ທ່ານນາງ Aung San Suu Kyi ນັກຕໍ່ສູ້ເພື່ອປະຊາທິປະໄຕທີ່ມີຊື່ສຽງ ມາເປັນ
ເວລາດົນນານແລະຜູ້ນໍາຝ່າຍຄ້ານຂອງມຽນມາ ໄດ້ອອກເດີນທາງໄປປະເທດໄທ
ໃນວັນອັງຄານມື້ນີ້ ຊຶ່ງເປັນການເດີນທາງໄປຕ່າງປະເທດຄັ້ງທໍາອິດໃນຮອບ 24 ປີ.
ສະມາຊິກສະພາທີ່ຫາກໍໄດ້ຮັບເລືອກໃໝ່ທ່ານນີ້ ໄດ້ຖືກຄຸມຂັງ 15 ປີໃນໄລຍະ
22 ປີທີ່ຜ່ານມາ ຍ້ອນໄດ້ທ້າທາຍອໍານາດການປົກຄອງທີ່ກົດຂີ່ຂອງພວກຜູ້ນຳ
ທະຫານຢູ່ໃນມຽນມາ ທີ່ດຳເນີນມາເປັນເວລາຫລາຍສິບປີ.
ທ່ານນາງຈະເດີນທາງໄປເຖິງບາງກອກ ເມືອງຫລວງຂອງໄທ ໃນວັນອັງຄານມື້ນີ້
ບ່ອນທີ່ທ່ານນາງຄາດວ່າ ຈະພົບປະກັບນາຍົກລັດຖະມົນຕີໄທ ທ່ານນາງ ຍິ່ງລັກ
ຊິນນະວັດ. ຜູ້ນໍາຝ່າຍຄ້ານຂອງມຽນມາຍັງຈະກ່າວຄຳປາໄສຢູ່ທີ່ກອງປະຊຸມ
ເສດຖະກິດໂລກ ກ່ຽວກັບເຂດເອເຊຍຕາເວັນອອກ ໃນທ້າຍອາທິດນີ້.
ທ່ານນາງ Aung San Suu Kyi ຜູ້ທີ່ໄດ້ຮັບລັງວັນໂນແບລ ຂະແໜງສັນຕິພາບ
ຊຶ່ງໄດ້ຖືກປ່ອຍຕົວຈາກການກັກບໍລິເວນ ໃນປີ 2010 ກ່ອນໜ້ານີ້ ເຄີຍປະຕິເສດ
ມາແລ້ວ ຕໍ່ການເດີນທາງອອກຈາກມຽນມາ ເພາະຢ້ານເຈົ້າໜ້າທີ່ຈະບໍ່ໃຫ້ທ່ານ
ນາງກັບຄືນເຂົ້າປະເທດອີກ.
ມີການເບິ່ງກັນວ່າ ການເດີນທາງຂອງທ່ານນາງໃນຄັ້ງນີ້ ແມ່ນຂີດໝາຍສຳຄັນ
ໃນຂັ້ນຕອນການປະຕິຮູບທາງດ້ານການເມືອງຂອງມຽນມາ ຊຶ່ງໄດ້ເລີ້ມຂື້ນໃນ
ເວລາທີ່ພວກຜູ້ນຳທາງທະຫານຂອງປະເທດໄດ້ໂອນອໍານາດໃຫ້ແກ່ລັດຖະບານ
ພົນລະເຮືອນພຽງແຕ່ໃນນາມ ໃນປີແລ້ວນີ້.