ໃນວັນອາທິດມື້ນີ້ ນາຍົກລັດຖະມົນຕີໄທ ຍັງມອງສະພາບການໃນແງ່ດີວ່າ ນະຄອນ
ຫລວງ ບາງກອກຈະລອດພົ້ນຈາກຄວາມເສຍຫາຍໃດໆເພີ່ມຕື່ມອີກຈາກໄພນໍ້າຖ້ວມຄັ້ງ ຮ້າຍແຮງທີ່ສຸດໃນຮອບຫລາຍສິບປີ.
ນາຍົດລັດຖະມົນຕີໄທ ທ່ານນາງຢິ່ງລັກ ຊິນນະວັດ ໄດ້ຮ້ອງຂໍໃຫ້ເພື່ອນຮ່ວມຊາດທັງ
ຫລາຍຂອງທ່ານນາງ ຈົ່ງໝັ້ນໃຈໃນຄວາມສາມາດຂອງ ລັດຖະບານໃນການຮັບມືກັບໄພ
ນໍ້າຖ້ວມຄັ້ງນີ້ ເຖິງແມ່ນວ່ານໍ້າໄດ້ໄຫລຖ້ວມຄູກັ້ນນໍ້າບາງແຫ່ງໃນນະຄອນຫລວງບາງກອກ
ໃນວັນອາທິດມື້ນີ້ ກໍຕາມ.
ພວກເຂດເມືອງທາງພາກເໜືອຂອງບາງກອກຖືກນໍ້າຖ້ວມໃນວັນເສົາວານນີ້ ພ້ອມດ້ວຍ
ພື້ນທີ່ ນຶ່ງສ່ວນສາມໃນເຂດຊົນນະບົດນັ້ນນໍາ ຍ້ອນລະດັບນໍ້າ ທະເລທີ່ສູງ ໄດ້ຜັກດັນນໍ້າ
ຈາກອ່າວໄທ ໄຫລເຂົ້າໄປໃນແມ່ນໍ້າເຈົ້າພະຢາຂອງບາງກອກ. ຄາດວ່າລະດັບນໍ້າທີ່ສູງ
ຂຶ້ນນີ້ ຈະມີໄປເຖິງວັນຈັນ.
ພວກຕຶກອາຄານຕ່າງໆໃນໃຈກາງບາງກອກ ແມ່ນຖືກກັ້ນໄວ້ດ້ວຍຄູຖົງຂີ້ຊາຍຫລາຍໆ
ຊັ້ນ ແຕ່ນໍ້າທີ່ສູງຮອດຂໍ້ນ່ອງຈາກແມ່ນໍ້າເຈົ້າພະຍາໄດ້ໄຫລ ໄປຮອດເຂດຄຸ້ມພະລາດຊະວັງ
ຫລວງຫລືຫໍພະແກ້ວ ແລະສະຖານທ່ອງ ທ່ຽວທີ່ສໍາຄັນອື່ນໆ ຂອງບາງກອກ.
ພວກຊາວບາງກອກຫລາຍໝື່ນຄົນ ໄດ້ພາກັນຫລົບໜີຈາກເຂດນໍ້າຖ້ວມ ໂດຍທາງແພ ລົດ
ຕູ້ ລົດບັນທຸກທະຫານ ຫລືຍ່າງໄປ ມຸ້ງໜ້າໄປຍັງພື້ນ ທີ່ ທີ່ສູງກວ່າທາງເຂດໃຕ້ຂອງບາງ
ກອກ. ຫລາຍໆຄົນກໍໄດ້ອອກໄປທາງເຣືອບິນ.
ໄພນໍ້າຖ້ວມດັ່ງກ່າວທີ່ໄດ້ເລິ່ມຕົ້ນມາຕັ້ງແຕ່ເດືອນກໍລະກົດ ແລະຮ້າຍແຮງ ທີ່ສຸດໃນໄທໃນ
ຮອບ 50 ປີຜ່ານມາ ແມ່ນໄດ້ເອົາຊີວິດຜູ້ຄົນໄປແລ້ວຫລາຍກວ່າ 380 ຄົນ. ສ່ວນຜົນເສຍ
ຫາຍດ້ານວັດຖຸນັ້ນ ແມ່ນຍັງຕີລາຄາກັນບໍ່ທັນໄດ້.
ນາຍົກລັດຖະມົນຕີຢິ່ງລັກ ກ່າວໃນຄໍາຖະແຫລງຕໍ່ປະເທດຊາດປະຈໍາອາທິດທາງວິທະຍຸເມື່ອ
ວັນເສົາວານນີ້ວ່ານໍ້າຖ້ວມຈະເລິ່ມລົດລົງໃນອາທິດນີ້. ລະດັບນໍ້າໄດ້ລົດລົງແດ່ແລ້ວຢູ່ໃນເຂດ
ພາກກາງຂອງໄທ.
ກະຊວງປ້ອງກັນປະເທດສະຫະລັດກ່າວວ່າ ໄທໄດ້ຮ້ອງຂໍໃຫ້ເຮືອລົບສະຫະລັດລໍານຶ່ງ ປະຈໍາ
ຢູ່ທ່າເຮືອໃຫຍ່ແຫ່ງນຶ່ງຂອງໄທຢູ່ຕໍ່ໄປ ເພື່ອໃຫ້ຍົນ ເຮລິຄອບເຕີຂອງສະຫະລັດສອງລໍາ ໄດ້
ບິນສໍາຫລວດນໍ້າຖ້ວມ.
