ລິ້ງ ສຳຫລັບເຂົ້າຫາ

ໄພ​ແຫ້ງ​ແລ້ງ​ກຳລັງ​​ຄຸກ​ຄາມ​ຕໍ່ ​ການ​ຜະລິດ​ເຂົ້າ​ໃນ​ເອເຊຍອາຄະເນ

  • Dara Baccam

ໄພ​ແຫ້ງ​ແລ້ງ​ໃນ​ຂົງ​ເຂດ​ເອ​ເຊຍ​ຕາ​ເວັນ​ອອກສຽງ​ໃຕ້​ກຳລັງ​ເປັນ ໄພ​ຄຸກ​ຄາມ​ຕໍ່​ການ​ຜະລິດ​ເຂົ້າ​ໃນ​ກຳປູ​ເຈຍ ​ແລະ​ໄທ ຊຶ່ງ​ເປັນ​ປະ​ເທດ​ທ່ີ​ສົ່ງ​​ເຂົ້າ​ອອກ​ໄປ​ຂາຍ​ຕ່າງປະ​ເທດ​ລາຍ​ໃຫຍ່​ທ່ີ​ສຸດ​ ຂອງ​ໂລກ. ຄວາມ​ເປັນ​ຫ່ວງ​ກ່ຽວ​ກັບ​ການ​ຜະລິດ​​ເຂົ້າ​ນີ້ ​ມີ​ຂຶ້ນ​ໃນ​ຂະນະ​ທ່ີ​ລາຄາ​ເຂົ້າ​ລຸດ​ລົງ​ຕ່ຳສຸດ ​ໃນ​ຮອບ​ສອງ​ປິ​ຜ່ານ​ມາ ສົ່ງ​ຜົນ​ກະທົບແກ່​ລາຍໄດ້​ຂອງ​ພວກ​ກະສິກອນ. ຢ່າງ​ໃດ​ກໍ​ຕາມ ພວກ​ຊ່ຽວຊານ​ດ້ານ​ຕະຫລາດກ່າວ​ວ່າ ລາຄາ​ເຂົ້າ​ໃນ​ຂົງ​ເຂດ​ຄວນ​ຈະ​ຟື້ນ​ໂຕ​ຄືນ​ ໃນ​ຂະນະ​ທ່ີສະບຽງ​ເຂົ້າ​ມີ​ໜ້ອຍລົງ​ ​​ແລະ ວ່າການ​ຜະລິດ​ເຂົ້າ​ໃນ​ເອ​ເຊຍ ໂດຍ​ລວມ​ແລ້ວ​ ​ແມ່ນຈະ​ເພີ່ມ​ຂຶ້ນ.

ການ​ຂາດ​ແຄນ​ນ້ຳ​ຝົນ​ໃນ​ກຳປູ​ເຈຍ​ແລະ​ໄທ ​ໄດ້ເຮັດ​ໃຫ້​ຜົນ​ເກັບ​ກ່ຽວ​ເຂົ້າ​ຊຸດ​ນີ້ ລຸດ​ລົງ​ຫລາຍ​ເຖິງ 40 ​ເປີ​ເຊັນ. ຕາມ​ທຳ​ມະ​ດາ​ນັ້ນ ພວກ​ຊາວນາພາກັນ​ເກັບ​ກ່ຽວ​ເຂົ້າ​ຊຸດ​ທຳ​ອິດ​ໃນ​ເດືອນ​ສິງຫາ ​ແລະຊຸດ​ທີ​ສອງ ຫລືເຂົ້າ​ນາປີນັ້ນ​ ໃນເດືອນ​ຕຸລາ.

