ກອງປະຊຸມລັດຖະມົນຕີການຕ່າງປະເທດ ອາຊຽນ ໃນລາວ ຖືກຈັດຂຶ້ນທ່າມກາງສິ່ງທ້າຍທີ່ພາກພື້ນກຳລັງປະເຊີນ

ກອງປະຊຸມລັດຖະມົນຕີການຕ່າງປະເທດຂອງ ອາຊຽນ ໄດ້ໄຂຂຶ້ນໃນຕອນ ເຊົ້າວັນທີ່ 8 ມື້ນີ້ຢູ່ທີ່ຫໍປະຊຸມ ແຫ່ງຊາດ, ນະຄອນຫຼວງ ວຽງຈັນ. ທ່ານ ສະເຫຼີມໄຊ ກົມມະສິດ ລັດຖະມົນຕີການຕ່າງປະເທດ ລາວ ໄດ້ເປັນປະທານ ແລະ ຜູ້ນຳໜ້າເປີດກອງປະຊຸມດັ່ງກ່າວ ພາຍໃຕ້ຫົວຂໍ້ “ເພີ່ມທະວີການເຊື່ອມ ຈອດ ແລະ ຄວາມເຂັ້ມແຂງຂອງ ອາຊຽນ.”

ກອງປະຊຸມໄດ້ເລີ່ມຕົ້ນດ້ວຍການຈັບມືຕາມທຳນຽມຂອງສະມາຄົມອາຊຽນ ໂດຍມີທ່ານ ຄາວ ກິມ ຮວນ ເລຂາທິການໃຫຍ່ສະມາຄົມອາຊຽນ, ລັດຖະມົນ ຕີກະຊວງການຕ່າງປະເທດ ຕີມໍ ເລັສເຕ ໃນຖານະຜູ້ສັງ ເກດການ, ລັດຖະ ມົນຕີການຕ່າງປະເທດຂອງບັນດາສະມາຊິກ ອາຊຽນ ແລະ ຄະນະຜູ້ແທນ ອື່ນໆເຂົ້າຮ່ວມ.

ໃນຄຳປາໄສເປີດກອງປະຊຸມນັ້ນ,​ ທ່ານ ສະເຫຼີມໄຊ ກົມມະສິດ ໄດ້ກ່າວຢໍ້າ ເຖິງສິ່ງທ້າທາຍທີ່ພາກພື້ນ ເອເຊຍຕາເວັນອອກສຽງໃຕ້ກຳລັງປະເຊີນ.

ທ່ານ ສະເຫຼີມໄຊ ກົມມະສິດ ກ່າວ “ກອງປະຊຸມຂອງພວກເຮົາຖືກຈັດຂຶ້ນເວລາ ທີ່ພາກພື້ນ ແລະ ໂລກ ຂອງພວກເຮົາ ສືບຕໍ່ປະເຊີນກັບການປ່ຽນແປງຢ່າງ ວ່ອງໄວ ຂອງພູສາດການເມືອງ ແລະ ພູມສາດ ເສດຖະກິດທີ່ສະແດງໃຫ້ເຫັນ ເຖິງທັງໂອກາດ ແລະ ສິ່ງທ້າທາຍ. ຄວາມພະຍາຍາມຮ່ວມກັນຂອງ ອາຊຽນ ແມ່ນມີຄວາມຈຳເປັນເພື່ອຕອບສະໜອງຢ່າງຫ້າວຫັນ ແລະ ມີປະສິດທິພາບ ຕໍ່ສິ່ງທ້າທາຍດັ່ງກ່າວນີ້ ດ້ວຍວິໄສທັດເພື່ອຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ສັນຕິພາບຂອງໂລກ. ພ້ອມກັບຮັກສາຄວາມສຳຄັນ ແລະ ຈຸດເພັ່ງເລັງສູນກາງຂອງ ອາຊຽນ ດັ່ງກັບກຳລັງຜັກດັນຫຼັກ ແລະ ພັດທະນາໂຄງສ້າງຂອງພາກພື້ນ.”

ກອງປະຊຸມລັດຖະມົນຕີອາຊຽນໄດ້ປຶກສາຫາລື ແລະ ພິຈາລະນາຫຼາຍບັນຫາ ໄດ້ແກ່ການສະໝັກເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມື ໃນເອເຊຍຕາເວັນອອກສຽງໃຕ້ ຫຼື TAC, ເຊິ່ງກອງປະຊຸມກໍໄດ້ເຫັນດີຕໍ່ການ ສະໝັກເຂົ້າເປັນພາຄີຂອງ TAC ໂດນປະເທດ ຮັງກາຣີ, ແລະ ປະເມີນການ ສະໝັກເຂົ້າເປັນພາຄີໂດຍກອງເລຂາອາຊຽນຂອງປະເທດ ໂປແລນ, ໂຣເມເນຍ ແລະ ອູຣູກວາຍ.

ນອກຈາກນັ້ນກອງປະຊຸມຍັງໄດ້ປຶກສາຫາລື ກ່ຽວກັບ ການພົວພັນລະຫວ່າງ ອາຊຽນ ແລະ ຄູ່ຮ່ວມມືພາຍນອກ, ເຊິ່ງກອງປະຊຸມໄດ້ຢໍ້າຄືນຄວາມສຳຄັນ ໃນການຮັດແໜ້ນການຮ່ວມມື ແລະ ຄວາມເປັນແກນກາງຂອງອາຊຽນ ໃນໂຄງ ສ້າງການຮ່ວມມືພາກພື້ນທີ່ພວມຜັນແປໄປ.

ກອງປະຊຸມດັ່ງກ່າວໄດ້ຮັບຮອງເອົາເອກະສານສາມສະບັບ ເພື່ອສືບຕໍ່ໃຫ້ຜູ້ນຳ ອາຊຽນພິຈາລະນາເອົາໃນກອງປະຊຸມສຸດຍອດອາຊຽນຄັ້ງທີ 44 ແລະ 45 ຄື: 1. ຖະແຫຼງການຜູ້ນໍາອາຊຽນ ກ່ຽວກັບ ການສ້າງບັນດາແຜນຍຸດທະສາດ ເພື່ອ ຈັດຕັ້ງປະຕິບັດວິໄທປະຊາຄົມອາຊຽນ 2024, 2 ຖະແຫຼງການຜູ້ນຳອາຊຽນວ່າ ດ້ວຍ ແນວຄວາມຄິດອາຊຽນ ກ່ຽວກັບ ອິນໂດ-ປາຊີຟິກ ໃສໂຄງສ້າງພາກພື້ນ ທີ່ມີອາຊຽນເປັນແກນກາງ ແລະ ມີຄວາມພ້ອມສຳລັບອະນາຄົດ ແລະ 3. ເອກະສານທົບທວນ ແລະ ຄຳຕົກລົງຂອງຜູ້ນຳອາຊຽນ ກ່ຽວກັບ ການຈັດຕັ້ງ ປະຕິບັດ 5 ຂໍ້ຕົກລົງຂອງຜູ້ນຳອາຊຽນ.