ບັນດາລັດຖະມົນຕີການຕ່າງປະເທດຈາກທົ່ວຢູໂຣບ ແລະພາກພື້ນເອເຊຍ ກໍາລັງເນ້ນເຖິງ
ຄວາມຕ້ອງການເພື່ອໃຫ້ມີການຮ່ວມໄມ້ຮ່ວມມືກັນໃກ້ຊິດຂຶ້ນ ລະຫວ່າງພາກພື້ນຂອງເຂົາ
ເຈົ້າຫລັງຈາກທໍາການພົບປະຫາລືກັນມາເປັນເວລາ 2 ມື້ທີ່ປະເທດ Hungary ນັ້ນ.
ໃນຖະແຫລງການຮ່ວມບັ້ນສຸດທ້າຍຍາວ 21 ໜ້າເຈ້ຍໃນວັນອັງຄານວານນີ້ ພວກທີ່ປະກອບສ່ວນໃນການພົບປະຫາລືກັນລະຫວ່າງເອເຊຍຢູໂຣບໄດ້ເພ່ງເລັງໃສ່ບັນຫາທ້າທາຍຕ່າງໆດ້ານຄວາມປອດໄພທີ່ບໍ່ເຄີຍມີມາກ່ອນນັບແຕ່ເລື້ອງຄວາມປອດໄພໃນດ້ານອາຫານການກິນຕະຫຼອດໄປຮອດເລື້ອງອາຊະຍາກໍາທີ່ມີການຈັດຕັ້ງ.
ບັນດາເຈົ້າໜ້າທີ່ຈາກ 27 ປະເທດໃນຢູໂຣບ ແລະ 19 ປະເທດຈາກເອເຊຍ ຊຶ່ງເປັນຜູ້ຕາງໜ້າຂອງປະຊາຊົນຫລາຍກວ່າເຄິ່ງນຶ່ງຂອງຈໍານວນປະຊາກອນໂລກໄດ້ເຂົ້າຮ່ວມໃນກອງປະຊຸມດັ່ງກ່າວ ຊຶ່ງໄດ້ໄຂຂຶ້ນບາປີ ນັບແຕ່ປີ 1996 ເປັນຕົ້ນມາ.
ຖະແຫລງການບັ້ນສຸດທ້າຍເວົ້າເຖິງຄວາມຈຳເປັນສໍາລັບໝົດທຸກປະເທດທີ່ມາເຂົ້າຮ່ວມປະຊຸມໃຫ້ຖອດຖອນບົດຮຽນຈາກອຸບັດເຫດທີ່ເກີດຂຶ້ນໃນໂຮງໄຟຟ້ານີວເຄລຍ Fukushima ຂອງຍີ່ປຸ່ນນັ້ນ ແລະໃຫ້ປັບປຸງມາດຕະຖານຄວາມປອດໄພໃຫ້ດີຂຶ້ນໃນທຸກໆໂຮງໄຟຟ້ານີວເຄລຍນັ້ນ.
ພວກປະເທດເຫລົ່ານີ້ຍັງຮຽກຮ້ອງເຊ່ນກັນໃຫ້ມີການຮ່ວມມືກັນທີ່ໃກ້ຊິດຂຶ້ນໃນບັນດາປະເທດ
ທີ່ຕັ້ງຢູ່ເລາະຕາມແຄມແມ່ນໍ້າ Danube ແລະເຂດລຸ່ມແມ່ນໍ້າຂອງ ຊຶ່ງແມ່ນໍ້າທັງສອງຕ່າງກໍ
ໄຫຼຂ້າມຊາຍແດນຂອງຫຼາຍໆປະເທດແລະມີບັນຫາທ້າທາຍຕ່າງໆຄ້າຍຄືກັນສໍາລັບປະຊາ
ຊົນຢູ່ອາໄສຢູ່ຕາມແຄມຝັ່ງຂອງແມ່ນໍ້າທັງສອງນີ້.
