ປະທານາທິບໍດີ ຊີເຣຍ ທ່ານບາຊາຣ ອາຊາດ ກ່າວວ່າ ເມືອງ ອາເລບໂປ ທີ່ເປັນສູນກາງເສດຖະກິດຂອງແຂວງອາເລບໂປ ຈະ “ກັບຄືນມາເຂັ້ມແຂງ ຂຶ້ນກວ່າເກົ່າເຊັ່ນເຄີຍ” ຫຼັງຈາກກອງກຳລັງຂອງຊີເຣຍ ເຂົ້າຍຶດເອົາການຄວາມຄຸມຈາກພວກນັກລົບຕໍ່ຕ້ານລັດຖະບານ ໄດ້ຢ່າງຄົບຖ້ວນ.
ໃນການກ່າວຖະແຫລງຜ່ານໂທລະພາບທີ່ບໍ່ຄ່ອຍມີຫຼາຍ ໃນວັນຈັນວານນີ້ ທ່ານອາຊາດ ໄດ້ກ່າວວ່າ ກອງທັບ ຈະບໍ່ຍອມແພ້ຈົນກວ່າວ່າ ຕົນຈະບັນລຸໄຊຊະນະຢ່າງຄົບຖ້ວນ “ບໍ່ໄວ ຫຼື ບໍ່ຊ້າ.”
ທ່ານອາຊາດ ເວົ້າວ່າ “ການປົດປ່ອຍໃນຄັ້ງນີ້ ບໍ່ໝາຍຄວາມວ່າ ເປັນ ສິ້ນສຸດຂອງສົງຄາມ ແລະບໍ່ໝາຍຄວາມວ່າ ເປັນການສິ້ນສຸດຂອງແຜນການ ບໍ່ເປັນການສິ້ນສຸດຂຊອງການກໍ່ການຮ້າຍ ຫຼື ການຍອມຈຳນົນຂອງພວກສັດຕູ….ມັນໝາຍຄວາມວ່າ ພວກເຮົາໄດ້ເອົາດັງຂອງພວກເຂົາຖູລົງໃສ່ພື້ນດິນ ອັນເປັນການກະທຳສຳລັບໄຊຊະນະອັນຄົບຖ້ວນ.”
ທ່ານອາຊາດ ໄດ້ກ່າວຕື່ມວ່າ ການຕໍ່ສູ້ເພື່ອປົດປ່ອຍ ທຸກແຫ່ງຂອງອາເລບໂປ ພ້ອມກັບຄຸ້ມບ້ານທີ່ຄວບຄຸມໂດຍພວກຕໍ່ຕ້ານໃນແຂວງອິດລິບ ຈະສືບຕໍ່ໄປ ເຖິງແມ່ນວ່າ “ສຽງມິດຫງຽບໄປ” ຈາກພາກເໜືອ ຊຶ່ງໝາຍເຖິງເທີກີ ທີ່ມີຊາຍແດນຕິດກັບທັງສອງແຂວງດັ່ງກ່າວ ແລະໄດ້ໃຫ້ການໜຸນຫລັງແກ່ພວກຕໍ່ຕ້ານລັດຖະບານຊີເຣຍ.
ເທີກີ ໄດ້ສົ່ງກຳລັງງທະຫານ ແລະອຸປະກອນເຂົ້າໄປໃນແຂວງອິດລິບ ເພື່ອພະຍາຍາມທີ່ຈະຢຸດຢັ້ງການເຄື່ອນກຳລັງຂອງກອງທັບຊີເຣຍ ໃນຂະນະທີ່ ບັນດານັກການທູດຂອງເທີກີ ພວມຢູ່ໃນນະຄອນຫຼວງມົສກູ ເພື່ອເຈລະຈາກັບຣັດເຊຍ ທີ່ເປັນພັນທະມິດໃຫຍ່ທີ່ສຸດຂອງຊີເຣຍ.
ຖະແຫລງການຈາກກະຊວງການຕ່າງປະເທດຂອງເທີກີ ໃນວັນຈັນວານນີ້ ທີ່ວ່າ “ເນັ້ນເຖິງຄວາມຈຳເປັນໃນການຫລຸດຜ່ອນຄວາມເຄັ່ງຕຶງຢ່າງວ່ອງໄວຢູ່ໃນສະໜາມ ແລະເພື່ອປ້ອງກັນບໍ່ໃຫ້ສະຖານະການດ້ານມະນຸດສະທຳ ຊຸດໂຊມລົງຕື່ມອີກ.”
ກອງກຳລັງຂອງຊີເຣຍ ທີ່ໄດ້ຮັບການໜຸນຫຼັງໂດຍກຳລັງທາງອາກາດຂອງຣັດເຊຍ ໄດ້ເຂົ້າຄວບຄຸມພື້ນທີ່ສ່ວນໃຫຍ່ຂອງເມືອງອາເລບໂປ ຍຶດໄດ້ປະມານ 30 ຄຸ້ມບ້ານ ພາຍໃນພຽງມື້ດຽວໃນວັນອາທິດຜ່ານມານີ້. ເມືອງອາເລບໂປ ໄດ້ຕົກເປັນເປົ້າໝາຍ ຂອງການຍິງຈະຫຼວດຢູ່ເລື້ອຍມາ ໂດຍກຸ່ມຕໍ່ຕ້ານລັດຖະບານຊີເຣຍ.
ຫົວໜ້າດ້ານມະນຸດສະທຳຂອງອົງການສະຫະປະຊາຊາດ ທ່ານມາກ ໂລຄັອກ ກ່າວວ່າ ການສູ້ລົບກັນ ໃນເຂດພາກຕາເວັນຕົກສຽງເໜືອຂອງຊີເຣຍ ລວມທັງ ອິດລິບນັ້ນ ໄດ້ເຖິງ “ລະດັບທີ່ເປັນຕາຢ້ານ” ໂດຍມີພົນລະເຮືອນ ປະມານ 900,000 ຄົນ ກຳລັງຫລົບໜີຈາກເຮືອນຊານຂອງພວກເຂົາເຈົ້າ ນັບຕັ້ງແຕ່ຕົ້ນເດືອນທັນວາປີກາຍນີ້.
ທ່ານໂລຄັອກ ໄດ້ເວົ້າວ່າ “ເລື້ອງລາວອັນໂຫດຮ້າຍດ້ານມະນຸດສະທຳທີ່ໃຫຍ່ທີ່ສຸດຂອງສັດຕະວັດທີ 21 ຈະພຽງຫລີກເວັ້ນໄດ້ ຖ້າຫາກ ບັນດາສະມາຊິກສະພາຄວາມໝັ້ນຄົງ ແລະພວກທີ່ມີອິດທິພົນ ຜ່ານຜ່າຜົນປະໂຫຍດສ່ວນຕົວໄດ້ ແລະເອົາຜົນປະໂຫຍດສ່ວນລວາມ ໃນມະນຸດສະທຳມາກ່ອນ.”
