ການຜະລິດຢາເສບຕິດທຽມ ເຊັ່ນຢາແອມເຟຕາມີນ ຫລືຢາບ້າ ແລະຢາກະຕຸ້ນອາລົມໃຫ້
ຈິດໃຈເບີກບານ ໃນຂົງເຂດເອເຊຍຕາເວັນອອກສຽງໃຕ້ ກໍາລັງແຜ່ລາມໄປຍັງຂົງເຂດໃໝ່
ຫລາຍແຫ່ງ ໂດຍສະເພາະແລ້ວ ກໍແມ່ນອິນໂດເນເຊຍ ມາເລເຊຍ ແລະກໍາປູເຈຍ ອີງຕາມ
ລາຍງານຈາກຫ້ອງການຢາເສບຕິດ ແລະອາຊະຍາກໍາຂອງອົງການສະຫະປະຊາຊາດ ຫລື
UNODC ທີ່ຖືກນໍາອອກເຜີຍແຜ່ໃນອາທິດແລ້ວນີ້.
ລາຍງາຍເວົ້າຕື່ມວ່າ ການຊົມໃຊ້ຢາກະຕຸ້ນປະສາດປະເພດແອມເຟຕາມີນ ໄດ້ຖີບຕົວສູງ
ຂຶ້ນຢ່າງໄວ ແລະການໃຊ້ຢາເສບຕິດປະເພດສັກໃສ່ ກໍກໍາລັງຂະຫຍາຍຕົວຂຶ້ນໄປນັບມື້
ພາໃຫ້ມີຄວາມເປັນຫ່ວງເພີ່ມຂຶ້ນວ່າ ຢາຈໍາພວກຈະຊ່ວຍແຜ່ຜາຍເຊື້ອເອັຊໄອວີ ແລະ
ໂຣກເອດສ໌ ອອກໄປອີກ.
ລາຍງານເວົ້າອີກວ່າ ການຈັບຍຶດ
ໄດ້ຢາບ້າ ທີ່ເອີ້ນວ່າ ເມຕໍາເຟ
ຕາມີນ ຫລືແອັມເຟຕາມີນ ໃນ
ຂົງເຂດເອເຊຍຕາເວັນອອກສຽງ
ໃຕ້ນັ້ນ ແມ່ນເພີ່ມຂຶ້ນຈາກ 32
ລ້ານເມັດໃນປີ 2008 ເປັນ
133 ລ້ານເມັດໃນປີ 2010.
ທ່ານ ແກຣີ ລູອິສ (Gary
Lewis) ຜູ້ຕ່າງໜ້າຫ້ອງການ
UNODC ປະຈໍາຂົງເຂດ ກ່າວ
ວ່າ ການຜະລິດຢາກະຕຸ້ນປະ
ສາດປະເພດຢາບ້າ ຢູ່ນອກ
ແຫລ່ງຜະລິດທີ່ມີມາແຕ່ໃດໆ ເຊັ່ນມຽນມານັ້ນ ແມ່ນກໍ່ໃຫ້ເກີດຄວາມເປັນຫ່ວງຂຶ້ນມາ.
ທ່ານລູອິສ ເວົ້າວ່າ: “ປັດຈຸບັນນີ້ ມີແຫລ່ງຜະລິດຢາບ້າຢູ່ຈີນ ຢູ່ຟິລິບປິນ ຊຶ່ງພວກປະເທດເຫລົ່ານີ້ກໍາລັງໂຜ່ໂຕຂຶ້ນມາເປັນຜູ້ຜະລິດ. ທີ່ຈິງແລ້ວ ສໍາລັບອິນໂດເນເຊຍນັ້ນ ພວກເຮົາເປັນຫ່ວງເທົ່າໆກັບພວກເຈົ້າໜ້າທີ່ຢູ່ທີ່ນັ້ນ ຄືມັນກໍາລັງກາຍມາ ເປັນແຫລ່ງຢາກະຕຸ້ນອາລົມ ສໍາລັບຂົງເຂດ ນີ້ ໄປແລ້ວ.”
