ຍີ່ປຸ່ນແລະເກົາຫຼີໃຕ້ຕ່າງກໍລາຍງານວ່າ ການຜະລິດດ້ານ
ອຸດສາຫະກໍາຂອງພວກຕົນໃນເດືອນຕຸລານັ້ນໄດ້ຊັກຊ້າລົງ
ຊຶ່ງເປັນການເນ້ນໜັກຄວາມເປັນຫ່ວງກັງວົນທີ່ວ່າ ການຟື້ນ
ໂຕຄືນຂອງເສດຖະກິດໂລກນັ້ນ ອາດອ່ອນກໍາລັງລົງ.
ລາຍງານທີ່ອອກມາໃນວັນອັງຄານມື້ນີ້ ເປັນຂີດໝາຍເດືອນ
ທີ 5 ລຽນຕິດໃນ ການຊັກຊ້າລົງຂອງຍີ່ປຸ່ນ ແລະເດືອນ
ທີ 3 ລຽນຕິດຂອງເກົາຫຼີໃຕ້. ຢ່າງໃດກໍຕາມ ການລຸດ
ຕໍ່າລົງ 1.8% ໃນຍີ່ປຸ່ນນັ້ນ ກໍຍັງບໍ່ຮ້າຍແຮງເທົ່າກັບທີ່
ໄດ້ທໍານາຍໄວ້ ແລະທາງເຈົ້າໜ້າທີ່ກໍໄດ້ທໍານາຍວ່າ ຈະມີ
ການຕ່າວປີ້ນ ຫລືບໍ່ກໍມີການເຕີບໂຕໃນລະດັບປານກາງພາຍໃນສອງເດືອນຂ້າງໜ້ານີ້.
ສ່ວນຜົນຜະລິດດ້ານອຸດສາຫະກໍາຂອງເກົາຫຼີໃຕ້ ທີ່ຫຼຸດລົງ 4.2% ຈາກລະດັບຂອງ
ເດືອນກັນຍາທີ່ຜ່ານມານັ້ນ ແມ່ນຮ້າຍແຮງກ່ວາທີ່ທໍານາຍໄວ້ ແລະເປັນການຫຼຸດຕໍ່າລົງ
ຫລາຍທີ່ສຸດ ໃນໄລຍະເກືອບສອງປີ. ທາງການໄດ້ຖິ້ມໂທດໃສ່ປັດໄຈທາງລະດູການແລະ
ການສົ່ງອອກທີ່ອ່ອນແອກ່ວາທີ່ໄດ້ທໍານາຍໄວ້.
ໃນວັນອັງຄານມື້ນີ້ ຍີ່ປຸ່ນກໍໄດ້ລາຍງານເຊ່ນກັນວ່າ ອັດຕາຫວ່າງງານໄດ້ຖີບຂຶ້ນ ເລັກນ້ອຍ
ເປັນ 5.1% ສົມທຽບໃສ່ 5% ໃນເດືອນກັນຍາ ຊຶ່ງເປັນການເພີ່ມຂຶ້ນຄັ້ງແລກ ນັບຕັ້ງແຕ່
ເດືອນມິຖຸນາເປັນຕົ້ນມາ.
