ແນວໂຮມຂອງຊາວອາເມຣິກັນເຊື້ອສາຍເອເຊຍ ຫຼາຍກວ່າ 100 ກຸ່ມ ໄດ້ຮຽກຮ້ອງໃຫ້ 2 ພະແນກການລັດຖະບານການກາງສືບສວນສອບສວນ 3 ມະຫາວິທະຍາໄລໂດ່ງດັງຂອງ ສະຫະລັດທີ່ເອີ້ນວ່າ Ivy League ທີ່ກີດກັບການຮັບເອົານັກສຶກສາອາເມຣິກັນເຊື້ອສາຍ ເອເຊຍ ໃນຂັ້ນຕອນການບັນຈຸເປັນນັກສຶກສານັ້ນ.
ແນວໂຮມຂອງຊາວອາເມຣິກັນເຊື້ອສາຍເອເຊຍເພື່ອການສຶກສາໄດ້ສົ່ງເອກກະສານຮ້ອງ ທຸກໄປເຖິງພະແນກສິດທິມະນຸດຂອງກະຊວງສຶກສາ ແລະກະຊວງຍຸຕິທຳສະຫະລັດຮຽກ ຮ້ອງໃຫ້ທຳການສືບສວນສອບສວນ ມະຫາວິທະຍາໄລ Brown, Dartmouth College ແລະມະຫາວິທະຍາໄລ Yale.
ຂໍ້ຄວາມໃນການຮ້ອງທຸກນີ້ແມ່ນກ່າວຫາວ່າ ຈຳນວນເປີເຊັນຂອງນັກສຶກສາອາເມຣິກັນເຊື້ອ ສາຍເອເຊຍ ຂອງມະຫາວິທະຍາໄລ Yale ນັ້ນ ແມ່ນບໍ່ໄດ້ປ່ຽນແປງໃນຮອບ 20 ປີ ຜ່ານມາ ແລະສຳຫຼັບ Dartmouth College ແມ່ນພາຍໃນຮອບ 10 ປີ ຜ່ານມາ ເພາະຍ້ອນໂຄຕ້າ ດ້ານຜິວພັນ ແລະຂອບເຂດຈຳກັດ ທີ່ໄດ້ສາງຄວາມເສຍຫາຍຮ້າຍແຮງຕໍ່ພວກນັກສຶກສາ ອາເມຣິກັນເຊື້ອສາຍເອເຊຍ.
ແນວໂຮມກ່າວວ່າ ຈຳນວນເປີເຊັນຍັງບໍ່ຂະຫຍັບຂະຫຍາຍເລີຍ ເຖິງແມ່ນວ່າຈຳນວນຂອງນັກສຶກສາທີ່ມີຄຸນສົມບັດທີ່ສາມາດເຂົ້າຮຽນໃນສະຖາບັນນີ້ໄດ້ມີ “ເພີ້ມຂຶ້ນຢ່າງຫລວງ ຫຼາຍ” ໃນຮອບ 2 ທົດສະວັດກໍຕາມ.
ແນວໂຮມອາເມຣິກັນເຊື້ອສາຍເອເຊຍ ຕ້ອງການໃຫ້ຫ້ອງການລັດຖະບານກາງທີ່ກ່າວມານີ້ ກຳກັບໃຫ້ສະຖາບັນທີ່ກ່າວມາ ໃຫ້ທຳການຍົກເລີກກົດລະບຽບນີ້ ແລະໃຫ້ທຳການຮັບເອົາພວກທີ່ມາສະມັກນັ້ນ ຕາມຄວາມຮູ້ຄວາມສາມາດຂອງພວກກ່ຽວ.
ໃນການຕອບຮັບຕໍ່ການຮ້ອງທຸກນີ້ ມະຫາວິທະຍາໄລ Yale ກ່າວວ່າ ການມີຄະແນນສູງນັ້ນ “ບໍ່ແມ່ນສິ່ງດຽວທີ່ຈະເປັນເຄື່ອງຕັດສິນໃນການຮັບເຂົ້າມາສຶກສາໃນສະຖາບັນຂອງຕົນ” ສ່ວນ Dartmouth College ກ່າວອະທິບາຍວ່າ “ຕົນນັ້ນໄດ້ພິຈາລະນາທັງໝົດໃນການເປັນຜູ້ຄົນ ເວລາກວດສອບແລະພິຈາລະນາຮັບເອົານັກສຶກສານັ້ນ.”
