ຍິງສາວອາຍຸ 18 ປີຄົນນຶ່ງທີ່ຝັນຢາກເປັນພະຍາບານ, ພໍ່ລູກສອງ ແລະອະດີດນັກກິລາອາເມຣິກັນຟຸດບອລຈາກທີມ Princeton, ໄດ້ຮັບບາດເຈັບສາຫັດໃນເວລາທີ່ຄົນຂັບລົດກະບະສີຂາວ ໄດ້ເລັ່ງລົດເຂົ້າໄປຖະຫນົນເສັ້ນ ເບີເບິນ (Bourbon) ເຊິ່ງເຕັມໄປດ້ວຍຝູງຊົນທີ່ກໍາລັງສະຫຼອງວັນພັກ ໃນຕອນເຊົ້າຂອງມື້ວັນພຸດວານນີ້.
ເຈົ້າໜ້າທີ່ຍັງບໍ່ໄດ້ອອກມາເປີດເຜີຍລາຍຊື່ຜູ້ເສຍຊີວິດ 15 ຄົນຈາກການໂຈມຕີ ດ້ວຍລົດກະບະ ໃນມື້ປີໃໝ່ຢູ່ນະຄອນ ນິວ ອໍລີນ, ແຕ່ບັນດາຄອບຄົວ ແລະ ໝູ່ເພື່ອນຂອງພວກເຂົາເຈົ້າ ໄດ້ເລີ້ມເລົ່າເຖິງເລື້ອງລາວຂອງພວກເຂົາ.
ດຣ. ດໄວທ໌ ແມັກເຄັນນາ (Dwight McKenna) ເຊິ່ງເປັນທ່ານໝໍ ສັນນະສູດສົບ ກ່າວໃນຖະແຫຼງການສະບັບນຶ່ງໃນຕອນແລງຂອງມື້ວັນພຸດວານນີ້ວ່າ ຊື່ຂອງຜູ້ເສຍຊີວິດຈະຖືກເປີດເຜີຍເມື່ອສໍາເລັດການສັນນະສູດສົບ ແລະຍາດພີ່ນ້ອງຂອງພວກເຂົາໄດ້ຮັບແຈ້ງການແລ້ວ. ໃນນີ້ ມີຜູ້ໄດ້ຮັບບາດເຈັບປະມານ 30 ຄົນ.
ຊາຍອອນ ພາຊັນສ໌ (Zion Parsons) ຈາກ ກອລຟ໌ພວດຕ໌ (Gulfport), ລັດ ມິສຊິສຊິບປີ, ໄດ້ສະຫຼອງປີໃໝ່ໃນຊ່ວງຄືນທໍາອິດຂອງລາວຢູ່ຖະຫນົນ Bourbon ໃນເວລາທີ່ຍານພາຫະນະໄດ້ປະກົດໂຕຂຶ້ນ ແລະແລ່ນຕໍາເຂົ້າໃສ່ເພື່ອນຂອງລາວ, ນາງ ນິກີຣາ ເດີໂດສ໌ (Nikyra Dedeaux) ອາຍຸ 18 ປີ, ຜູ້ທີ່ລາວມີຄວາມຝັນຢາກເປັນພະຍາບານ.
ພາຊັນ ອາຍຸ 18 ປີ ກ່າວຕໍ່ອົງການຂ່າວ AP ວ່າ “ລົດກະບະຄັນນຶ່ງແລ່ນຕຳເຂົ້າແຈທາງ ແລະແລ່ນທັ່ງເຂົ້າມາຕຳໃສ່ຝູງຊົນຄືກັບໃນສາກຂອງຮູບເງົາ ແລະເຮັດໃຫ້ຜູ້ຄົນຟົ້ງຂຶ້ນສູ່ອາກາດ. ມັນຕໍາເຂົ້າຮ່າງຂອງນາງ ແລະເຮັດໃຫ້ນາງຟົ້ງໄປໄກຢ່າງນ້ອຍ 30 ຟຸດ, ຂ້ອຍໂຊກດີຫຼາຍທີ່ຍັງມີຊີວິດຢູ່.”