ທ່ີ​ປະ​ເທດ​ໄທ ລັດຖະບານ​ມີ​ຄວາມ​ເປັນ​ຫ່ວງ​ວ່າການໃຊ້​ນ້ຳຈາກລະບົບ ຊົນລະປະທານ ​ຫົດນາ​ແທນ​ນ້ຳຝົນ ຈະ​ເຮັດ​ໃຫ້​ນ້ຳທີ່​ມີ​ໜ້ອຍ​ຢູ່​ແລ້ວນັ້ນ ​ລ່ອຍ​ຫລໍ​ລົງ​ໄປ​ອີກ.

ທ່ານ​ສຸພະ​ວຸດ ​ໄຊ​ເຊື້ອ ຊຶ່ງ​ເປັນ​ຜູ້ອຳນວຍການ​ຝ່າຍ​ບໍລິການຄຸ້ມ​ຄອງ​ແລະ​ຫົວໜ້າ​ຝ່າຍຄົ້ນຄວ້າ ຂອງ​ບໍລິ​ວັດ​ຫລັກ​ຊັບ ພັດທຣາ ກ່າວ​ວ່າ:

“ທາງ​ລັດຖະບານ​ໄດ້​ບອກ​ໃຫ້​ພວກ​ຊາວ​ນາ ​ເລື່ອນ​ເວລາ​ໃນ​ການ​ປູກ​ເຂົ້ານາປີ ອອກ​ໄປ​ໃຫ້​ຊ້າ​ກ່ວາ​ເກົ່າ​ແລ້ວ ​ແລະ​ນັ້ນໝາຍ​ເຖິງ​ວ່າ ການ​ປູກ​ເຂົ້າ ການ​ເກັບ​ກ່ຽວ​ ​ແມ່ນ​ຈະ​ລວມກັນ​ສຸມ​ໃສ່​ໃນ​ເດືອນ​ພະຈິກ. ບັດ​ນີ້ ຖ້າ​ຫາກ​ມີ​ການ​ເຊື່ອ​ກັນ​ໃນ​ທົ່ວ​ໂລກ​ວ່າ ມີ​ສະບຽງ​ເຂົ້າ​ໃນ​ປະລິມານ ຫລວງຫລາຍ​ແລ້ວ ລາຄາ​ເຂົ້າກໍ​ຈະ​ຖື​ກກົດ​ລົງ​ຫລາຍ​ຂຶ້ນ​ຕື່ມ. ​ເວລາ​ນັ້ນ​ແຫລະ ພວກ​ຊາວນາ​ໄທ​ກໍ​ຈະ​ຕ້ອງໄດ້​ຮັບ​ຜົນ​ກະທົບ​ໜັກ ທັງ​ໃນ​ແງ່​ລາຄາ ​ແລະ​ປະລິມານ​ເຂົ້າ.”

ທ່ານ​ສຸພະ​ວຸດກ່າວ​ວ່າ ​ເຖິງ​ແມ່ນ​ວ່າ ​ໂດຍ​ລວມ​ແລ້ວ ​ເສດຖະກິດ​ຂອງ​ໄທ​ໄດ້​ຟື້ນ​ໂຕ​ຄືນ ຈາກ​ວິ​ກິດ​ການ​ດ້ານ​ການ​ເງິນ​ຂອງ​ໂລກ ​ແລະ​ຄວາມ​ວຸ້ນວາຍ​ທາງ​ການ​ເມືອງ​ພາ​ໃນ​ປະ​ເທດ​ຫວ່າງ​ໄວໆ​ມາ​ນີ້ ​ແລ້ວ​ກໍ​ຕາມ ​ແຕ່​ວ່າ​ພາກສ່ວນ​ການ​ກະ​ເສດ​ຂອງ​ໄທ​ກໍ​ຍັງ​ໄດ້​ຮັບ​ຄວາມ​ເສຍ​ຫາຍຢູ່.

