ບັນດາປະເທດໃນກຸ່ມອາຊຽນກ່າວວ່າ ເຂົາເຈົ້າມີຄວາມຕັ້ງໃຈຢ່າງແນ່ວແນ່ທີ່ຈະເຮັດໃຫ້ສໍາເລັດ ການເຈລະຈາວ່າດ້ວຍຫລັກເກນການປະພຶດປະຕິບັດກ່ຽວກັບທະເລຈີນໃຕ້ ນັ້ນ ເພື່ອໃຫ້ເສັດສິ້ນຂັ້ນຕອນທີ່ໄດ້ເລີ້ມຕົ້ນກັບຈີນເມື່ອເກືອບ 10 ປີກ່ອນນີ້.
ໃນຖະແຫລງການຢ່າງເປັນທາງການສະບັບນຶ່ງຫລັງຈາກເສັດສິ້ນກອງປະຊຸມສຸດຍອດຂອງເຂົາເຈົ້າໃນທ້າຍສັບປະດາຜ່ານມາທີ່ກຸງຈາກາຕ້າ ບັນດາຜູ້ນໍາກຸ່ມອາຊຽນກ່າວເນ້ນເຖິງຄວາມຈໍາເປັນໃນການບັນລຸຂໍ້ຕົກລົງກັນກ່ຽວກັບເລື້ອງນີ້ ຊຶ່ງຈະອໍານວຍໃຫ້ມີການພັດທະນາຢ່າງສັນຕິແຫລ່ງຊັບພະຍາກອນຕ່າງໆໃນໝູ່ເກາະ Spratlys ທີ່ອາດຈະອຸດົມສົມບູນໄປດ້ວຍບໍ່ນໍ້າມັນແລະແກສທໍາມະຊາດນັ້ນ.
ພວກຜູ້ນໍາເຫລົ່ານີ້ໃຫ້ຂໍ້ສັງເກດວ່າ ປີນີ້ເປັນຂີດໝາຍຄົບຮອບ 20 ປີຂອງຄວາມສໍາພັນລະຫວ່າງຈີນແລະກຸ່ມອາຊຽນ ແລະປີໜ້າຈະເປັນຂີດໝາຍຄົບຮອບ 10 ປີ ນັບແຕ່ພວກປະເທດເຫລົ່ານີ້ໄດ້ລົງນາມໃນຄໍາປະກາດສະບັບນຶ່ງ ໃຫ້ຄໍາໝັ້ນສັນຍາທີ່ຈະປະຕິບັດຕາມຫລັກການປະພຶດສໍາລັບເຂດທະເລດັ່ງກ່າວ.
ພວກຜູ້ນໍາເຫລົ່ານີ້ກ່າວວ່າ ເຂົາເຈົ້າຕັ້ງໃຈທີ່ຈະສວາຍໃຊ້ສອງໂອກາດຄົບຮອບດັ່ງກ່າວ ເພື່ອເຮັດໃຫ້ສໍາເລັດເສັດສິ້ນ ຫລັກຊີ້ນໍາທີ່ໄດ້ຊັກຊ້າມາເປັນເວລາດົນນານ ກ່ຽວກັບການຈັດຕັ້ງປະຕິບັດຫລັກເກນປະພຶດດັ່ງກ່າວນັ້ນ.
ຈີນແລະ 4 ປະເທດສະມາຊິກຂອງກຸ່ມອາຊຽນ ຄື: ຫວຽດນາມ ມາເລເຊຍ ຟີລິບປິນແລະບຣູໄນ ຕະຫລອດທັງໄຕ້ຫວັນ ຕ່າງກໍໄດ້ອ້າງເອົາກໍາມະສິດໃນໝູ່ເກາະດັ່ງກ່າວທັງໝົດ ຫລືເປັນບາງສ່ວນ.
