ຈໍານວນຄົນເສຍຊີວິດກໍາລັງຖີບຕົວສູງຂຶ້ນນັບມື້ໃນຂົງເຂດເອເຊຍຕາເວັນ ອອກສຽງໃຕ້ ບ່ອນທີ່ມີປະຊາຊົນຫລາຍລ້ານຄົນຖືກກະທົບໂດຍໄພນໍ້າຖ້ວມ ຍ້ອນພາຍຸໃຕ້ຝຸ່ນທີ່ຮຸນ
ແຮງ ແລະຝົນຕົກໜັກເປັນປະວັດການ.
ເທົ່າເຖິງປັດຈຸບັນນີ້ ມີຜູ້ເສຍຊີວິດໄປແລ້ວຫລາຍຮ້ອຍຄົນໃນຟິລິບປິນ ໄທ ກໍາປູເຈຍ ແລະ
ຫວຽດນາມ.
ພວກເຈົ້າໜ້າທີ່ກໍາປູເຈຍກ່າວເມື່ອວັນຈັນມື້ນີ້ວ່າ ເປັນໄພນໍ້າຖ້ວມທີ່ຮ້າຍແຮງທີ່ສຸດໃນ
ຮອບ 11 ປີ ທີ່ເຮັດໃຫ້ປະຊາຊົນຫລາຍໆພັນ ຕ້ອງໄດ້ຫລົບໜີຈາກຖິ່ນຢູ່ອາໃສ ແລະ
ເສຍຊີວິດຫລາຍກວ່າ 200 ຄົນແລ້ວ ນັບຕັ້ງແຕ່ຕົ້ນເດືອນກັນຍາມາ.
ທ່ານ Gnim Wada ເຈົ້າໜ້າທີ່ຈັດການກັບໄພພິບັດຂອງກໍາປູເຈຍ ກ່າວວ່າ ບູລິມະສິດ
ຂອງລັດຖະບານໃນເວລານີ້ ກໍຄືຊ່ວຍເຫລືອປະຊາຊົນ ໃຫ້ຟື້ນຕົວຄືນມາຈາກໄພນໍ້າຖ້ວມ
ທີ່ຮ້າຍແຮງທີ່ສຸດ ທີ່ເຄີຍປະສົບມາ.
ສ່ວນທີ່ປະເທດໄທນັ້ນ ນາຍົກລັດຖະມົນຕີ ຢິ່ງລັກ ຊິນນະວັດ ກໍໄດ້ອອກຄໍາສັ່ງໃນວັນຈັນ
ມື້ນີ້ ໃຫ້ກົມກອງຕ່າງໆຂອງລັດຖະບານ ກຽມຍົກຍ້າຍ ປະຊາຊົນຈາກສິບຈັງຫວັດພາກ
ກາງຂອງໄທ. ຝົນລະດູມໍລະສຸມ ນໍ້າຖ້ວມ ແລະດິນເຈຶ່ອນ ໄດ້ເອົາຊີວິດຜູ້ຄົນໄປແລ້ວ
ຫລາຍກວ່າ 250 ຄົນໃນ ຣາດຊະອານາຈັກໄທ ນັບຕັ້ງແຕ່ເດືອນກໍລະກົດ ເປັນຕົ້ນມາ.
ເມື່ອວັນສຸກທີ່ຜ່ານມານີ້ ທ່ານນາງ ຮິລແລຣີ ຄຣິນຕັນ ລັດຖະມົນຕີຕ່າງປະເທດສະຫະລັດ ໄດ້ອອກຖະແຫລງການສະບັບນຶ່ງສະແດງຄວາມເສົ້າ ສະລົດໃຈ ໄປຍັງໝົດທຸກຄົນທີ່ສູນ
ເສຍໝູ່ເພື່ອນ ຄອບຄົວ ແລະຄົນຮັກ ແພງຂອງພວກເຂົາເຈົ້າໄປ ໃນຂົງເຂດເອເຊຍຕາເວັນ
ອອກສຽງໃຕ້ນັ້ນ. ທ່ານນາງຄຣິນຕັນກ່າວຍໍ້າວ່າ ສະຖານທູດສະຫະລັດທຸກແຫ່ງໃນຂົງ
ເຂດ ດັ່ງກ່າວ ກໍາລັງປະຕິບັດງານຮ່ວມກັບພວກເຈົ້າໜ້າທີ່ທ້ອງຖິ່ນ ແລະພວກອົງການ
ນາໆຊາດ ເພື່ອຊັ່ງຊາຕີລາຄາວ່າ ສະຫະລັດຈະສາມາດຊ່ວຍເຫລືອໄດ້ໃນວິທີໃດແດ່.
