ທີ່ກຸງຈາກາຕາ ລາຄາໝາກເຜັດແດງປີນີ້ແມ່ນແພງຂຶ້ນ
ເກືອບ 2 ເທົ່າຂອງປີກາຍນີ້. ໝາກເຜັດແດງເປັນສ່ວນ
ປະກອບທີ່ສໍາຄັນໃນອາຫານເກືອບທຸກໆຢ່າງຂອງອິນໂດເນເຊຍ.
ຜູ້ບໍລິໂພກບາງຄົນ ເຊ່ນນາງ Jarwati ຊຶ່ງໄປຊື້ເຂົ້າປາອາ
ຫານໃນຕະຫລາດກ່າວວ່າ ພວກເຂົາເຈົ້າກໍາລັງປັບໂຕເຂົ້າ ກັບລາຄາທີ່ແພງຂຶ້ນນັ້ນ.
ນາງ Jarwati ເວົ້າວ່າ ພວກຜູ້ຄົນທີ່ເຄີຍຊື້ໝາກເຜັດນຶ່ງ ກິໂລ ມາບັດນີ້ ຊື້ແຕ່ພຽງເຄິ່ງກິໂລເທົ່ານັ້ນ.
ລາຄາເຂົ້າປາອາຫານກໍາລັງແພງຂຶ້ນ ຢູ່ໃນພາກສ່ວນໃຫຍ່ຂອງຂົງເຂດເອເຊຍ ແລະຄາດວ່າລາຄາສິນຄ້າວັດຖຸດິບຈາກອອສເຕຣເລຍກໍຈະສູງຂຶ້ນເຊ່ນກັນ ໃນຂະນະທີ່ຄວາມຮຽກຮ້ອງຕ້ອງການຍັງແຂງແຮງຢູ່ຄືເກົ່າ ແຕ່ຜົນຜະລິດລຸດ ນ້ອຍລົງ ຍ້ອນໄພນໍ້າຖ້ວມ.
ຢູ່ໃນຫລາຍໆເຂດໃນປະເທດຈີນ ລາຄາຊັບສິນທີ່ດິນກໍາລັງຖີບໂຕສູງຂຶ້ນຢ່າງໄວ. ທ່ານ Zhu ເປັນເຈົ້າຂອງເຮືອນຫ້ອງແຖວເກົ່າຫລັງນຶ່ງ ໃນກຸງປັກກິງ ຊຶ່ງເວລານີ້ຂາຍໄດ້ໃນລາຄາ ຕາລາງແມັດນຶ່ງ 43 ພັນຢວນ ຊຶ່ງເທົ່າ ກັບ 6500 ໂດລາສະຫະລັດ.
ທ່ານ Zhu ກ່າວວ່າ “ຂ້າພະເຈົ້າຄຶດວ່າ ການປ່ຽນແປງໃນລາຄາຊັບສິນນີ້ ເປັນເລື້ອງໃຫຍ່ທີ່ສຸດ. ໃນຕອນທໍາອິດນັ້ນ ລາຄາເຮືອນຫ້ອງແຖວ ຫລື apartment ຫ້ອງນຶ່ງຂາຍກັນພຽງແຕ່ບໍ່ເທົ່າໃດພັນຢວນຕໍ່ 1 ຕາລາງແມັດ ຫລື ບໍ່ເທົ່າໃດຮ້ອຍເທົ່ານັ້ນ ແຕ່ມາບັດນີ້ ລາຄາເປັນໝື່ນຫລືເປັນແສນຢວນ ຕໍ່ 1 ຕາລາງແມັດ.”
ພວກນັກເສດຖະສາດບາງຄົນພາກັນມີຄວາມເປັນຫ່ວງວ່າ ສະພາວະເງິນເຟີ້ອາດສາມາດຄ່ອຍໆລົດຜ່ອນອໍານາດຊື້ຂອງພວກຊົນຊັ້ນກາງທີ່ກໍາລັງໂຜ່ໂຕຂຶ້ນມາໃນເອເຊຍນັ້ນໄດ້. ແຕ່ທ່ານ Nicholas Cashmore ນັກວິເຄາະດ້ານຫລັກຊັບກ່າວວ່າ ໃນສ່ວນໃຫຍ່ຂອງເອເຊຍ ສະພາວະເງິນເຟີ້ແມ່ນສະທ້ອນໃຫ້ເຫັນລາຍໄດ້ທີ່ສູງຂຶ້ນ ຊຶ່ງທ່ານ Cashmore ກ່າວດັ່ງນີ້:
"ຂ້າພະເຈົ້າຄິດວ່າ ມີຫລາຍໆປະເທດຢູ່ໃນໂລກທຸກມື້ນີ້ ທີ່ມັກຢາກໃຫ້ມີເງິນເຟີ້
ຄືເງິນເຟີ້ແບບບໍ່ຮຸນແຮງປານໃດນັ້ນມັກຈະເປັນການດເພາະວ່າມັນສະແດງໃຫ້
ຮູ້ວ່າຄວາມຮຽກຮ້ອງຕ້ອງການສິນຄ້າແລະສະແດງໃຫ້ເຫັນເຖິງການເສດຖະກິດ
ທີ່ກໍາລັງເຕີບໂຕຂຶ້ນ "
SB: ທ່ານ Cashmore ກ່າວວ່າ ບາງປະເທດທີ່ເສດຖະກິດກໍາລັງ ຈະເລີນເຕີບໂຕຂຶ້ນ ເຊ່ນອິນໂດເນເຊຍນັ້ນ ແມ່ນສາມາດປ່ອຍໃຫ້ອັດຕາເງິນເຟີ້ ຖີບຂຶ້ນໄດ້ເຖິງ 5 ສ່ວນຮ້ອຍ.
