ສິງກະໂປ ໄດ້ຮຽກຮ້ອງໃຫ້ບັນດາຜູ້ນຳຂົງເຂດ ທີ່ເຕົ້າໂຮມກັນໃນວັນພຸດມື້ນີ້ ຢູ່ ກອງປະຊຸມສຸດຍອດອາຊຽນ ໃຫ້ມີຄວາມສາມັກຄີກັນແລະເຕືອນກ່ຽວກັບໄພຂົ່ມ ຂູ່ຕໍ່ການຮ່ວມມືຫຼາຍຝ່າຍ ແລະມາດຕະຖານຂອງສາກົນ.
ນາຍົກສິງກະໂປ ທ່ານລີ ຊຽນ ລຸງ ກ່າວຢູ່ໃນພິທີເປີດກອງປະຊຸມສຸດຍອດ ຄັ້ງທີ 33 ຂອງປະເທດສະມາຊິກ ສະມາຄົມບັນດາປະຊາຊາດ ໃນເຊດເອເຊຍອາ ຄະເນ ຫລື ອາຊຽນ ASEAN ແລະກອງປະຊຸມອື່ນໆວ່າ “ສິດເສລີພາບທີ່ມີຢູ່ ໃນປັດຈຸບັນ ຢ່າງເປີດກວ້າງ ແລະ ລະບົບທີ່ມີກົດໝາຍເປັນຫຼັກແບບຫຼາຍຝ່າຍ ທີ່ໄດ້ໃຫ້ການສະໜັບສະໜູນຕໍ່ການເຕີບໂຕຂອງອາຊຽນ ແລະສະຖຽນລະພາບ ແມ່ນພວມໄດ້ຮັບການກົດດັນ.”
ທ່ານໄດ້ເຕືອນວ່າ “ຍັງບໍ່ເປັນທີ່ຈະແຈ້ງວ່າ ໂລກຈະຮັບເອົາກົດລະບຽບໃໝ່ຫລື
ມາດຕະຖານການພົວພັນ ຂອງສາກົນ ຫຼືວ່າລະບຽບຫຼັການຂອງ ສາກົນຈະຖືກທັບມ້າງໃຫ້ກາຍເປັນກຸ່ມແຂ່ງຂັນຫຼືບໍ່.”
ທ່ານລີໄດ້ຮຽກຮ້ອງໃຫ້ສະມາຊິກສິບປະເທດຂອງອາຊຽນສືບຕໍ່ສາມັກຄີກັນແລະກ່າວວ່າ ບັນຫາທ້າທາຍຕ່າງໆເຊັ່ນວ່າ ຄວາມບໍ່ແນ່ນອນທາງດ້ານການຄ້າ ແລະ ການລົບກວນທາງດ້ານເທັກໂນໂລຈີ ການຮ່ວມມືຫຼາຍປະເທດ ບັດນີ້ “ເປັນເລື່ອງຮີບຮ້ອນ ແບບທີ່ບໍ່ມີມາກ່ອນ.”
ອາຊຽນກຳລັງປະເຊີນໜ້າກັບຄວາມກົດດັນຈາກພາຍນອກ ຮວມທັງການແຂ່ງຂັນເພີ້ມຂຶ້ນ ລະຫວ່າງສະຫະລັດ ແລະຈີນ ຢູ່ໃນຂົງເຂດ. ບັນດາຊະມາຊິກມີຄວາມເປັນຫ່ວງກ່ຽວກັບຄວາມເຄັ່ງຕຶງທາງດ້ານການຄ້າລະຫວ່າງວໍຊິງຕັນແລະ ປັກກິ່ງ ທີ່ອາດຈະກະຕຸ້ນ ໃຫ້ມີການເອົາມາດຕະການປົກປ້ອງສິນຄ້າຂອງຕົນ ໂດຍບັນດາປະເທດຕ່າງໆ.
ນະໂຍບາຍຕ່າງປະເທດ “ອາເມຣິກາກ່ອນອື່ນໝົດ” ຂອງປະທານາທິບໍດີດໍໂນລ ທຣຳ ແລະການຫລີກລ່ຽງໂຄງຮ່າງຫຼາຍຝ່າຍ ຂອງທ່ານທຣຳ ຍັງເຮັດໃຫ້ມີຄວາມກັງວົນ ສຳລັບຂົງເຂດທີ່ກາງຕໍ່ອາໄສການຄ້າເສລີໃນທົ່ວໂລກ.
ທ່ານນາງແຄຕເທີຣິນ ເຊັງ ຈາກມະຫາວິທະຍາໄລແຫ່ງຊາດ ຂອງສະຖາບັນ ເອເຊຍຕາເວັນອອກຂອງສິງກະໂປ ກ່າວວ່າ ທ່ານທຣຳເຮັດໃຫ້ເກີດ “ຄວາມເປັນຫ່ວງໃຫຍ່ ຖ້າຫາກມີການຍົກເລີກ ການແນຈຸດໃສ່ຄວາມເປັນສູນກາງຂອງ ອາຊຽນ.”
ຄວາມຄິດກ່ຽວກັບຄວາມເປັນສູນກາງຂອງອາຊຽນ ແມ່ນໝາຍເຖິງບົດບາດຂອງ ອາຊຽນ ຢູ່ໃນໂຄງຮ່າງການຮັກສາຄວາມປອດໄພຂອງຂົງເຂດ ແລະອຳນາດທີ່ຫ້າວຫັນ ຮວມຢູ່ນຳອຳນາດພາຍນອກ ທີ່ມີຜົນປະໂຫຍຢູ່ໃນຂົງເຂດນັ້ນ.
