ບັນດາຜູ້ນໍາ 10 ປະເທດສະມາຊິກຂອງສະມາຄົມປະເທດໃນເຂດເອເຊຍຕາເວັນອອກສຽງໃຕ້ຫຼືກຸ່ມອາຊ່ຽນພາກັນເຕົ້າໂຮມກັນທີ່ກຸງພະນົມເປັນ ເພື່ອປະຊຸມກັນເປັນເວລາ 2 ມື້ທີ່ຄາດວ່າຈະຮັບມືກັບບັນຫາຂັດແຍ່ງກັນເລື້ອງຊາຍແດນທາງທະເລ ແລະການທີ່ເກົາຫຼີເໜືອຈະຍິງລູກຈະຫຼວດຂຶ້ນສູ່ອະວະກາດຕາມທີ່ໄດ້ກໍານົດໄວ້ນັ້ນ.
ນາຍົກລັດຖະມົນຕີຮຸນແຊນຊຶ່ງເປັນປະທານວຽນເປັນເຈົ້າພາບຈັດກອງ ປະຊຸມສຸດຍອດຂຶ້ນນີ້ໄດ້ເພ່ງເລັງໃສ່ເລື້ອງເສດຖະກິດໃນຖ້ອຍຖະແຫຼງເປີດກອງປະຊຸມໃນວັນອັງຄານມື້ນີ້ ໂດຍຮຽກຮ້ອງໃຫ້ພວກປະເທດທີ່ເຂົ້າຮ່ວມໃນກອງປະຊຸມດໍາເນີນງານເພື່ອເຮັດໃຫ້ຄວາມແຕກໂຕນກັນລະຫວ່າງພວກປະເທດທີ່ຮັ່ງມີທີ່ສຸດແລະທຸກຍາກທີ່ສຸດໃນພາກພື້ນໃຫ້ແຄບເຂົ້າ.
ທ່ານຮຸນແຊນກ່າວວ່າ ພາຍໃນພາກພື້ນ ເຖິງແມ່ນຊ່ອງຫວ່າງໃນການພັດທະນາ ໃນບັນດາປະເທດສະມາຊິກຂອງກຸ່ມອາຊ່ຽນໄດ້ແຄບເຂົ້າທີ່ສັງເກດເຫັນໄດ້ກໍຕາມ ແຕ່ຊອ່ງຫວ່າງດັ່ງກ່າວ ແມ່ນຍັງກວ້າງໃຫຍ່ຢູ່ ແລະນີ້ເປັນສິ່ງຈໍາເປັນທີ່ພວກເຮົາຕ້ອງທໍາຄວາມພະຍາຍາມຂຶ້ນເປັນສອງເທົ່າໂຕເພື່ອສົ່ງເສີມການເຕີບໂຕທາງດ້ານເສດຖະກິດຂຶ້ນອີກໃນຂັ້ນຕໍ່ໄປ ແລະປັບປຸງການແຈກຢາຍຜົນຂອງການເຕີບໂຕທີ່ຍຸຕິທໍາໃຫ້ດີຂຶ້ນທັງພາຍໃນຊາດແລະໃນພາກພື້ນສຳຫຼັບບັນດາພວກປະເທດສະມາຊິກນໍາກັນນັ້ນ.
ລາຍການປະຊຸມຢ່າງເປັນທາງການແມ່ນເນ້ນເຖິງການໂອ້ລົມສົນທະນາກັນເລື້ອງເປົ້າໝາຍຂອງກຸ່ມອາຊ່ຽນໃນການພັດທະນາຕະຫຼາດດຽວຂຶ້ນ ແບບດຽວກັນກັບຂອງສະຫະພາບຢູໂຣບພາຍໃນອີກ 3 ປີຂ້າງໜ້ານີ້. ແຕ່ພວກທີ່ມາຮ່ວມໃນກອງປະຊຸມຫຼາຍທ່ານໄດ້ຮັບຮູ້ວ່າ ພວກຜູ້ນໍາທັງຫຼາຍຈະບໍ່ສາມາດຫຼີກລ້ຽງການໂອ້ລົມສົນທະນາກັນໄດ້ໃນເລື້ອງຄວາມໝັ້ນຄົງທີ່ຮີບດ່ວນໃນພາກພື້ນນັ້ນ.