ແຕ່ວ່າ ແມ່ນແຕ່ຢູ່ໃນບັນດາປະເທດທີ່ເສດຖະກິດກໍາລັງເຕີບໂຕຂຶ້ນຢ່າງແຂງແຮງ ເຊ່ນອິນໂດເນເຊຍ ອິນເດຍ ແລະຈີນ ເປັນຕົ້ນນັ້ນ ລາຄາເຂົ້າປາອາຫານທ່ີແພງຂຶ້ນ ກໍສ້າງຄວາມຍາກລໍາບາກຕ່າງໆໃຫ້ໄດ້. ທ່ານ Nagesh Kumar ນັກເສດຖະສາດປະຈໍາສະຫະປະຊາຊາດທີ່ບາງກອກ ກ່າວວ່າ ໃນເອເຊຍ ປະຊາຊົນໃນຈໍານວນ 980 ລ້ານຄົນ ແມ່ນດໍາລົງຊີວິດຢູ່ກັບລາຍໄດ້ບໍ່ຮອດ 1 ໂດລາກັບ 25 ເຊັນຕໍ່ມື້ ແລະລາຍໄດ້ຂອງເຂົາເຈົ້າສ່ວນຫລາຍ ແມ່ນໃຊ້ສໍາລັບໄວ້ຊື້ນເຂົ້າປາອາຫານກິນ ຊຶ່ງທ່ານ Nagesh ກ່າວຕື່ມວ່າ:
"ປະຊາຊົນບາງຈໍານວນທີ່ມີຖານະສູງກ່ວາລະດັບຄວາມທຸກຈົນໜ້ອຍດຽວນັ້ນ
ກໍອາດຈະຖືກຜັກດັນໃຫ້ຕົກລົງໄປຢູ່ໃນລະດັບຄວາມທຸກຈົນຄືນອີກ ຍ້ອນລາ ອາຫານທີ່ກໍາລັງຖີບຕົວສູງຂຶ້ນນັ້ນ."
ໃນຫວ່າງບໍ່ເທົ່າໃດເດືອນຜ່ານມານີ້ ພວກທະນາຄານກາງໃນປະເທດຈີນ ອິນໂດເນເຊຍແລະໃນແຫ່ງອື່ນໆອີກ ໄດ້ຂຶ້ນອັດຕາດອກເບ້ຍເງິນກູ້ ເພື່ອພະຍາຍາມລົດຜ່ອນລາຄາສິນຄ້າທີ່ສູງຂຶ້ນນັ້ນ ຊຶ່ງພວກນັກເສດຖະສາດເວົ້າວ່າ ຄວາມພະຍາຍາມເຫລົ່ານີ້ ສາມາດເຮັດໃຫ້ການເຕີບໂຕຂອງເສດຖະກິດເອເຊຍ ຊ້າລົງໄດ້.
ລາຄາສິ່ງງຂອງທີ່ສູງຂຶ້ນ ໝາຍຄວາມວ່າ ພວກໂຮງຈັກໂຮງງານພາກັນຜະລິດສິນຄ້າຫລາຍຂຶ້ນ ຊຶ່ງນີ້ໝາຍຄວາມວ່າ ມີການເຕີບໂຕຂຶ້ນໃນເອເຊຍແລະໃນໂລກ ແຕ່ດັ່ງທີ່ທ່ານ Kumar ໃຫ້ຂໍ້ສັງເກດນັ້ນກໍແມ່ນວ່າ ລາຄາເຂົ້າປາອາຫານທີ່ຖີບໂຕສູງຂຶ້ນອາດຈະສ້າງຄວາມລໍາບາກຍາກແຄ້ນໃຫ້ແກ່ຜູ້ຄົນຈໍານວນຫລາຍ ແລະສ້າງບັນຫາຕຶ່ມຂຶ້ນໃຫ້ແກ່ພວກລັດຖະບານຂອງປະເທດຕ່າງໆເຊ່ນກັນ.
