ປະທານາທິບໍດີຊີເຣຍ ທ່ານ Bashar al-Assad ກ່າວວ່າ
ການສະໜັບສະໜຸນພວກລັດອິສລາມ ໄດ້ຂະຫຍາຍຕົວອອກ
ນັບຕັ້ງແຕ່ ກຸ່ມປະສົມທີ່ນຳພາໂດຍສະຫະລັດ ໄດ້ເລີ້ມປະຕິບັດ
ການໂຈມຕີທາງອາກາດ ຕໍ່ເປົ້າໝາຍຕ່າງໆໃນຊີເຣຍ.
ຢູ່ໃນການສຳພາດເມື່ອວັນອາທິດວານນີ້ ໃນລາຍການ 60 ນາທີ
ຂອງຕາໜ່າງໂທລະພາບ CBS ສະຫະລັດນັ້ນ ທ່ານ Assad ກ່າວ
ວ່າ ຈຳນວນ ທະຫານເກນຂອງລັດອິສລາມ ໄດ້ເພີ້ມຂຶ້ນ ນັບຕັ້ງແຕ່
ການໂຈມຕີທາງອາກາດ ໄດ້ເລີ້ມຂຶ້ນໃນເດືອນກັນຍາເປັນຕົ້ນມາ.
ຜູ້ນຳຊີເຣຍ ກ່າວວ່າ ການກ່າວຫາຕ່າງໆ ທີ່ວ່າ ຊີເຣຍໃຊ້ອາວຸດ
ເຄມີ ຕໍ່ພົນລະເຮືອນນັ້ນ ແມ່ນເປັນການໂຄສະນາຊວນເຊື່ອຂອງປະເທດຕາເວັນຕົກ. ແຕ່ທ່ານກ່າວວ່າ ທ່ານບໍ່ຄັດຄ້ານຫຍັງເລີຍ ຕໍ່ການໃຫ້ພວກກວດກາ ໄປກວດເບິ່ງວ່າ ໄດ້ມີການນຳໃຊ້ແກັສ ຄລໍຣີນ ຫຼືບໍ່.
ທ່ານຍັງກ່າວອີກວ່າ ທ່ານເປີດກ້ວາງຕໍ່ການສົນທະນາກັນກັບສະຫະລັດ ແຕ່ຈະປະຕິເສດ
ຕໍ່ການເຈລະຈາ ກ່ຽວກັບວ່າ ຈະອະນຸຍາດໃຫ້ທ່ານ ດຳລົງຕຳແໜ່ງຢູ່ຕໍ່ໄປ ຫຼືບໍ່ນັ້ນ.
ສະຫະລັດ ໄດ້ກ່າວມາ ດົນນານແລ້ວວ່າ ປະທານາທິບໍດີ Assad ຈະເປັນສ່ວນນຶ່ງ ຂອງ
ອະນາຄົດຂອງຊີເຣຍບໍ່ໄດ້ ຖ້າຫາກວ່າຈະມີການເຈລະຈາຍຸດຕິການສູ້ລົບກັນນັ້ນ.
ໂຄສົກກະຊວງການຕ່າງປະເທດສະຫະລັດ ທ່ານ Jeff Rathke ກ່າວເມື່ອອາທິດແລ້ວນີ້
ວ່າ ທ່ານ Assad ແລະ ບັນດາຜູ້ຮ່ວມງານໃກ້ຊິດຂອງທ່ານ ແມ່ນມີ “ເລືອດເຕັມມືຂອງພວກເຂົາ.” ທ່ານກ່າວອີກວ່າ ພວກເຂົາຍັງບໍ່ໄດ້ພິສູດໃຫ້ເຫັນວ່າ ພວກເຂົາມີຄວາມ
ເຕັມໃຈ ທີ່ຈະທຳການເຈລະຈາ ທີ່ມີຄວາມໝາຍ ກັບຝ່າຍຄ້ານຊີເຣຍ ຫົວປານກາງນັ້ນ.
ອະດີດນັກລົບກຸ່ມ IS ທີ່ຖືກຈັບ ເວົ້າເຖິງຄວາມກິນແໜງໃຈ ໃນການໃຫ້ສຳພາດ:
