ລິ້ງ ສຳຫລັບເຂົ້າຫາ

ອອສເຕຣເລຍ ຮັບປາກ ຈະຊ່ວຍເຫຼືອ ອັຟການີສຖານ 300 ລ້ານໂດລາ

  • ທອງປານ ເທບວົງສາ

ທ່ານນາງ Julia Gillard ນາຍົກລັດຖະມົນຕີອອສເຕຣເລຍ

ອອສ​ເຕຣ​ເລຍ​ຮັບປາກ​ວ່າ​ຈະ​ຮ່ວມສົມທົບ​ເງິນຈໍານວນ 300 ລ້ານ​ໂດ​ລາ ​ເພື່ອ​ຊ່ວຍ​ຄໍ້າ​ຊູກໍາລັງ​ຮັກສາ​ຄວາມ​ປອດ​ໄພ​ອັຟກາ​ນີສຖານ ຫລັງ​ຈາກ​ກໍາ ລັງ​ທະຫານຂອງ​ຕ່າງປະ​ເທດ​ຖອນ​ອອກ​ໄປ​ແລ້ວນັ້ນ.

ທ່ານ​ນາງ Julia Gillard ນາຍົກລັດຖະມົນຕີອອສ​ເຕຣ​ເລຍ​ກ່າວ​ເມື່ອ​ວັນ ພຸດ​ມື້​ນີ້​ວ່າ ອອສ​ເຕຣ​ເລຍ​ຈະ​ສະໜອງ​ເງິນ​ຈໍານວນ 100 ລ້ານ​ໂດ​ລາ​ປະ​ຈໍາປີ​ໃຫ້​ແກ່​ອັຟກາ​ນີສຖານ​ເປັນ​ເວລາ 3 ປີ ​ໂດຍ​ເລີ່​ມ​ແຕ່​ປີ 2015 ​ໄປ.

ກໍາລັງສູ້​ລົບຂອງ​ຕ່າງປະ​ເທດ​ ມີ​ກໍານົດ​ຈະ​ຖອນ​ອອກ​ຈາກ​ອັຟກາ​ນີສຖານ ​ແລະ​ໂອນ​ການ​ຮັກສາ​ຄວາມ​ປອດ​ໄພ​ ໃຫ້​ແກ່​ກໍາລັງ​ຮັກສາ​ຄວາມ​ສະຫງົບ ​ແຫ່ງ​ຊາດ​ອັຟກາ​ນີສຖານ ​ໃນ​ທ້າຍ​ປີ 2014.

ປະ​ເທດ​ອອສ​ເຕຣ​ເລຍ ຊຶ່ງ​ມີ​ທະຫານ​ຂອງ​ຕົນ​ຢູ່​ໃນ​ອັຟກາ​ນີສຖານ 1,500 ຄົນ ​ໄດ້​ປະກາດ​ເມື່ອເດືອນ​ມີນາ​ຜ່ານ​ມາ​ວ່າ ທະຫານ​ຂອງ​ຕົນ​ຈະ​ຖອນ​ອອກ​ຈາກອັຟກາ​ນີສຖານ​ໃນ​ກາງ​ປີ 2013 ​ນຶ່ງ​ປີລ່ວງ​ໜ້າ ຕາມ​ແຜນການ​ທີ່​ໄດ້ຕັ້ງ​ໄວ້​ກ່ອນ​ນັ້ນ.

ທ່ານ​ນາງ​ນາ Gillard ກ່າວ​ເມື່ອ​ວັນ​ພຸດ​ມື້​ນີ້​ວ່າ ອອສ​ເຕຣ​ເລ​ຍ ຈະ​ພິດ​ຈາ ລະ​ນາໃຫ້​ມີ​ກໍາລັງ​ປະຕິບັດ​ການ​ພິ​ເສດ​ຢູ່​ໃນ​ປະ​ເທດຕໍ່​ໄປ​ເລື້ອຍໆ​ຫລັງ​ຈາກ ອັຟກາ​ນີສຖານ​ເຂົ້າຄວບ​ຄຸມ​ແລ້ວ ​ໂດຍ​ກ່າວ​ວ່າ ຕົນມີ​ຜົນ​ປະ​ໂຫຍດແຫ່ງ​ຊາດ​ທີ່​ສໍາຄັນ ​ໃນ​ການ​ສະໜັບສະໜຸນ​ໃຫ້​ມີ​ສະຖຽນ​ລະ​ພາບ ຢູ່​ໃນອັຟກາ​ນີສຖານ​ນັ້ນ.

ທ່ານ​ນາງ​ກ່າວ​ອີກ​ວ່າ ລັດຖະບານ Canberra ຈະ​ຮັກສາ​ໂຄງການ​ຊ່ວຍ ​ເຫລືອ​ໃນ​ການ​ພັດທະນາ​ທີ່​ສຳຄັນໆ ກາຍ​ປີ 2014 ​ໄປ ​ເພື່ອ​ຊ່ວຍ​ເຫລືອ​ອັຟກາ​ນີສຖານ​ໃນດ້ານ​ຕ່າງໆ ​ເຊັ່ນດ້ານ​ສາທາລະນະ​ສຸກແລະການ​ສຶກສາ ​ເປັນ​ຕົ້ນ.

ທະຫານ​ອອສ​ເຕຣ​ເລຍ​ໄດ້​ເສຍ​ຊີວິດ​ໄປ 32 ຄົນ​ໃນ​ຄວາມ​ພະຍາຍາມ​ພາຍ ​ໃຕ້​ການ​ນຳພາຂອງສະຫະລັດ ​ເພື່ອ​ໂຄ່ນ​ລົ້ມ​ກຸ່ມ​ຕາ​ລິ​ບານ ​ຫລັງ​ຈາກ​ການ​ໂຈມ​ຕີ​ຂອງ​ພວກກໍ່​ການ​ຮ້າຍ​ໃນ​ສະຫະລັ​ດ​ເມື່ອ​ປີ 2001 ນັ້ນ.

XS
SM
MD
LG