ໃນ​ເດືອນ​ພຶດສະພາແລ້ວ​ນີ້ ລາຄາ​ເຂົ້າ​ຂອງໄທ ຊຶ່ງ​ເປັນມາດຕະຖານ​ຂອງ​ເອ​ເຊຍນັ້ນ ​ໄດ້ຕົກລົງ​ສູ່​ລະດັບ​ຕ່ຳສຸດ​ໃນ​ຮອບ 2 ປີຜ່ານ​ມາ ຫລັງຈາກ​ຄວາມ​ຮຽກຮ້ອງ​ຕ້ອງການ​ເຂົ້າ​ຈາກ​ຕ່າງປະ​ເທດ​ ລຸດ​ລົງ.

ໃນ​ເດືອນ​ພຶດສະພາ​ ທາງ​ການ​ໄທ​ໄດ້​ປັບ​ການ​ຊ່ອຍ​ເຫລືອເກື້ອກູນຂອງ ລັດຖະບານ ໂດຍ​ໄດ້ສະ​ເໜີ​ລາຄາ​ເຂົ້າ​ທ່ີ​ຮັບປະກັນໃຫ້ ແກ່​ພວກ​ຊາວ ໄຮ່​ຊາວນາ.

ແຕ່​ທ່ານ​ສັນ​ໄຊ ຣັດຕະນານົນ ປະທານສະມາຄົມໂຮງສີ​ເຂົ້າ​ໄທ ກ່າວ​ວ່າ ການ​ຊ່ອຍ​ເຫລືອ​ຂອງ​ລັດຖະບານ​ທ່ີ​ວ່າ​ນີ້​ແມ່ນ​ບໍ່​ພຽງພໍ

/// ສຽງ​ພາສາ​ໄທ ///

ທ່ານ​ສັນ​ໄຊ​ເວົ້າ​ວ່າ ລາຄາ​ທ່ີ​ຮັບປະກັນ​ໃຫ້​ໃນ​ປັດຈຸບັນ​ນີ້ ​ແມ່ນ​ພຽງພໍແຕ່​ສຳລັບ​ຕົ້ນ​ທຶນ​ຂອງ​ຊາວນາ​ເທົ່າ​ນັ້ນ ​ເພາະວ່າ​ເຂົາ​ເຈົ້າໄດ້​ຮັບ​ຜົນ​ເກັບ​ກ່ຽວ​ຕ່ຳ​ຫລາຍ ຍ້ອນໄພ​ແຫ້ງແລ້ງ. ດັ່ງ​ນັ້ນ ​ມັນ​ຈຶ່ງກະທົບກະ​ເທືອ​ນ ລາຍ​ໄດ້​ຂອງ​ເຂົາ​ເຈົ້າ ຊຶ່ງ​ທ່ານ​ກ່າວ​ວ່າ ພວກ​ຊາວນາ​ບໍ່​ໄດ້​ກຳ​ໄລ​ຫຍັງ​ໝົດ.

ບັນດາ​ນັກວິ​ເຄາະ​ຕະຫລາດ​ດ້ານການ​ກະ​ເສດ​ກ່າວ​ວ່າ ລາຄາ​ເຂົ້າ​ຄວນ​ຈະ​ສູງຂຶ້ນ​ ໃນ​ຂະນະ​ທ່ີ​ຕະຫລາດ​ຮູ້ສຶກເຖິງຜົນ​ກະທົບ​ຈາກ​ໄພ​ແຫ້ງ​ແລ້ງ.