ແຕ່ທ່ານ ລູອິສ ກ່າວວ່າ ຍຸດທະສາດຕ່າງໆທີ່ຈະລົດຜ່ອນຢາເສບຕິດຜິດ ກົດໝາຍໃນໝູ່ປະຊາຄົມນັ້ນ ແມ່ນຈໍາເປັນຕ້ອງໄດ້ສຸມໃສ່ຄວາມເປັນຫ່ວງ ດ້ານສາທາລະນະສຸກ ແທນທີ່ຈະເປັນພວກນະໂຍບາຍຂອງອະດີດຜ່ານມາ ທີ່ນໍາພາໄປສູ່ອັນທີ່ເອີ້ນວ່າ “ສົງຄາມຢາເສບຕິດ” ນັ້ນ.
ທ່ານລູອິສກ່າວວ່າ: “ ໃນການຄວບຄຸມບັນຫາຢາເສບຕິດນັ້ນ ຂ້າພະເຈົ້າເຊື່ອວ່າ
ມັນໄດ້ຜົນຕະຫລອດໄລຍະ 10 ປີຜ່ານມາ. ປະໂຫຍກນຶ່ງ ທີ່ທ່ານຈະບໍ່ໄດ້ຍິນ
ຂ້າພະເຈົ້າເວົ້າອອກມາ ເພື່ອສະແດງຄວາມສະໜັບສະໜຸນ ນັ້ນກໍຄືປະໂຫຍກ
“ສົງຄາມຢາເສບຕິດ.” ຂ້າພະເຈົ້າບໍ່ເຊື່ອໃນແນວຄິດຂອງສົງຄາມຢາເສບຕິດ.
ຂ້າພະເຈົ້າຄິດວ່າ ມັນມີຫລາຍສິ່ງຫລາຍຢ່າງທີ່ເກີດຂຶ້ນ ທີ່ກ່ຽວຂ້ອງກັບປະ
ໂຫຍກນັ້ນ ທີ່ບໍ່ຊ່ວຍຫຍັງເລີຍຕໍ່ສາທາລະນະສຸກ ຫລືຕໍ່ຄວາມໝັ້ນຄົງຂອງ
ສາທາລະນະຊົນ.”
ລັດຖະບານໄທຊຸດໃໝ່ຂອງນາຍົກລັດຖະມົນຕີ ຍິ່ງລັກ ຊິນນະວັດ ກ່າວວ່າ ຕົນຈະນໍາ
ເອົານະໂຍບາຍປາບປາມຢາເສບຕິດຜິດກົດໝາຍທີ່ເຄ່ງຄັດນັ້ນ ກັບຄືນມາໃຊ້ຢ່າງເຂັ້ມ
ງວດກວ່າເກົ່າ. ນະໂຍບາຍທີ່ວ່ານີ້ ແນເປົ້າໝາຍໃສ່ພວກແກ໊ງອາຊະຍາກໍາ ແລະເຄັ່ງ
ຄັດການຄ້າຂ້າມຊາຍແດນຫລາຍຂຶ້ນ ເພື່ອປ້ອງກັນບໍ່ໃຫ້ຢາເສບຕິດ ທີ່ຜະລິດຈາກໂຮງ
ງານໃນພາກຕາເວັນອອກຂອງມຽນມານັ້ນ ຫລັ່ງໄຫລເຂົ້າມາໄທໄດ້.
