ທີ່ກໍາປູເຈຍ ເດັກນ້ອຍອາຍຸປີປາຍຄົນນຶ່ງ ທີ່ຖືກພັດພາກຈາກພໍ່ແມ່ຍ້ອນໄພນໍ້າຖ້ວມຢ່າງ
ຂະໜານໃຫຍ່ຢູ່ໃນປະເທດນັ້ນ ຕ້ອງໄດ້ອາໄສລ້ຽງຊີບດ້ວຍນໍ້ານົມຈາກງົວ ເພາະວ່າຜູ້ທີ່
ລ້ຽງດູທາລົກຄົນນັ້ນບໍ່ມີເງິນ ທີ່ຈະຊື້ນົມຝຸ່ນມາລ້ຽງລາວ.
ຂ່າວການດີ້ນຮົນຕໍ່ສູ້ເພື່ອຍັງຊີບຂອງເດັກນ້ອຍຄົນນີ້ ໄດ້ປາກົດອອກມາເທື່ອທໍາອິດໃນ
ວັນຈັນວານນີ້ ໃນລາຍງານຂ່າວຂອງໂທລະພາບລັດຂອງຈີນຊ່ອງນຶ່ງ ທີ່ລາຍງານຈາກ
ແຂວງສຽມຣຽບຂອງກໍາປູເຈຍ ທີ່ເປັນສ່ວນນຶ່ງໃນຫລາຍໆເຂດອັນກ້ວາງໃຫຍ່ຂອງກໍາ
ປູເຈຍ ທີ່ຖືກຄຸກຄາມຍ້ອນໄພນໍ້າຖ້ວມ ມາເປັນເວລາຫລາຍເດືອນ ທີ່ຮ້າຍແຮງທີ່ສຸດໃນ
ເອເຊຍຕາເວັນອອກສຽງໃຕ້ ໃນຮອບເຄິ່ງສັດຕະວັດ. ຄວາມລໍາບາກຍາກແຄ້ນຂອງເດັກ
ຄົນນີ້ໄດ້ເລີ່ມຕົ້ນຂຶ້ນ ເວລາຜູ້ເປັນພໍ່ແມ່ໄດ້ພາກັນໄປຊອກວຽກເຮັດງານທໍາ ຢູ່ໃນປະເທດ
ໄທເພື່ອນບ້ານ ແລະປະລູກໄວ້ ໃຫ້ພໍ່ຕູ້ລ້ຽງ ຊຶ່ງຜູ້ກ່ຽວກໍທຸກຍາກເກີນກ່ວາທີ່ຈະມີເງິນ
ມາຊຶ້ນົມໃຫ້ຫລານກິນ.
ພາບໃນລາຍງານຂ່າວໂທລະພາບສະແດງໃຫ້ເຫັນເດັກຊາຍ ໄວ 20 ເດືອນຄົນນັ້ນ ຢືນ
ດູດນົມຈາກນົມງົວໂຕນຶ່ງ ຊຶ່ງເດັກຄົງໄດ້ເຫັນງົວນ້ອຍເຮັດແບບນັ້ນ ຈຶ່ງເຮັດຕາມ.
ພໍ່ຕູ້ຂອງເດັກກ່າວວ່າ ຫລານຂອງລາວໄດ້ເລີ່ມດູດນົມງົວມາໄດ້ສອງເດືອນແລ້ວ ແລະກໍ
ຍັງດູດຢູ່ຕໍ່ໄປເວລາທີ່ຢາກກິນນົມຂຶ້ນມາ ເຖິງແມ່ນວ່າງົວໂຕນັ້ນໄດ້ເຈັບເປັນເມື່ອບໍ່ນານ
ມານີ້. ພໍ່ຕູ້ເວົ້າວ່າ ລາວຫວັງວ່າລູກຊາຍກັບລູກໄພ້ຂອງລາວ ທີ່ເປັນພໍ່ແມ່ຂອງເດັກ ຈະ
ສາມາດກັບຄືນເມືອບ້ານ ໄດ້ໄວທີ່ສຸດເທົ່າທີ່ຈະໄວໄດ້ ເພື່ອລ້ຽງລູກຂອງຕົນ.