ທ່ານ​ສັນ​ໄຊ ກ່າວ​ວ່າ ພວກ​ກະສິກອນ​ກຳລັງ​ພາກັນ​ປູກ​ໝາກສາລີແລະ​ ອ້ອຍ​ຫລາຍ​ຂຶ້ນ ເພື່ອ​ຕັດ​ຄ່າ​ເສຍ​ຫາຍ​ຂອງ​ເຂົາ​ເຈົ້າ​ລົງ​ ຈາກການ​ເກັບ ​ກ່ຽວ​ເຂົ້າ​ທ່ີ​ບໍ່​ໄດ້​ຮັບ​ຜົນ​ດີ​ນັ້ນ ​ແລະ​ທ່ານ​ກ່າວ​ຕໍ່​ໄປ​ວ່າ ມັນ​ຈະ​ໃຊ້​ເວລາ​ຕື່ມ​ອີກ 1 ​ປີຫລື 2 ປີ ກ່ອນ​ທີ່​ພວກຊາວ​ກະສິກອນ​ຈະ​ພາກັນ​ກັບ​ຄືນ​ໄປປູກ​ເຂົ້າ​ອີກ ເວລາ​ໃດ​ລາຄາ​ເຂົ້າ​ດີ​ຂຶ້ນຄືນ ​ແຕ່ເຂົ້າ​ທີ່ລັດຖະບານຊື້​ຈາກ​ປະຊາຊົນ​ເພື່ອເກັບສຳຮອງ​ໄວ້​ ​ສາມາດ​ທົດ​ແທນ​ເຂົ້າ​ທ່ີ​ຂາດ​ໄປ​ນັ້ນໄດ້.

ເຖິງ​ຢ່າງ​ໃດ​ກໍ​ດີ ການ​ສົ່ງ​ອອກ​ເຂົ້າຂອງໄທ ທ່ີກວມ​ເປັນ​ປະມານ 1 ສ່ວນ 3 ຂອງ​ການ​ສົ່ງ​ອອກ​ເຂົ້າທັງ​ໝົດຂອງ​ໂລກ​ນັ້ນ ຄາດ​ວ່າ​ຈະ​ລຸດ ລົງ​ຫລາຍ​ເຖິງ 1 ລ້ານ​ໂຕນ​ໃນ​ປີ​ນີ້ ຊຶ່ງ​ອາດ​ຈະສົ່ງ​ຜົນ​ກະທົບ​ແກ່​ພວກ ປະ​ເທດ​ທ່ີ​ສັ່ງ​ຊື້ເຂົ້າ​ຈາກ​ຕ່າງປະ​ເທດ​ນັ້ນ​ໄດ້.

ທ່ານ Rex Estoperez ​ໂຄສົກ​ປະຈຳ​ອົງການ​ອາຫານ​ແຫ່ງ​ຊາດ​ຂອງ ຟີ​ລິບ​ປິນ ຊຶ່ງ​ເປັນ​ປະ​ເທດທ່ີ​ສັ່ງ​ຊື້​ເຂົ້າ​ຫລາຍ​ທ່ີ​ສຸດ​ໃນ​ເອ​ເຊຍ ມີ​ຄວາມ​ເຫັນ​ວ່າ​:

“​ແນ່ນອນ​ທີ່​ສຸດ​ວ່າ ມັນຈະ​ກະທົບ​ປະ​ເທດ​ຟີ​ລິບ​ປີນ​ໃນ​ເລື່ອງ​ເຂົ້າ ​ແຕ່ ເຮົາ​ກໍ​ຮູ້​ດີ​ວ່າ ​ໄທ​ເປັນ​ພຽງ​ປະ​ເທດ​ນື່ງ​ໃນ​ຫລາຍໆ​ປະ​ເທດ​ທີ່​ສົ່ງ​ເຂົ້າ​ໃຫ້​ ຟີ​ລິບ​ປີນ ​ແລະ​ເມື່ອ​ປີຜ່ານມາ​ນີ້ ພວກ​ເຮົາ​ໄດ້​ເປີດ​ໃຫ້​ມີ​ການ​ປະມູນ​ສົ່ງ​ເຂົ້າມາ​ໃຫ້​ພວກ​ເຮົາ​ໃນ​ເດືອນ​ທັນວາ ​ແລະ​ປະ​ເທດ​ທີ່​ຂາຍ​ເຂົ້າລາຍ ໃຫຍ່​ໃຫ້​ພວກ​ເຮົາ ​ເວລາ​ນັ້ນ ​ແມ່ນ​ຫວຽດນາມ.”

