ລັດຖະມົນຕີການຕ່າງປະເທດອິນໂດເນເຊຍ ກ່າວວ່າ ຕີມໍ ຕາເວັນອອກຫລືຕີມໍ ເລສເຕ ຈະສະມັກເຂົ້າເປັນສະມາຊິກຂອງສະມາຄົມກຸ່ມປະເທດເອເຊຍຕາເວັນອອກສຽງໃຕ້ ຫລື
ASEAN ຢ່າງເປັນທາງການ ໃນປີນີ້.
ທ່ານ Marty Natalegawa ໄດ້ສະແດງຄວາມຍິນດີນໍາການຈະເອົາບາດກ້າວດັ່ງກ່າວ
ຂອງຕີມໍ ເລສເຕ ໃນກອງປະຊຸມຂອງບັນດາລັດຖະມົນຕີການຕ່າງປະເທດຂອງກຸ່ມ
ASEAN ແລະກ່າວວ່າ ມັນສໍາຄັນຢ່າງຍິ່ງໃນດ້ານສັນຍາລັກທີ່ການຂໍເຂົ້າເປັນສະມາຊິກ
ຂອງຕີມໍ ເລສເຕ ຈະມີຂຶ້ນໃນຂະນະທີ່ອິນໂດເນເຊຍເປັນປະທານຂອງກຸ່ມຈັດຕັ້ງປະຈໍາ
ຂົງເຂດທີ່ວ່ານີ້. ອິນໂດເນເຊຍ ໄດ້ຄອບຄອງຕີມໍ ເລສເຕ ເປັນເວລາ 24 ປີ ກ່ອນທີ່
ອະດີດຫົວເມືອງຂຶ້ນຂອງປອກຕຸຍການແຫ່ງນັ້ນປະກາດເປັນເອກກະລາດໃນປີ 2002.
ໃນການກ່າວໃນວັນອາທິດວານນີ້ ທີ່ເກາະຕາກອາກາດ Lombok ຂອງອິນໂດເນເຊຍ
ທ່ານ Natalegawa ເວົ້າວ່າ ທາງເຈົ້າໜ້າທີ່ Timor Leste ແມ່ນເຂົ້າໃຈດີວ່າການທີ່
ຈະມາເປັນສະມາຊິກປະເທດທີ່ 11 ຂອງ ASEAN ນັ້ນເປັນຂັ້ນຕອນທີ່ຍາວນານແລະ
ຈະບໍ່ເສັດສິ້ນໃນປີນີ້.
ໃນອີກດ້ານນຶ່ງ ລັດຖະມົນຕີຕ່າງປະເທດອາຊ່ຽນ ໄດ້ຮ້ອງຂໍໃຫ້ຍົກເລີກການລົງໂທດ
ຂອງນາໆຊາດຕໍ່ມຽນມາຫຼັງຈາກທີ່ມຽນມາໄດ້ຈັດການເລືອກຕັ້ງຄັ້ງທໍາອິດໃນຮອບ 20
ປີ ຂຶ້ນແລະໄດ້ປ່ອຍຕົວທ່ານນາງອອງ ຊານ ຊູຈີ ຜູ້ນໍາຝ່າຍສະໜັບສະໜຸນປະຊາທິ
ປະໄຕໃນມຽນມາ. ແຕ່ຫຼາຍໆປະເທດໄດ້ປະນາມການເລືອກຕັ້ງດັ່ງກ່າວວ່າເປັນການ
ຫລອກລວງ.
