ທ່ານ Taleb Rifai ຫົວໜ້າອົງການທ່ອງທ່ຽວຂອງສະຫະປະ ຊາຊາດກ່າວວ່າ ການທ່ອງທ່ຽວຂອງໂລກກຳລັງຟື້ນໂຕຄືນ ນຳພາໂດຍການເຕີບໂຕຂຶ້ນຢ່າງວ່ອງໄວໃນເອເຊຍ ເຖິງແມ່ນວ່າການທ່ອງ ທ່ຽວໃນທະວີບຢູໂຣບ ຍັງຢູ່ໃນສະພາວະຕົກຕ່ຳຢູ່ກໍຕາມ. ສິງມີລາຍລະ ອຽດມາສະເໜີທ່ານ ຈາກລາຍງານຂອງຜູ້ສື່ຂ່າວວີໂອເອ ທີ່ບາງກອກ ບ່ອນທ່ີທ່ານ Rifai ກຳລັງຕິດຕາມເບິ່ງສະພາບການທ່ອງທ່ຽວຂອງໄທຢູ່ນັ້ນ.
ບັນດາຊ່ຽວຊານໃນວົງການອຸດສາຫະກຳການທ່ອງທ່ຽວກ່າວວ່າ ປະຊາຊົນໃນທົ່ວໂລກພາກັນໃຊ້ເວລາແລະເງິນຄຳໃນການໄປທ່ອງ ທ່ຽວ ຢູ່ເຖິງແມ່ນມີຄວາມເປັນຫ່ວງນຳການເສດຖະກິດຂອງໂລກ ທ່ີຍັງ ຢູ່ໃນສະພາບທ່ີບໍ່ແນ່ນອນຢູ່ກໍຕາມ.
ອົງການການທ່ອງທ່ຽວໂລກຂອງສະຫະປະຊາຊາດທຳນາຍວ່າ ການ ທ່ອງທ່ຽວຂອງໂລກຈະເຕີບໂຕຂຶ້ນ 4 ເປີເຊັນໃນປີນີ້ ຊຶ່ງເປັນໄປຕາມ ອັດຕາການເຕີບໂຕໂດຍສະເລ່ຍ ຂອງອຸດສາຫະກຳການທ່ອງທ່ຽວຂອງໂລກ ໃນຮອບ 15 ປີຜ່ານມານີ້.ທ່ານ Taleb Rifai ເລຂາທິການໃຫຍ່ອົງການທ່ອງທ່ຽວຂອງສະຫະ ປະຊາຊາດກ່າວໃນວັນສຸກຜ່ານມານີ້ວ່າ ການເຕີບໂຕທ່ີວ່ານີ້ສະແດງໃຫ້ເຫັນວ່າ ການທ່ອງທ່ຽວໄດ້ຟື້ນໂຕຄືນຈາກວິກິດການການເງິນຂອງໂລກແລ້ວ ບໍ່ຫລາຍກໍນ້ອຍ ຊຶ່ງທ່ານກ່າວຊີ້ແຈງວ່າ:
"ພວກເຮົາຫາກໍໄດ້ເສັດສີ້ນການສຶກສາເບິ່ງຜົນຂອງໄລຍະສີ່ເດືອນທຳ ອິດຂອງປີ 2010 ຂອງອຸດສາຫະກຳທ່ອງທ່ຽວຢູ່ໃນໂລກ ແລະກໍພົບວ່າ ເຮົາມີການເຕີບໂຕຂຶ້ນ 7% ສົມທຽບໃສ່ປີ 2009 ນັ້ນ. ປີ 2009 ໄດ້ເປັນປີທີ່ຂີ້ຮ້າຍທີ່ສຸດ ເທົ່າທີ່ພວກເຮົາເຄີຍພົບມາໃນລະຍະຫົກທົດ ສະວັດຜ່ານມາ ຄືມີການຕົກຕ່ຳລົງເຖິງ 4%. ດັ່ງນັ້ນ ການຟື້ນຕົວຄືນ ຄັ້ງນີ້ ຈຶ່ງຖືວ່າແຂງແຮງແລະວ່ອງໄວ ກວ່າທີ່ພວກເຮົາໄດ້ຄິດໄວ້ ແລະ ປະການສຳຄັນອີກຢ່າງນຶ່ງນັ້ນ ກໍຄືການຟື້ນຕົວຄືນນີ້ໂດຍພື້ນຖານແລ້ວ ແມ່ນກຳລັງໄດ້ຮັບການຂັບດັນ ແລະນຳພາໂດຍຂົງເຂດເອເຊຍ."
ທ່ານ Rifai ກ່າວວ່າ ພວກນັກທ່ອງທ່ຽວຈາກນາໆຊາດ ທ່ີເດີນ ທາງໄປທ່ອງທ່ຽວໃນເອເຊຍ ນັບແຕ່ເດືອນມັງກອນ ຫາເດືອນເມສາ ຜ່ານມານັ້ນ ໄດ້ເພີ່ມຂຶ້ນ 12 ເປີເຊັນ ໃນຂະນະທ່ີອັດຕາເຕີບໂຕໂດຍ ສະເລ່ຍຂອງໂລກ ຢູ່ໃນລະດັບ 7 ເປີເຊັນ.ແຕ່ວ່າ ໃນຂະນະທ່ີການທ່ອງທ່ຽວໃນເອເຊຍກຳລັງຟື້ນໂຕຄືນສູ່ລະດັບປົກກະຕິຢູ່ນີ້ ການທ່ອງທ່ຽວໃນຢູໂຣບກັບຍັງຢູ່ໃນສະພາວະເກືອບວ່າບໍ່ເຕີບໂຕຂຶ້ນເລີຍ.ທ່ານ Rifai ກ່າວວ່າ ການຂາດດຸນງົບປະມານຢ່າງຫລວງຫລາຍຂອງ ລັດຖະບານປະເທດຕ່າງໆ ມີແນວໂນ້ມເຮັດໃຫ້ພວກລັດຖະບານເຫລົ່ານັ້ນເກັບພາສີຂຶ້ນ ຊຶ່ງພາໃຫ້ພວກນັກທ່ອງທ່ຽວບໍ່ພາກັນຢາກໄປພັກ ຜ່ອນຫລືທ່ອງທ່ຽວໃນຢູໂຣບນັ້ນ.
