ບັນດາຜູ້ນໍາປະເທດຂົງເຂດເອເຊຍຕາເວັນອອກສຽງໃຕ້ ໄດ້ຮັບຮອງເອົາຄວາມພະຍາຍາມ
ຂອງມຽນມາ ທີ່ຈະເປັນປະທານຂອງກຸ່ມອາຊຽນໃນປີ 2014 ນັ້ນ.
ລັດຖະມົນຕີການຕ່າງປະເທດອິນໂດເນເຊຍ ທ່ານ Marty Natalegawa ກ່າວຕໍ່ບັນດາ
ນັກຂ່າວວ່າ ພວກຫົວໜ້າລັດຖະບານປະເທດໃນກຸ່ມ ໄດ້ຕົກລົງເຫັນດີຕໍ່ຄໍາຮ້ອງຂໍຂອງ
ມຽນມາໃນວັນພະຫັດມື້ນີ້ ຊຶ່ງເປັນມື້ທໍາອິດຂອງກອງປະຊຸມສຸດຍອດປະຈໍາປີ ທີ່ເກາະບາ
ຫລີນັ້ນ.
ບັນດາກຸ່ມປົກປ້ອງສິດທິມະນຸດແລະພວກລັດຖະບານຕ່າງປະເທດຈໍານວນນຶ່ງ ໄດ້ຄັດຄ້ານ
ຕໍ່ຄວາມພະຍາຍາມດັ່ງກ່າວຂອງມຽນມາ ໂດຍໂຕ້ແຍ່ງວ່າ ກ່ອນອື່ນມຽນມາຈະຕ້ອງດໍາເນີນ
ການຫລາຍຂຶ້ນ ເພື່ອອໍານວຍໃຫ້ມີເສລີພາບແບບປະຊາທິປະໄຕນັ້ນ. ແຕ່ພວກລັດຖະມົນຕີ
ຕ່າງປະເທດຂອງກຸ່ມອາຊຽນ ໄດ້ແນະນໍາໃຫ້ຕົກລົງຮັບເອົາຄໍາຮ້ອງຂໍເປັນປະທານຂອງມຽນ
ມາ ໃນຕົ້ນສັບປະດານີ້ ໂດຍກ່າວວ່າ ມັນຈະຊ່ອຍຊຸກຍູ້ການປະຕິຮູບໃນມຽນມານັ້ນ.
ມີການຄາດຄະເນເຊ່ນກັນວ່າ ກອງປະຊຸມພວກ 10 ປະເທດສະມາຊິກອາຊຽນ ຈະເວົ້າກັນ
ເລື້ອງຄວາມປອດໄພແລະເສດຖະກິດນໍາ. ໃນທ້າຍສັບປະດານີ້ ພວກຜູ້ນໍາຂອງ 8 ປະເທດ
ມະຫາອໍານາດໃນພາກພື້ນ ຈະໄປສົມທົບກັບພວກຜູ້ນໍາອາຊຽນໃນກອງປະຊຸມສຸດຍອດ
ເອເຊຍຕາເວັນອອກ ຊຶ່ງຮວມທັງປະທານາທິບໍດີ ບາຣັກ ໂອບາມາ ແຫ່ງສະຫະລັດ ທີ່ໃນວັນ
ພຸດວານນີ້ ໄດ້ປະກາດແຜນການທີ່ຈະສົ່ງທະຫານມາຣິນຂອງສະຫະລັດ ຈໍານວນຫລາຍເຖິງ
2500 ຄົນໄປປະຈໍາການຢູ່ໃນອອສເຕຣເລຍນັ້ນ.
