ອົງການກອງທຶນສາກົນ IMF ກ່າວວ່າ ບັນດາປະເທດ ໃນເຂດເອເຊຍ ຈຳເປັນຕ້ອງ ໄດ້ທຳການ ປະຕິຮູບຢ່າງໃຫຍ່ ເພື່ອປົກປ້ອງ ເສດຖະກິດ ທີ່ຂັບດັນ ດ້ວຍການສົ່ງອອກ ຂອງພວກເຂົາເຈົ້າ ຈາກຄວາມຕ້ອງການສິນຄ້າ ທີ່ມີໜ້ອຍລົງ ຢູ່ໃນໂລກ ແລະເສີມຂະຫຍາຍ ການອຸບປະໂພກ ບໍລິໂພກ ພາຍໃນປະເທດ. ອົງການ IMF ໄດ້ເພີ້ມ ການທຳນາຍ ກ່ຽວກັບ ການຂະຫຍາຍໂຕ ຂອງເສດຖະກິດເອເຊຍ ສຳລັບປີ 2010 ນີ້ ຂຶ້ນເປັນ 7.1% ໃນລາຍງານ ທີ່ນຳອອກເຜີຍແຜ່ ທີ່ນະຄອນຊຽງໄຮ້ ໃນວັນພະຫັດມື້ນີ້. ແຕ່ຂະນະດຽວກັນ ອົງການ IMF ກໍເຕືອນວ່າ ການຟື້ນໂຕຄືນ ຢ່າງເຂັ້ມແຂງ ຂອງຂົງເຂດເອເຊຍ ຈາກວິກິດການ ທາງດ້ານເສດຖະກິດນັ້ນ ຈະດຶງດູດເອົາ ການລົງທຶນຢ່າງໃຫຍ່ຫລວງ ຊຶ່ງຈະພາໃຫ້ ເສດຖະກິດ ຂະຫຍາຍໂຕ ແຮງໂພດ ແລະພາໃຫ້ ມີການສ່ຽງ ຕໍ່ການທີ່ຈະເກີດ ສະພາບເງິນເຟີ້ ແລະຊັບສິນ ຟອງສະບູ່ຂຶ້ນ. ລາຍງານສະບັບນີ້ ຮຽກຮ້ອງໃຫ້ ບັນດາປະເທດ ໃນເອເຊຍ ຊຸກຍູ້ການຄ້າ ພາຍໃນຂົງເຂດ ໃນກໍລະນີ ທີ່ການຟື້ນໂຕຄືນ ທີ່ບໍ່ແຂງແຮງ ຂອງເສດຖະກິດ ຢູ່ໃນບັນດາ ປະເທດຕາເວັນຕົກ ຫາກມີ ອັນເປັນໄປ. ມາດຕະການນຶ່ງ ທີ່ທາງອົງການ IMF ໄດ້ແນະນຳ ກໍຄືໃຫ້ປະເທດຕ່າງໆ ນຳໃຊ້ອັດຕາແລກປ່ຽນ ທີ່ບໍ່ຕາຍໂຕຫລາຍຂຶ້ນ ຊຶ່ງເຫັນໄດ້ຈະແຈ້ງວ່າ ເປັນການອ້າງອີງ ເຖິງການຕັດສິນໃຈ ຂອງປັກກິ່ງ ທີ່ຕັ້ງອັດຕາແລກປ່ຽນ ແບບຕາຍໂຕ ຂອງເງິນຢວນ ໃສ່ກັບເງິນໂດລາ ຂອງສະຫະລັດ ນັບແຕ່ປີ 2008 ເປັນຕົ້ນມາ.
ວັນເສົາ, ໒໗ ກໍລະກົດ ໒໐໒໔