ໃນປີ 2003 ໄທຖືກຕໍາໜິຕິຕຽນຈາກນານາຊາດ ກ່ຽວກັບການປຸກລະດົມ ເຮັດສົງ
ຄາມຢາເສບຕິດ ໃນສະໄໝການດໍາລົງຕໍາແໜ່ງຂອງອະດີດນາຍົກລັດຖະມົນຕີທັກສິນ
ຊິນນະວັດ ຜູ້ເປັນອ້າຍຂອງທ່ານນາງຢິ່ງລັກ. ໃນລະຫວ່າງການກວາດລ້າງຄັ້ງນັ້ນ
ໄດ້ມີຜູ້ເສຍຊີວິດຫລາຍກວ່າ 3000 ຄົນ ແລະພວກກຸ່ມສິດທິກ່າວຫາພວກເຈົ້າໜ້າທີ່
ທີ່ກ່ຽວຂ້ອງວ່າ ອະນຸຍາດໃຫ້ມີການເຂັ່ນຂ້ານອກລະບົບຕຸລາການ. ທ່ານນາງຍິ່ງລັກ
ກ່າວວ່າ ນະໂຍທີ່ນໍາໃຊ້ຢູ່ໃນປັດຈຸບັນນີ້ ຈະສຸມໃສ່ການປິ່ນປົວເປັນຫລັກ.
ທ່ານ ວິລລຽມ ບຣາວຟິລດ໌ (William Brownfield)
ລັດຖະມົນຕີຊ່ວຍວ່າການຕ່າງປະເທດສະຫະລັດ ຊຶ່ງເປັນ
ຫົວໜ້າກົມຢາເສບຕິດນານາຊາດ ແລະກິດຈະການປະຕິ
ບັດກົດໝາຍ ບອກພວກຜູ້ສື່ຂ່າວຢູ່ບາງກອກວ່າ ການ
ປຸກລະດົມໃໝ່ ເພື່ອຕໍ່ຕ້ານການລັກລອບຄ້າຢາເສບຕິດນັ້ນ
ແມ່ນຈະຕ້ອງຖອດຖອນບົດຮຽນ ຈາກປະສົບປະການໃນ ຜ່ານມາ.
ທ່ານ ບຣາວຟິລດ໌ ກ່າວວ່າ “ກົດອັນນຶ່ງທີ່ແລເຫັນໄດ້
ວ່າ ພວກເຮົາໄດ້ຮຽນຮູ້ມາແລ້ວນັ້ນ ກໍຄືວ່າ ເພື່ອທີ່
ຈະໃຫ້ປະສົບຜົນສໍາເລັດໃນຄວາມພະຍາຍາມປາບ
ປາມການລັກລອບຄ້າຢາເສບຕິດໄດ້ນັ້ນ ເຮົາຕ້ອງ
ໄດ້ຮັບການສະໜັບສະໜຸນຈາກປະຊາຄົມ ແລະປະ
ຊາຊົນຂອງພວກເຮົາ ຕໍ່ຄວາມພະຍາຍາມດັ່ງກ່າວ
ນັ້ນ. ພວກເຂົາເຈົ້າເປັນພັນທະມິດຂອງພວກເຮົາ
ເພາະວ່າພວກເຂົາເຈົ້າເປັນຜູ້ຮັບເຄາະ ເວລາພວກ
ເຮົາປະສົບຄວາມລົ້ມແຫລວ. ເພາະສະນັ້ນ ຄວາມພະຍາຍາມໃດໆກໍຕາມທີ່ພວກ
ເຮົາຈະດໍາເນີນ ໃນຖານະເປັນປະຊາຄົມນານາຊາດ ເພື່ອປາບປາມໄພຂົ່ມຂູ່ ຂອງ
ຢາເສບຕິດນັ້ນ ແມ່ນຈະຕ້ອງໄດ້ກະທໍາໄປໃນແນວທາງທີ່ໃຫ້ຄວາມເຄົາລົບນັບຖື
ຕໍ່ສິດທິ ຄວາມຕ້ອງການ ຄວາມຫວັງ ແລະຄວາມມຸ້ງມາດປາດຖະໜາຂອງພວກ
ປະຊາຄົມ ທີ່ພວກເຮົາຮັບໃຊ້ນັ້ນ.”