ທ່ານ Estoperez ກ່າວ​ວ່າ ຟີ​ລິບ​ປິນຊື້​ເຂົ້າ​ຈາກ 6 ປະ​ເທດ ​ແຕ່​ຕາບ​ໃດ​ທ່ີ​ບໍ່​ມີ​ໄພ​ຫາຍຍະນະ​ທາງ​ດິນ​ຟ້າ​ອາກາດເກີດ​ຂຶ້ນ​ອີກ ຟີ​ລິບ​ປິນກໍ​ບໍ່ ຄວນ​ຈະມີ​ບັນຫາ​ໃດໆໃນ​ການ​ຫາ​ເຂົ້າ​ມາ​ໄດ້​ ພຽງພໍ​ກັບ​ຄວາມ​ຕ້ອງການ​ໃນ​ປີ​ນີ້.

ໃນ​ປີ 2008 ດິນ​ຟ້າ​ອາກາດ​ບໍ່​ດີ ​ແລະ​ປະລິມານຜົນ​ເກັບ​ກ່ຽວ​ເຂົ້າ​ຢູ່ໃນ ​ລະດັບ​ຕ່ຳ​ ​ໄດ້​ພາ​ໃຫ້​ລາຄາ​ເຂົ້າ​ຖີບໂຕ​ສູງ​ຂຶ້ນ​ກາຍ 1000 ດອນ​ລາຕໍ່​ໂຕນ ​ແລະພວກ​ປະ​ເທດ​ສົ່ງ​ອອກ​ເຂົ້າ ໄດ້​ພາກັນຈຳກັດ​ການ​ຂາຍເຂົ້າ ຂອງ​ຕົນ​ ໄປ​ຍັງ​ຕ່າງປະ​ເທດ​.

ໃນ​ອີກ​ດ້ານ​ນື່ງນັ້ນ ທ່ານນາງ Concepcion Calpe ນັກ​ເສດຖະ ສາດອາວຸ​ໂສ​ປະຈຳ​ອົງການອາຫານ​ແລະ​ການ​ກະ​ເສດ​ຂອງ​ສະຫະປະ ຊາ​ຊາດ ກ່າວ​ວ່າ ໃນ​ຂະນະ​ທ່ີ​ໄພ​ແຫ້ງ​ແລ້ງ​ໄດ້​ເຮັດ​ໃຫ້​ຜົນ​ເກັບ​ກ່ຽວ​ເຂົ້າຂອງ​ກຳປູເຈຍ​ ລົດ​ລົງ 10 ​ເປີ​ເຊັນ ຈາກ​ລະດັບ​ທີ່​ຄາດໝາຍ​ໄວ້ ​ແລະ​ຂອງ​ໄທ​ ລົດ​ລົງ​ປະມານ 6 ​ເປີ​ເຊັນ ​ແຕ່​ຜົນເກັບ​ກ່ຽວ​ເຂົ້າ​ໃນ​ຂົງ ​ເຂດ​ເອ​ເຊຍ​ທັງ​ໝົດ ຈະ​ດີ​ຂຶ້ນ​ກວ່າ​ໃນ​ປີ 2009 ຊຶ່ງ​ທ່ານ​ນາງ Calpe ກ່າວ​ວ່າ:

