ຈໍານວນເສດຖີ ຢູ່ໃນເຂດເອເຊຍປາຊີຟິກ ໄດ້ເພີ້ມຂຶ້ນຢ່າງ ຫຼວງຫຼາຍເປັນ 3 ລ້ານຄົນໃນປີກາຍນີ້ແລະນັບເປັນເທື່ອ ທຳອິດ ທີ່ເຂດດັ່ງກ່າວ ມີຈຳນວນເສດຖີ ທໍ່ກັນກັບຢູໂຣບ.
ລາຍງານໃໝ່ສະບັບນຶ່ງ ຂອງບໍລິສັດຄຸ້ມຄອງ ຄວາມຮັ່ງມີ ຂອງໂລກ Merill Lynch ແລະບໍລິສັດທີ່ປຶກສາ Capge- mini ແຈ້ງວ່າ ຈຳນວນພວກທີ່ມີລາຍໄດ້ໃນລະດັບເສດຖີ ຢູ່ໃນເຂດເອເຊຍປາຊີຟິກໄດ້ເພີ້ມຂຶ້ນຫຼາຍກວ່າ 25% ໃນ ປີກາຍນີ້. ລາຍງານນີ້ ຕີຄໍານິຍາມ ຂອງເສດຖີເຫຼົ່ານີ້ວ່າ ເປັນຜູ້ມີຊັບສິນ ທີ່ລົງທຶນໄດ້ ຢ່າງນ້ອຍ 1 ລ້ານໂດລາ.
ລາຍງານເວົ້າວ່າ ຍີ່ປຸ່ນເປັນປະເທດທີ່ມີເສດຖີຫຼາຍທີ່ສຸດ ຢູ່ໃນຂົງເຂດ ຄືມີຫຼາຍກວ່າເຄິ່ງນຶ່ງຂອງຈຳນວນທັງໝົດ ຕິດຕາມໂດຍຈີນ ແລະອອສເຕຣເລຍ.
ຮົງກົງ ເປັນເຂດທີ່ມີເສດຖີເພີ້ມຂຶ້ນ ໃນຈໍານວນສ່ວນຮ້ອຍທີ່ສູງທີ່ສຸດ ໃນປີກາຍນີ້ ຄືເພີ້ມ ຂຶ້ນຫຼາຍກວ່າ 104%.
ແຕ່ການສຶກສານີ້ ທຳນາຍວ່າ ຈີນແລະອິນເດຍ ຈະເປັນແນວໜ້າໃນການເຕີບໂຕຂອງ ຂົງເຂດນີ້ ທີ່ມີທ່າທາງວ່າ ຈະລື່ນກາຍເສດຖະກິດຂອງໂລກ ໃນປີ 2010 ແລະ 2011.
ນັກວິເຄາະຄົນນຶ່ງ ຂອງບໍລິສັດ Capgemini ເວົ້າວ່າ ເຂດເອເຊຍປາຊີຟິກ ໄດ້ພິສູດໃຫ້ ເຫັນວ່າ ເປັນເຂດທີ່ສາມາດ ຟື້ນໂຕຄືນໄດ້ໄວທີ່ສຸດ ຈາກການຊັກຊ້າລົງຂອງເສດຖະກິດ ໂລກ.
