ບັນດາເຈົ້າໜ້າທີ່ດ້ານການທ່ອງທ່ຽວຂອງກຸ່ມອາຊຽນກໍາລັງ
ພົບປະກັນຢູ່ທີ່ກຸງພະນົມເປັນນະຄອນຫລວງຂອງກໍາປູເຈຍ
ເພື່ອທໍາການໂອ້ລົມສົນທະນາກັນກ່ຽວກັບວ່າຈະເຮັດວິທີໃດດີ ຈຶ່ງຈະໃຫ້ຂົງເຂດດັ່ງກ່າວກາຍ
ເປັນຈຸດໝາຍປາຍທາງລະດັບໂລກແຫ່ງນຶ່ງສໍາລັບພວກນັກທ່ອງທ່ຽວພາຍໃນປີ 2015 ນັ້ນ.
ນາຍົກລັດຖະມຸນຕີກໍາປູເຈຍ ທ່ານຮຸນແຊນ ກ່າວໃນວັນອັງຄານວານນີ້ວ່າຂົງເຂດເອເຊຍ
ຕາເວັນອອກສຽງໃຕ້ມີຄວາມສາມາດບົ່ມຊ້ອນທີ່ຈະກາຍເປັນຈຸດໝາຍປາຍທາງ ທີ່ມີການ
ແຂ່ງຂັນກັນສູງນັ້ນ ໂດຍອິງຕາມຄວາມຫລາກຫລາຍຂອງໂບຮານວັດຖຸທາງດ້ານວັດທະນະ
ທໍາ ແລະອັນທີ່ທ່ານເອີ້ນວ່າ ແຫລ່ງຊັບພະຍາກອນທໍາມະຊາດຢ່າງມາກມາຍນັ້ນ. ທ່ານຮຸນ
ແຊນ ກ່າວເຊ່ນນີ້ຕໍ່ກອງປະຊຸມວ່າດ້ວຍການທ່ອງທ່ຽວກຸ່ມອາຊຽນ ຊຶ່ງໄດ້ໄຂຂຶ້ນໃນວັນເສົາ
ຜ່ານມານີ້ ແລະຈະດໍາເນີນໄປຈົນຮອດວັນສຸກສັບປະດານີ້.
ທ່ານຮຸນແຊນ ກ່າວວ່າ ທ່ານຫວັງວ່າກອງປະຊຸມນີ້ຈະສົ່ງເສີມພວກອຸດສາຫະກໍາທີ່ພົວພັນ
ກັບການທ່ອງທ່ຽວ ໂດຍມີວັດຖຸປະສົງແນໃສ່ເສີມຂະຫຍາຍການພັດທະນາດ້ານເສດຖະກິດ
ແລະລົດຜ່ອນຄວາມທຸກຈົນລົງໃນປະເທດຂອງທ່ານແລະໃນແຫ່ງອື່ນໆອີກຢູ່ໃນຂົງເຂດ.
ພວກທີ່ມາຮ່ວມກອງປະຊຸມນີ້ ແມ່ນຮວມທັງພວກເຈົ້າໜ້າທີ່ຝ່າຍທ່ອງທ່ຽວຈາກ 10 ປະ
ເທດສະມາຊິກຂອງກຸ່ມອາຊຽນ ແລະພວກປະເທດພາຄີ ຢູ່ໃນຂົງເຂດຈາກຈີນ ຍີ່ປຸ່ນ ເກົາ
ຫລີໃຕ້ ອິນເດຍ ແລະຣັດເຊຍ. ພວກຜູ້ຊື້ແລະຜູ້ຂາຍຈໍານວນຫລາຍຮ້ອຍບໍລິສັດຈາກວົງ
ການອຸດສາຫະກໍາ ການທ່ອງທ່ຽວນາໆຊາດ ກໍມາຮ່ວມໃນກອງປະຊຸມນີ້ເຊ່ນກັນ.
