ຍີ່ປຸ່ນໃຫ້ຄໍາໝັ້ນສັນຍາ ທີ່ຈະໃຫ້ການຊ່ອຍເຫລືອສຸກເສີນແກ່ພວກບໍລີສັດຍີ່ປຸ່ນ ທີ່ໂຮງງານ
ແລະພວກສາຂາບໍລິສັດຂອງເຂົາເຈົ້າໃນໄທ ໄດ້ຮັບຄວາມເສຍຫາຍຫລືຖືກທໍາລາຍຍ້ອນໄພ
ນໍ້າຖ້ວມນັ້ນ.
ນໍ້າຖ້ວມໄດ້ທໍາລາຍສາຍສົ່ງສະບຽງວັດຖຸ ແລະເຮັດໃຫ້ການຜະລິດ ຊ້າລົງໃນບາງບໍລິສັດ
ໃຫຍ່ທີ່ສຸດຂອງຍີ່ປຸ່ນ ຊຶ່ງພວກບໍລິສັດເຫລົ່ານີ້ຫາກໍຟື້ນໂຕຄືນໄດ້ຈາກໄພແຜ່ນດິນໄຫວ
ແລະຄື້ນຟອງສຸນາມິໃນວັນທີ 11ມີນາຜ່ານມານີ້. ບັນດາເຈົ້າໜ້າທີ່ກ່າວໃນວັນອັງຄານ
ມື້ນີ້ວ່າ ການຊ່ອຍເຫລືອດັ່ງກ່າວຈະມີຮວມທັງການຂະຫຍາຍການຮັບປະກັນເງິນກູ້ຢືມ
ແລະໂຄງການຮັບປະກັນດ້ານການຄ້າຕ່າງໆ. ທະນາຄານຍີ່ປຸ່ນກໍອາດຈະຮັບປະກັນເງິນ
ກູ້ຢືມຂອງລັດຖະບານໄທ ບາງສ່ວນເຊ່ນກັນ.
ພວກບໍລິສັດໃຫຍ່ໆຂອງຍີ່ປຸ່ນ ທີ່ຮວມທັງບໍລິສັດຜະລິດລົດໂຕໂຢຕາ ລົດຮອນດາແລະ
ບໍລິສັດ Sony ມີໂຮງງານຜະລິດທີ່ສໍາຄັນໃນໄທ ຊຶ່ງບາງສ່ວນຢູ່ໃນເຂດອຸດສາຫະກໍາ
ຫລາຍແຫ່ງທາງພາກເໜືອຂອງບາງກອກ ທີ່ໄດ້ຖືກນໍ້າຖ້ວມ ຈາກອຸທົກກະໄພຄັ້ງຮ້າຍ
ແຮງທີ່ສຸດໃນຮອບ50 ປີຜ່ານມາ.
ບໍລິສັດໂຕໂຢຕາປະກາດໃຫ້ຮູ້ໃນສັບປະດານີ້ວ່າ ຕົນກໍາລັງຕັດການຜະລິດລົດຂອງ
ຕົນລົງໃນຍີ່ປຸ່ນ ຍ້ອນການຢຸດສະງັກໃນການສົ່ງຊິ້ນສ່ວນໄປຈາກໄທ ຂະນະທີ່ບໍລິສັດ
ຜະລິດລົດຮອນດາກ່າວວ່າ ໂຮງງານປະກອບລົດຂອງຕົນໃນໄທກໍາລັງຖືກນໍ້າຖ້ວມ.