“ທີ່​ປະ​ເທດອິນ​ໂດ​ເນ​ເຊຍ​ນັ້ນ ​ເຖິງ​ແມ່ນ​ວ່າ​ພວກ​ຊາວນາ​ໄດ້​ມີ​ການ​ເລິ່ມ ຕົ້ນບໍ່​ດີ ​ແລະ​ໄດ້​ຮັບ​ຜົນ​ກະທົບ​ຈາກ​ໄພ​ແຫ້ງ​ແລ້ງ​ກໍ​ຕາມ ​ແຕ່​ເຂົາ​ເຈົ້າກໍ​ຍັງ​ຈະເກັບ​ກ່ຽວເຂົ້າໄດ້​ຫລາຍ​ຂຶ້ນ. ທີ່​ອິນ​ເດຍ ​ພວກ​ເຮົາ​ກໍ​ຄາດ​ຄະ​ເນ​ວ່າ ຈະ​ມີ​ການ​ຟື້ນ​ໂຕ​ຄືນຢ່າງ​ແຂງ​ແຮງ​ຈາກ​ການ​ເກັບ​ກ່ຽວ​ທີ່​ໄດ້ຜົນ​ຕ່ຳ ໃນ​ປີ​ກາຍ​ນີ້ ຍ້ອນ​ລະດູ​ມອນ​ສູນ​ທີ່​ຜິດປົກກະຕິ​ນັ້ນ. ​ແລະ​ຈີນ​ກໍ​ຈະ ຜະລິດເຂົ້າ​ໄດ້ຫລາຍ​ຂື້ນຄື​ກັນ ​ເຊ່ນ​ດຽວກັບບັງ​ກລາ​ເດ​ສ. ສະ​ນັ້ນ ຈຶ່ງ​ສະຫລູ​ບ​ໄດ້​ວ່າ ພວກ​ປະ​ເທດ​ຜະລິດເຂົ້າລາຍ​ໃຫຍ່​ເຫລົ່າ​ນີ້ ຈະ​ໄດ້​ຮັບ​ຜົນ​ເກັບ​ກ່ຽວ​ຫລາຍ​ຂື້ນ​ ໃນ​ປີ 2010 ນີ້.”

ທ່ານ​ນາງກ່າວ​ຕື່ມວ່າ ເມື່ອ​ຜົນ​ເກັບ​ກ່ຽວ​ໄດ້​ຫລາຍ​ຂຶ້ນ​ ແລະຂະນະ​ດຽວ​ກັນ ກໍມີ​ເຂົ້າ​ຢ່າງ​ຫລວງຫລາຍ​ໃນ​ຄັງ​ເຂົ້າ​ສຳຮອງ​ຂອງ​ລັດຖະບານ ກໍ​ໝາຍຄວາມ​ວ່າ​ຈະມີ​ການ​ສ່ຽງ​ນ້ອຍ​ລົງ​ ຕໍ່​ການທ່ີ​ຈະ​ຂາດ​ແຄນ​ເຂົ້າ​ກິນ ຫລື​ວ່າ​ລາຄາ​ເຂົ້າຈະ​ຖີບ​ໂຕ​ສູງ​ຂຶ້ນ​ນັ້ນ.

ຢ່າງ​ໃດ​ກໍ​ຕາມ ທ່ານ​ນາງ​ກ່າວ​ຕໍ່​ໄປ​ວ່າ ​ໄພ​ແຫ້ງ​ແລ້ງ​ທ່ີ​ສົ່ງ​ຜົນ​ກະທົບ​ຕໍ່​ກຳປູ​ເຈຍ​ແລະ​ໄທ ອາດ​ຈະ​ສ້າງຄວາມລຳບາກເດືອດຮ້ອນຫລາຍຂຶ້ນ ​ໃຫ້​ແກ່​ພວກ​ກະສິກອນລາຍ​ນ້ອຍ ​ແລະ​ພວກ​ຊາວນາ​ຄວນ​ຈະ​ຫັນ​ໄປປູກ​ພື​ດຢ່າງ​ອຶ່ນຫລາຍໆ​ຢ່າງ ເພື່ອ​ວ່າ​ເຂົາ​ເຈົ້າ​ຈະບໍ່​ຕ້ອງ​ໄດ້​ອາ​ໄສ​ແຕ່ເຂົ້າ ຢ່າງດຽວ​ເທົ່າ​ນັ້ນ.

XS
SM
MD
LG