ໃນຂະນະທີ່ຝູງຊົນແຕກກະແຈກກະຈາຍຢູ່ໃນຄວາມວຸ່ນວາຍ, ລາວຕ້ອງພົບກັບເຫດການທີ່ເປັນຕາຢ້ານຈາກເລືອດ ແລະບັນດາຜູ້ເຄາະຮ້າຍທີ່ຮ່າງກາຍຂາດອອກ, ພ້ອມທັງໄດ້ຍິນສຽງປືນ ແລະສຽງລະເບີດດັງຂຶ້ນ.
ພາຊັນສ໌ ກ່າວວ່າ “ສົບຈໍານວນຫຼາຍ, ສົບຢູ່ຕາມຖະໜົນ, ທຸກຄົນພາກັນຮ້ອງ ແລະເປັ່ງສຽງອອກມາແຊວໆ, ຜູ້ຄົນຮ້ອງໄຫ້ທົ່ວບໍລິເວນ, ຄືກັບວ່າ ມີເສດຊາກຂອງສະໝອງຢູ່ເຕັມພື້ນ, ມັນຄືກັບຄວາມບ້າ, ຄືກັບເຂດຂອງສົງຄາມທີ່ໃກ້ທີ່ສຸດເທົ່າທີ່ຂ້ອຍເຄີຍເຫັນມາ.”
ເຣດຈີ້ ຮັນເຕີ້ (Reggie Hunter) ຜູ້ເປັນພໍ່ຂອງລູກສອງ ອາຍຸ 37 ປີຈາກເມືອງ ແບດຕັນ ຣູຈ໌ (Baton Rouge) ເປັນນຶ່ງໃນຈຳນວນຜູ້ເສຍຊີວິດ 10 ຄົນຂອງວັນພຸດວານນີ້, ເມື່ອລົດກະບະຄັນນຶ່ງໄດ້ແລ່ນອອກຈາກຖະໜົນ ເບີເບິນ ໃນອັນທີ່ເຈົ້າໜ້າທີ່ຮ້ອງວ່າ ເປັນການກໍ່ການຮ້າຍ.
ເຣດຈີ້ ຮັນເຕີ້ ຫາກໍອອກຈາກວຽກ ແລະໄດ້ມຸ່ງໜ້າເພື່ອໄປສະຫຼອງປີໃໝ່ກັບພີ່ນ້ອງ ເມື່ອມີການໂຈມຕີເກີດຂຶ້ນ, ອີງຕາມການກ່າວຕໍ່ ເວັບໄຊ້ Nola.com ຈາກພີ່ນ້ອງຜູ້ໃກ້ຊິດຂອງລາວ ນາງ ເຊີເຣລ ແຈັກສັນ (Shirell Jackson).
ແຈັກສັນ ກ່າວວ່າ ທ້າວ ຮັນເຕີ້ ເສຍຊີວິດ ແລະ ພີ່ນ້ອງຂອງລາວ ກໍໄດ້ຮັບບາດເຈັບ.
ໄທເກີ ເບັດຈ໌ (Tiger Bech) ອະດີດນັກກິລາອາເມຣິກັນຟຸດບອລ ຂອງໂຮງຮຽນມັດທະຍົມປາຍ ແລະວິທະຍາໄລ ຈາກລັດ ຫຼຸຍເຊຍນາ, ແມ່ນລວມຢູ່ໃນຈໍານວນຜູ້ທີ່ເສຍຊີວິດເຫຼົ່ານັ້ນ ລຸນຫຼັງຜູ້ຂັບລົດກະບະ ຂັບເຂົ້າໃສ່ຝູງຊົນໃນເຂດ French Quarter ຂອງເມືອງນິວອໍລີນ, ອີງຕາມການກ່າວຂອງເຈົ້າໜ້າທີ່ດ້ານການສຶກສາ.
ທ້າວ ເບັດຈ໌ ອາຍຸ 28 ປີ ເສຍຊີວິດຢູ່ທີ່ໂຮງໝໍ New Orleans ໃນຕອນສວຍຂອງມື້ວັນພຸດວານນີ້, ອີງຕາມການລາຍງານຂອງສື່ທ້ອງຖິ່ນທີ່ອ້າງອີງຈາກ ກິມ ບຣຸດຊາດ (Kim Broussard).
ຟໍຣັມສະແດງຄວາມຄິດເຫັນ