ທ່ານ ບຣາວຟິລດ໌ ໄດ້ສະແດງ
ຄວາມເຫັນທີ່ພາໃຫ້ມີຄວາມຢ້ານ
ກົວຂຶ້ນມາ ວ່າ ມຽນມາອາດເປັນ
ເປົ້າໝາຍຂອງພວກແກ໊ງຄ້າຢາ
ເສບຕິດອີກຄັ້ງນຶ່ງ ຖ້າຫາກວ່າ
ບາດກ້າວຕ່າງໆ ທີ່ພວກເຈົ້າໜ້າ
ທີ່ໄດ້ຈັດຕັ້ງປະຕິບັດ ເພື່ອລົດ
ຜ່ອນການຜະລິດຢາຝິ່ນແລະ
ຜົງເຮໂຣອີນ ໃນອັຟການິສຖານ
ຊຶ່ງເວລານີ້ ເປັນປະເທດຜະລິດ
ລາຍໃຫຍ່ທີ່ສຸດຂອງໂລກນັ້ນ
ປະສົບຜົນສໍາເລັດໃນການເຮັດ
ໃຫ້ຜົນຜະລິດລຸດຕໍ່າລົງຢ່າງໄວນັ້ນ.
ທ່ານ ບຣາວຟິລດ໌ ກ່າວວ່າ
“ອັຟການິສຖານແມ່ນຈະ
ຕົກຢູ່ໃຕ້ຄວາມກົດດັນ
ຫລາຍຂຶ້ນນັບມື້ຈາກນາໆ
ຊາດ ເພື່ອໃຫ້ລົດປະລິມານການຜະລິດ ແລະການສົ່ງອອກພວກຢາເສບຕິດຜິດ
ກົດໝາຍຂອງຕົນນັ້ນ. ເມື່ອໃດທີ່ມັນເກີດຂຶ້ນ ແລະມັນກໍຈະເກີດຂຶ້ນແທ້ໆນັ້ນ ທີ່ນີ້
ພວກລັກລອບ ຄ້າຢາເສບຕິດກໍຈະໄປຊອກຫາປະເທດອື່ນ ເພື່ອຜະລິດແລະສົ່ງ
ອອກຢາເສບຕິດຕໍ່ໄປ ຊຶ່ງປະເທດທີ່ເໝາະສົມຫລາຍທີ່ສຸດໃນຂົງເຂດເອເຊຍ
ກໍຄືມຽນມານັ້ນເອງ.”
ເປັນທີ່ຮູ້ກັນດີຢູ່ແລ້ວວ່າ ບໍລິເວນຊາຍແດນຕິດຈອດກັນຂອງປະເທດມຽນມາ ໄທ ແລະ
ລາວນັ້ນ ເປັນເຂດທີ່ເອີ້ນກັນວ່າ “ສາມຫລ່ຽມຄໍາ” ເພາະເປັນແຫລ່ງຜະລິດຢາຝິ່ນແລະ
ຜົງເຮໂຣອີນ. ແຕ່ວ່າ ນັບຕັ້ງແຕ່ປີ 1992 ເປັນຕົ້ນມາ ອັຟການິສຖານແມ່ນໄດ້ກາຍມາ
ເປັນປະເທດຜະລິດຝິ່ນລາຍໃຫຍ່ທີ່ສຸດຂອງໂລກ ບົດບັງການຜະລິດໃນມຽນມາ.
ການລົດລົງຢ່າງໃຫຍ່ໃນປະລິມານການຜະລິດຝິ່ນຢູ່ໃນທົ່ວຂົງເຂດສາມລ່ຽມຄໍາ ສ່ວນໃຫຍ່
ແລ້ວ ແມ່ນເປັນຍ້ອນໂຄງການກໍາຈັດ ຖອນຮາກການປູກຝິ່ນ ແລະໂຄງການປູກພືດອື່ນ ທົດແທນ.