ໃນວັນສຸກຜ່ານມານີ້ ຫົວໜ້າອົງການທ່ອງທ່ຽວສະຫະປະຊາຊາດທ່ານ ນີ້ໄດ້ໄປຢ້ຽມຢາມຍ່ານສູນກາງການຄ້າແລະໂຮງແຮມ ທີ່ເຂດຣາດຊະປະສົງໃນບາງກອກ.
ສູນກາງການຄ້າທີ່ຫລູຫລາສຳລັບຄົນຮັ່ງມີແຫ່ງນີ້ ຍັງກຳລັງຟື້ນໂຕຄືນຈາກການຄອບຄອງເປັນເວລາຫລາຍສັບປະດາ ໂດຍພວກປະທ້ວງຕໍ່ ຕ້ານລັດຖະບານຫລາຍພັນຄົນ. ທາງກອງທັບໄທໄດ້ຂັບໄລ່ພວກປະທ້ວງອອກຈາກຂົງເຂດດັ່ງກ່າວໄປ ໃນເດືອນພຶດສະພາຜ່ານມານັ້ນ.
ການຊຸມນຸມປະທ້ວງລັດຖະບານດັ່ງກ່າວ ໄດ້ບີບບັງຄັບໃຫ້ວົງການທຸ ລະກິດໃນເຂດນັ້ນຕ້ອງປິດກິດຈະການລົງ ເຮັດໃຫ້ພວກເຈົ້າຂອງທຸລະກິດເສຍລາຍໄດ້ໄປເປັນຈຳນວນຫລາຍຮ້ອຍລ້ານດອນລາ ແລະການ ທ່ອງທ່ຽວກໍໄດ້ຕົກຕໍ່າລົງຢ່າງວ່ອງໄວ ໃນລະຫວ່າງການປະທ້ວງນັ້ນ.
ການປະທະກັນຫລາຍຄັ້ງລະຫວ່າງພວກປະທ້ວງແລະພວກທະຫານໄດ້ເຮັດໃຫ້ປະຊາຊົນເສຍຊີວິດໄປ 90 ຄົນແລະພວກປະທ້ວງທ່ີມີຄວາມໂກດແຄ້ນ ໄດ້ພາກັນເອົາໄຟຈູດເຜົາພວກຕຶກອາຄານຕ່າງໆຫລາຍກວ່າ 30 ຫລັງ ທ່ີຮວມທັງສູນກາງການຄ້າໃຫຍ່ໃນຍ່ານຣາດຊະປະ ສົງນັ້ນນຳ.ທ່ານ Rifai ກ່າວວ່າ ໄທມີຄວາມສາມາດໃນການປັບໂຕໄດ້ໄວ ແລະກໍກຳລັງຟື້ນໂຕຄືນ ແລະການທ່ອງທ່ຽວກໍກຳລັງຟື້ນໂຕຄືນເຊ່ນກັນ. ທ່ານ Rifai ກ່າວຕໍ່ໄປວ່າ: ບໍ່ວ່າຈະມີສະພາບການແນວໃດເກີດຂື້ນກໍຕາມ ທຸລະກິດການທ່ອງທ່ຽວ ຄືອະນາຄົດຂອງໄທ ແລະມັນເປັນການສຳຄັນຫລາຍທີ່ເຮົາຕ້ອງເຊື່ອມ ໂຍງສອງສິ່ງນີ້ເຂົ້ານຳກັນ ຄືປະເທດໄທແມ່ນກັບຄືນເຂົ້າສູ່ທຸລະກິດ ອີກແລ້ວ ແລະບາງກອກກໍເລິ່ມກັບຄືນມາຄືກຄັກເຄຶ່ອນໄຫວໃນດ້ານ ທຸລະກິດ ແລະ ການທ່ອງທ່ຽວກໍຄືທຸລະກິດຂອງພວກເຮົາ. ທ່ານ Rifai ກ່າວຕື່ມວ່າ
"ມັນຈະໃຊ້ເວລາອີກສອງສາມເດືອນກ່ອນຈະຮູ້ຈັກເປັນທ່ີຈະແຈ້ງວ່າ ການທ່ອງທ່ຽວຂອງໄທໄດ້ຟື້ນໂຕຄືນແທ້ຫລືບໍ? ແລະທ່ານຍອມຮັບວ່າ ຄວາມວຸ້ນວາຍທາງດ້ານການເມືອງ ສາມາດກັບຄືນມາໄດ້."
ທ່ານ Rifai ກ່າວໃນທີ່ສຸດວ່າ ເຖິງແມ່ນມັນຈະເປັນແບບນັ້ນກໍຕາມ ໄທກໍຍັງຄົງເປັນນຶ່ງໃນບັນດາຈຸດໝາຍປາຍທາງ ທີ່ພວກນັກທ່ອງທ່ຽວ ຈາກຢູໂຣບ ນິຍົມພາກັນໄປທ່ອງທ່ຽວຫລາຍທ່ີສຸດຢູ່.
