ທີ່ສຸດນັ້ນ ກໍຄືຈະຍຸຕິການຊ່ວຍ ເຫລືອດ້ານການເງິນໂດຍກົງ ແກ່ຈີນ ແລະ ອິນເດຍ. ທ່ານຣັດກ່າວວ່າ
“ປະເທດເຫລົ່ານີ້ ຕາມລໍາພັງເຂົາເຈົ້າເອງ
ກໍແມ່ນເປັນເສດຖະກິດທີ່ໃຫຍ່ແລະສໍາຄັນ
ຢູ່ແລ້ວ ຊຶ່ງປະເທດນຶ່ງມີເສດຖະກິດທີ່ໃຫຍ່
ອັນດັບສອງໃນໂລກ ສ່ວນອີກປະເທດນຶ່ງ ກໍເປັນປະເທດທີ່ມີເສດຖະກິດໃຫຍ່ອັນດັບຫົກ
ໃນໂລກ. ຖ້າຫາກພວກເຮົາສືບຕໍ່ສະໜັບສະໜຸນໂຄງການຕ່າງໆຢູ່ພາຍໃນປະເທດເຫລົ່າ
ນີ້ແລ້ວ ພວກເຮົາກໍແມ່ນຈະອາໃສກາງຕໍ່ກົນໄກແບບມີຫລາຍຝ່າຍເປັນຫລັກ.”
ຕໍ່ໄປນີ້ ອອສເຕຣເລຍຈະສຸມເງິນໃຊ້ຈ່າຍປະມານ 75 ເປີເຊັນຂອງງົບປະມານການຊ່ວຍ
ເຫລືອຕ່າງປະເທດຂອງຕົນທັງໝົດ ໃສ່ໂຄງການຕ່າງໆໃນຂົງເຂດເອເຊຍຕາເວັນອອກ
ສຽງໃຕ້ ແລະໝູ່ເກາະໃນເຂດມະຫາສະມຸດປາຊີຟິກ.
ກຸ່ມປະເທດທີ່ເອີ້ນກັນວ່າ ພວກປະເທດເພື່ອນບ້ານທີ່ອ່ອນແອແຕກຫັກໄດ້ງ່າຍຂອງອອສ ເຕຣເລຍ ຊຶ່ງໄດ້ແກ່ ຕີມໍແລສເຕ ຫລືຕີມໍຕາເວັນອອກ ອິນໂດເນເຊຍ ເກາະໂຊໂລມອນ ແລະ ປາປົວ ນີວກິນີ ນັ້ນ ແມ່ນຍັງຈະນອນຢູ່ໃນຈຸດໃຈກາງຂອງການດໍາເນີນຄວາມພະຍາ ຍາມຢູ່ໃນຕ່າງປະເທດຂອງແຄນເບີຣາ ເພື່ອຊຸກຍູ້ສົ່ງເສີມຄວາມສະເໝີພາບລະຫວ່າງເພດ ພ້ອມທັງການຊ່ວຍເຫລືອດ້ານມະນຸດສະທໍາແລະການຊ່ວຍເຫລືອສຸກເສີນຕ່າງໆ.
ປະມານ 11 ເປີເຊັນຂອງງົບປະມານການຊ່ວຍເຫລືອ ຈະສະໜອງທຶນໃຫ້ແກ່ໂຄງການ
ຊ່ວຍເຫລືອຕ່າງໆ ໃນຂົງເຂດອາຟຣິກາແລະຕາເວັນອອກກາງ.
ນອກນັ້ນ ລັດຖະມົນຕີຕ່າງປະເທດ Rudd ຍັງຕ້ອງການຢາກໃຫ້ວົງການການກຸສົນ ແລະ ພວກອົງການບັນເທົາຕ່າງໆທີ່ບໍ່ຂຶ້ນກັບລັດຖະບານນັ້ນ ເຂົ້າມາມີບົດບາດໃຫຍ່ກວ່າເກົ່າ ໃນ ການລົດຜ່ອນຄວາມທຸກຈົນຢູ່ໃນຕ່າງປະເທດລົງ. ພວກວົງການການກຸສົນ ແລະພວກຝ່າຍ
ຄ້ານທີ່ນິຍົມແນວທາງເດີມນັ້ນ ໄດ້ພາກັນສະແດງຄວາມຍິນດີຢ່າງກວ້າງຂວາງ ນໍາການທົບ
ທວນເບິ່ງແລະປະຕິຮູບການຊ່ວຍເຫລືອດັ່ງກ່າວ ຊຶ່ງພວກເຂົາເຈົ້າເວົ້າວ່າເປັນການສະແດງ
ອອກເຖິງນໍ້າໃຈເອື້ອເຟື້ອເຜື່ອແຜ່ຂອງອອສເຕຣເລຍ ໃນການຊ່ວຍເຫລືອຊີວິດປະຊາຊົນຢູ່
ໃນພວກປະເທດທີ່ຍາກຈົນກວ່າຕົນນັ້ນ.
