ໃນຄວາມພະຍາຍາມຂັ້ນສຸດທ້າຍ ເພື່ອຈະຊ່ວຍນັກໂທດຄ້າຢາ
ເສບຕິດ 2 ຄົນ ໄວ້ຈາກການຖືກປະຫານຊີວິດໂດຍການຍິງເປົ້າ
ຢູ່ໃນອິນໂດເນເຊຍນັ້ນ ກະຊວງການຕ່າງປະເທດ ຂອງ
ອອສເຕຣເລຍ ໄດ້ຂໍຮ້ອງໄປຍັງ Jakarta ໃຫ້ໂຈະການປະຫານ
ຊີວິດ ໄວ້ກ່ອນ ຈົນກວ່າຈະມີການ ສືບສວນສອບສວນ ກ່ຽວກັບ
ການກ່າວຫາວ່າ ມີການສໍ້ລາດບັງຫລວງ ໃນການດຳເນີນຄະດີ
ຂອງທາງການອິນໂດເນເຊຍ ນັ້ນເສຍກ່ອນ.
ລັດຖະມົນຕີຕ່າງປະເທດ ອອສເຕຣເລຍ ທ່ານນາງ Julie
Bishop ອ້າງວ່າ ບັນດາຜູ້ພິພາກສາຄະດີ ໄດ້ຮ້ອງຂໍ ເງິນຈຳນວນ
ຫຼາຍສິບພັນດອນລາ ເພື່ອທີ່ຈະຕັດສິນຜ່ອນໂທດ ໃຫ້ນັກໂທດທັງສອງຈຳຄຸກບໍ່ຮອດ 20 ປີ.
ບັນດາເຈົ້າໜ້າທີ່ອິນໂດເນເຊຍ ກ່າວວ່າ ຊາວອອສເຕຣເລຍ ໄດ້ໃຊ້ທຸກໆວິທີທາງ ຂອງ
ການຂໍອຸທອນ ຈົນໝົດແລ້ວ.
ໃນຂະນະດຽວກັນ ປະທານາທິບໍດີ ອິນໂດເນເຊຍ ທ່ານ Joko Widodo ກ່າວໃນວັນຈັນ
ມື້ນີ້ ວ່າ ທ່ານຈະປຶກສາຫາລືກັບ ລັດຖະມົນຕີຍຸດຕິທຳ ກ່ຽວກັບເລື້ອງທາງດ້ານກົດໝາຍ
ທີ່ພົວພັນກັບຄະດີ ຂອງນັກໂທດປະຫານຊີວິດ ຊາວຟີລິບປິນ ນາງ Mary Jan Veloso.
ຄຳຖະແຫລງນັ້ນ ມີຂຶ້ນ ຫຼັງຈາກ ປະທານາທິບໍດີ ຟີລິບປິນ ທ່ານ Benigno Aquino ໄດ້
ພົບປະກັບ ທ່ານ Widodo ຢູ່ທີ່ກອງປະຊຸມສຸດຍອດ ASEAN ຢູ່ໃນນະຄອນຫລວງ
Kuala Lumpur ແລະ ໄດ້ຂໍຮ້ອງໃຫ້ພິຈາລະນາຄະດີດັ່ງກ່າວ ເພື່ອດ້ານມະນຸດສະທຳ.
ໃນວັນຈັນມື້ນີ້ ພວກປະທ້ວງຊາວຟີລິບປິນຫຼາຍສິບຄົນ ໄດ້ເຕົ້າໂຮມກັນ ຢູ່ນອກສະຖານ
ທູດອິນໂດເນເຊຍ ໃນນະຄອນຫລວງມານີລາ ທີ່ມີການປ້ອງກັນຢ່າງໜາແໜ້ນ ເພື່ອຮຽກ
ຮ້ອງໃຫ້ ທ່ານ Widodo ຢຸດຕິ ການປະຫານຊີວິດ ນາງ Veloso.
ພວກນັກໂທດຄ້າຢາເສບຕິດ 10 ຄົນ ທີ່ໄດ້ຮັບແຈ້ງລ່ວງໜ້າ 72 ຊົ່ວໂມງ ວ່າພວກເຂົາເຈົ້າ
ຈະຖືກປະຫານຊີວິດ ເມື່ອວັນເສົາຜ່ານມານັ້ນ ອາດຈະຖືກປະຫານຊີວິດ ໃນຕອນຄ່ຳຄືນ
ວັນອັງຄານມື້ອື່ນນີ້ ຢ່າງໄວທີ່ສຸດ.
