ລິ້ງ ສຳຫລັບເຂົ້າຫາ

ເຂດເອເຊຍ ມີມະຫາເສດຖີ ຫຼາຍກວ່າ ແຫ່ງອື່ນໆ ໃນໂລກ

  • ທອງປານ ເທບວົງສາ
  • ສິງ ບູຣົມມະວົງ

ຮ້ານຄ້າແຫ່ງນຶ່ງທີ່ປັກກິ່ງ ປະເທດຈີນ ທີ່ມະຫາເສດຖີຊາວຈີນເປັນເຈົ້າຂອງ

ຈໍານວນ​ມະຫາ​ເສດຖີໃ​ນຂົງ​ເຂດ​ເອ​ເຊຍໄດ້​ລໍ້າ​ໜ້າ​ຈໍານວນ​ມະ​ຫາ​ເສດຖີ​ໃນ ອາ​ເມ​ຣິກາ​ເໜືອ​ເປັນ​ເທື່ອ​ທໍາ​ອິດ​ຈາກ​ສະຖິຕິເມື່ອປີຜ່ານມາ ​ແຕ່​ຈໍານວນ​ຊັບ ສິນ​ທັງໝົດຂອງ​ພວກ​ຄົນ​ຮັ່ງມີ​ທີ່​ສຸດໃນໂລກ​ໄດ້​ລົດ​ຕໍ່າລົງ ​ໃນ​ການ​ປະ​ເຊີນ​ກັບສະພາບຄວາມ​ບໍ່​ແນ່ນອນ​ຂອງ​ເສດຖະກິດ​ໂລກ​ທີ່​ເປັນ​ໄປ​ຢູ່​ໃນ​ຂະນະ​ນີ້.

ລາຍ​ງານ​ຫຼ້າສຸດ​ກ່ຽວ​ກັບ​ຄວາມ​ຮັ່ງມີ​ໃນ​ໂລກ​ຫຼື World Wealth Report ເວົ້າວ່າ ຢູ່​ໃນ​ຂົງ​ເຂດ​ເອ​ເຊຍ-ປາຊິ​ຟິກ ​ເປັນ​ຖິ່ນ​ຢູ່​ອາໄສ​ຂອງ​ພວກ​ມະຫາ ​ເສດ​ຖີຈໍານວນ 3 ລ້ານ ສາມ​ຮ້ອຍ​ເຈັດ​ສິບ​ພັນ​ຄົນ ທີ່​ມີ​ເງິນ 1 ລ້ານ​ໂດ ລາ ຫຼືຫຼາຍກວ່າ​ນັ້ນ ​ເພື່ອ​ລົງທຶນ ຊຶ່ງ​ເພີ່​ມຂຶ້ນ 1.6 ​ເປີ​ເຊັນ​ ຈາກ​ປີ​ກ່ອນ. ຂົງ​ເຂດ​ອາ​ເມ​ຣິກາ​ເໜືອ​ຢູ່​ໃນ​ອັນ​ດັບ​ສອງ ຄືມີ​ຈໍານວນມະຫາ​ເສດຖີ 3 ລ້ານສາມ​ຮ້ອຍ​ຫ້າ​ສິບ​ພັນ​ຄົນ ຫຼຸດລົງ​ນຶ່ງ​ເປີ​ເຊັນ​ກວ່າ​ໆ​ຈາກ​ປີ​ກ່ອນ. ສ່ວນ ​ໃນ​ພາກ​ພື້ນ​ຢູ​ໂຣບນັ້ນ ມີ​ຈໍານວນ​ມະຫາ​ເສດ​ຖີຢູ່ 3 ລ້ານ ນຶ່ງ​ຮ້ອຍ​ເຈັດ​ສິບ​ພັນ​ຄົນ.

ລາຍ​ງານ​ປະຈໍາປີ​ດັ່ງກ່າວພົບ​ວ່າ ​ມະຫາ​ເສດຖີ​ຂອງ​ໂລກ​ຍັງ​ຢູ່​ໃນຈໍານວນ ສະໝໍ່າສະເໝີ ຄື​ 11 ລ້ານ ຄົນ ​ແຕ່​ຊັບ​ສິນໂດຍລວມຂອງ​ພວກ​ເຂົາ​ເຈົ້າ ທັງ​ໝົດ​ໄດ້​ຕົກ​ຕໍ່າລົງ 1.7 ​ເປີ​ເຊັນ ​ໃນ​ປີ 2011 ​ເປັນ 42 ພັນ​ຕື້​ໂດ​ລາ ຍ້ອນ​ໜີ້​ສິນ​ຂອງ​ພວກ​ປະ​ເທດ​ໃຊ້​ເງິນ​ຢູ​ໂຣທີ່​ເປັນ​ໄປ​ຢູ່​ໃນ​ເວລາ​ນີ້ ​ແລະ​ສະ ພາບ​ການ​ເສດຖະກິດ​ສະຫະລັດ​ທີ່​ຍັງດີ້ນຮົນ​ຢູ່​ນັ້ນ.

ຂົງ​ເຂດ​ອາ​ເມຣິກາ​ເໜືອ​ຍັງ​ຄົງ​ເປັນ​ເຂດ​ຮັ່ງມີ​ທີ່​ສຸດ​ຂອງ​ໂລກ ຄື​ມີ​ຊັບ​ສິນ ລວມທັງ​ໝົດ 11 ພັນ​ 400 ຕື້​ໂດ​ລາ ສົມ​ທຽບ​ກັບ 10 ພັນ​ 700 ຕື້​ໂດ​ລາ​ໃນ​ຂົງເຂດ​ເອ​ເຊຍ​ປາຊິ​ຟິກ ​ແລະ 10 ພັນ​ 100 ຕື້​ໂດ​ລາ​ໃນ​ຂົງ​ເຂດ ຢູ​ໂຣບ. ພາກ​ຕາ​ເວັນ​ອອກກາງ​ເປັນ​ຂົງ​ເຂດ​ດຽວ​ເ​ທົ່ານັ້ນ ທີ່​ບັນດາ​ມະຫາ​ເສດຖີມີ​ຊັບ​ສິນ​ເພີ່ມ​ຂຶ້ນ ຄືເພີ່ມ​ຂຶ້ນຈາກ 700 ຕື້​ໂດ​ລາເປັນ 1 ພັນ 700​ຕື້​ໂດ​ລາ.

ຈໍານວນ​ປະຊາຊົນ​ທີ່​ມີ​ຊັ​ບສິນ​ມູນ​ຄ່າ 30 ລ້ານ​ໂດ​ລາ ຫຼືຫຼາຍກວ່າ​ນັ້ນ ​ເພື່ອ​ໄວ້​ລົງທຶນ ພົບວ່າ​ຈຳນວນຂອງ​ພວກ​ເຂົາ​ເ​ຈົ້າລົດ​ຕໍ່າລົງ 2.5 ​ເປີ​ເຊັນ ​ເປັນ 100,000 ຄົນ ​ໃນ​ຂະນະ​ທີ່​ຄວາມ​ຮັ່ງມີ​ຮວມຂອງ​ພວກ​ເຂົາ​ເຈົ້າຫົດ​ຕົວ​ລົງໄປ ປະມານ 5 ​ເປີ​ເຊັນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG