ການຕໍ່ສູ້ກັບໂຣກໄຂ້ຍຸງໃນເອເຊຍ ແມ່ນກວມເອົາຫລາຍກວ່າ 20 ປະເທດ ຢູ່ພາຍໃນຂົງເຂດເອເຊຍຕາເວັນອອກສຽງໃຕ້ ເອເຊຍໃຕ້ ເອເຊຍຕາເວັນອອກ ແລະໃນພາກຕາເວັນຕົກຂອງມະຫາສະໝຸດປາຊີຟິກ. ໃນແຕ່ລະປີ ປະຊາ ຊົນໃນຈໍານວນຫລາຍກວ່າ 2 ລ້ານຄົນ ຢູ່ໃນຄວາມສ່ຽງທີ່ຈະເຈັບປ່ວຍເປັນໂຣກນີ້.
ຂົງເຂດເອເຊຍ ກວມເອົາຫລາຍກວ່າ 60 ເປີເຊັນຂອງປະຊາກອນໂລກທັງໝົດທີ່ຕົກຢູ່ໃນສະພາບສ່ຽງຕໍ່ການຕິດເຊື້ອໂຣກດັ່ງກ່າວ ໂດຍຈຸດໃຫຍ່ທີ່ສຸດ ກໍແມ່ນ ອິນເດຍ ມຽນມາ Bangladesh. ອິນໂດເນເຊຍ ແລະປາປົວນີວກີເນຍ.
ແຕ່ບັນດາເຈົ້າໜ້າທີ່ອົງການອະນາໄມໂລກ ຊີ້ໄປໃສ່ຮ່ອງຮອຍທີ່ໜ້າຮ້ອນໃຈຕ່າງໆ ທີ່
ສະແດງໃຫ້ເຫັນວ່າ ຢາປະສົມຊະນິດນຶ່ງທີ່ໃຊ້ກັນຢູ່ໃນປັດຈຸບັນນີ້ ທີ່ອິງໃສ່ຢາ
artemisinin ຊຶ່ງມີຕົ້ນຕໍມາຈາກສະໜຸນໄພຈີນຊະນິດນຶ່ງນັ້ນ ກໍາລັງສູນເສຍພະລັງຕ້ານ
ທານ ກັບເຊື້ອພະຍາດໂຣກໄຂ້ຍຸງນັ້ນ.
ໂດຍສ່ວນໃຫຍ່ແລ້ວ ນາຍແພດຈະເອົາຢາ artemisinin ນີ້ໃຫ້ພວກຄົນປ່ວຍເປັນໂຣກ
ໄຂ້ຍຸງກິນ ຄວບຄູ່ກັນໄປກັບຢາອື່ນໆ ແທນທີ່ຈະໃຊ້ຢານີ້ແຕ່ແນວດຽວ ໃນຄວາມພະຍາ
ຍາມເພື່ອຮັກສາພະລັງຂອງຢານີ້ໄວ້ ເພື່ອໃຫ້ມີປະສິດທິພາບ ໃນໄລຍະຍາວນັ້ນ.
ທ່ານນາງ Eva Maria Christophel ເຈົ້າໜ້າທີ່ອົງການອະນາໄມໂລກທີ່ຟີລິບປິນ ກ່າວ
ວ່າ ຮ່ອງຮອຍຕ່າງໆຂອງການຕໍ່ຕ້ານຢານີ້ ໃນເຂດລຸ່ມແມ່ນໍ້າຂອງ ຢູ່ເລາະຕາມຊາຍແດນ
ໄທ-ກໍາປູເຈຍ ແລະໃນມຽນມານັ້ນ ໄດ້ສ້າງຄວາມເປັນຫ່ວງກັງວົນຂຶ້ນພາຍໃນປະຊາຄົມ
ການແພດ ຊຶ່ງທ່ານນາງ Eva Christophel ກ່າວຊີ້ແຈງດັ່ງນີ້:
“ບ່ອນທີ່ພວກເຮົາເປັນຫ່ວງນໍາຫລາຍອີ່ຫລີ ກໍແມ່ນຢູ່ເຂດຊາຍແດນກໍາປູເຈຍ-
ໄທ. ມັນຈະສ້າງຄວາມຫາຍຍະນະ ຖ້າອາການຕ້ານທານຢາຢູ່ໃນເຂດນັ້ນ ຫາກ
ແຜ່ຜາຍໄປຫາເຂດອື່ນ ເພາະວ່າ ເວລານີ້ ເຮົາບໍ່ມີຫຍັງເລີຍ ຖ້າຈະເວົ້າເຖິງ
ເລື້ອງຢຸກຢາໃໝ່ ທີ່ພັດທະນາຂຶ້ນມາໄວ້ ເພື່ອຮັບມືກັບໂຣກມາເລເຣຍນັ້ນ ຫລື
ເຖິງຖ້າວ່າ ກໍາລັງພັດທະນາຢູ່ ມັນກໍຈະໃຊ້ເວລາເປັນຫລາຍໆປີ ກ່ວາຈະນໍາ
ອອກມາໃຊ້ໄດ້. ສະນັ້ນ ພວກເຮົາແມ່ນກາງຕໍ່ອາໃສຫລາຍອີ່ຫລີນໍາວິທີປິ່ນປົວ
ທີ່ໃຊ້ຢາຫລາຍຢ່າງປະສົມປະສານກັນ ໂດຍອິງໃສ່ຢາ artemisinin ເປັນ ຫລັກນັ້ນ."
ອົງການອະນາໄມໂລກມີຄວາມເປັນຫ່ວງວ່າ ການຕໍ່ຕ້ານຢາທີ່ວ່ານີ້ ອາດສາມາດແຜ່ລາມອອກຈາກຂົງເຂດຊາຍແດນໄທ-ກໍາປູເຈຍ ໄປຮອດທະວີບອາຟຣິກາໄດ້ໃນທໍານອງແບບດຽວກັນກັບທີ່ເຄີຍເປັນມາແລ້ວ ກັບຢາຕໍ່ຕ້ານໄຂ້ມາເລເລຍຫລາຍຢ່າງ ເຊ່ນຢາ cloroquine ແລະຢາ sulfadoxine-pyrimethamine ໃນຊຸມປີ 1960 ແລະຊຸມປີ 1970 ນັ້ນ.
ໃນເດືອນກຸມພາປີ 2009 ອົງການອະນາໄມໂລກຢືນຢັນວ່າມີອາການຕ້ານທານ ຢາຕໍ່ຕ້ານ
ໂຣກໄຂ້ຍຸງນີ້ ໃນຂົງເຂດຊາຍແດນໄທ-ກໍາປູເຈຍນັ້ນ ແຕ່ໃນຫວ່າງໄວໆຜ່ານມານີ້ ການສຶກ
ສາຄົ້ນຄວ້າຂອງອົງການອະນາໄມໂລກ ພົບເຫັນວ່າ ພວກຄົນປ່ວຍ ໃນຈໍານວນຫລາຍເຖິງ
20 ເປີເຊັນ ໃນເຂດຊາຍແດນມຽນມາ-ໄທ ໄດ້ສະແດງໃຫ້ເຫັນຮ່ອງຮອຍຂອງເຊື້ອໂຣກໄຂ້
ຍຸງໃນເລືອດ ຫລັງຈາກໄດ້ຮັບການຮັກສາໂຣກນີ້ດ້ວຍຢາ artemisinin ຕາມປົກກະຕິ
ແລ້ວ. Dr. Delacollette ເວົ້າວ່າ:
“ພວກເຮົາໄດ້ສັງເຫດເຫັນ ເມື່ອຫລາຍປີມາແລ້ວວ່າ ຊ່ວງເວລາກ່ອນທີ່ເຊື້ອໂຣກ
ດັ່ງກ່າວ ຈະຫາຍໂຕໄປຈາກເລືອດນັ້ນ ແມ່ນດົນຂຶ້ນເລື້ອຍໆ. ຕາມທໍາມະດານັ້ນ
ເຊື້ອໂຣກດັ່ງກ່າວຈະຫາຍໄປພາຍໃນ 2 ມື້ຫລືໄວກວ່ານັ້ນ. ແລະພວກເຮົາກໍສັງ
ເກດເຫັນວ່າ ມີພວກຄົນປ່ວຍໃນສັດສ່ວນຫລາຍຂຶ້ນ ທີ່ມີເຊື້ອໂຣກໄຂ້ຍຸງ ຄືເຊື້ອ
ໂຣກໄຂ້ຍຸງທີ່ບໍ່ເໜ່ງຕິງ ຍັງມີຢູ່ໃນເລືອດຂອງເຂົາເຈົ້າ 2 ມື້ ຫລັງຈາກໄດ້ຮັບການ
ປິ່ນປົວດ້ວຍຢາ artemisinin ແລ້ວ ຊຶ່ງແຕ່ກ່ອນນັ້ນ ແມ່ນບໍ່ເຄີຍມີບັນຫາຈັກເທື່ອ.”
Dr. Delacollette ກ່າວວ່າ ອາການຕ້ານທານຢາທີ່ເພີ່ມທະວີຂຶ້ນນີ້ ພາກສ່ວນນຶ່ງແມ່ນມີ
ສາເຫດມາຈາກການຂາຍຢາທີ່ບໍ່ໄດ້ມາດຕະຖານ ແລະຢາປອມ. ໃນຫວ່າງບໍ່ເທົ່າໃດປີຜ່ານ
ມານີ້ ທາງເຈົ້າໜ້າທີ່ໄດ້ທໍາການປາບປາມພວກໂຮງງານຜະລິດຢາປອມຫລືຢາເຖື່ອນໃນຈີນ.
ໃນຂະນະດຽວກັນ ກໍໄດ້ມີການພົບເຫັນພວກຜະລິດຢາປອມ ຢູ່ໃນແຫ່ງອື່ນໆ ຮວມທັງຢູ່ໃນ ກໍາປູເຈຍ ແລະມຽນມາ.
ອົງການອະນາໄມໂລກກ່າວວ່າ ມີຮ່ອງຮອຍຫລາຍຢ່າງທີ່ສະແດງໃຫ້ເຫັນອາການຕ້ານທານ
ຢາປາບເຊື້ອພະຍາດໄຂ້ຍຸງນີ້ ຢູ່ໃນຫລາຍໆເຂດໃນພາກໃຕ້ຂອງປະເທດຫວຽດນາມ ຕລອດ
ທັງຢູ່ເລາະຕາມຊາຍແດນຈີນ ຕິດກັບມຽນມານັ້ນນໍາ.
