ລັດຖະມົນຕີອາຊ່ຽນ ຕົກລົງທີ່ຈະດຳເນີນ ການພັດທະນາປັບປຸງ
ຄຸນນະພາບການສຶກສາ ໃຫ້ໄດ້ມາດຕະຖານດຽວກັນ ໃຫ້ໄວທີ່ສຸດ
ທັງຍັງຈະຮ່ວມກັນຮ່າງວິໄສທັດ ການພັດທະນາການສຶກສາ
2016-2020 ອີກດ້ວຍ.
ທ່ານພັນຄຳ ວິພາວັນ ຮອງນາຍົກລັດຖະມົນຕີ ແລະລັດຖະມົນຕີກະຊວງສຶກສາທິການແລະກິລາ ໄດ້ໃຫ້ການຢືນຢັນໃນຖານະປະທານກອງປະຊຸມລະດັບລັດຖະມົນຕີດ້ານການສຶກສາ ຂອງກຸ່ມອາຊ່ຽນຄັ້ງທີ 8 ຢູ່ນະຄອນຫລວງວຽງຈັນ ເມື່ອບໍ່ນານມານີ້ວ່າ ການພັດທະນາເພື່ອຍົກລະດັບຄຸນນະພາບການສຶກສາ ໃນກຸ່ມອາຊ່ຽນໃຫ້ໄດ້ມາດຕະຖານດຽວກັນ ຖືເປັນເປົ້າໝາຍສຳຄັນທີ່ສຸດ ທີ່ກອງປະຊຸມຯ ຄັ້ງນີ້ໄດ້ຕົກລົງ ແລະໄດ້ວາງເປົ້າໝາຍຮ່ວມກັນຢ່າງຄັກແນ່.
ທັງນີ້ໂດຍກອງປະຊຸມຯ ໄດ້ຮັບຮອງເອົາຂອບວຸດທິການສຶກສາອາຊ່ຽນເພື່ອເປັນຄູ່ມືອ້າງອິງໃຫ້ແກ່ປະເທດສະມາຊິກໄດ້ນຳໃຊ້ບົນພື້ນຖານຄວາມສະມັກໃຈຂອງແຕ່ລະປະເທດ ໂດຍພ້ອມກັນນີ້ ກອງປະຊຸມຯ ກໍຍັງໄດ້ຮ່ວມກັນປະກອບຄວາມຄິດເຫັນເຂົ້າໃນການຮ່າງວິໄສທັດ ແລະແຜນການພັດທະນາການສຶກສາອາຊ່ຽນ ໃນລະຍະຈາກປີ 2016-2020 ເພື່ອນຳໄປຈັດຕັ້ງປະຕິບັດແທນແຜນການປັດຈຸບັນ ທີ່ຈະສຸດສິ້ນແຜນການລົງໃນປີ 2015 ອີກດ້ວຍ ດັ່ງທີ່ທ່ານພັນຄຳ ໄດ້ຖະແຫລງຊີ້ແຈງວ່າ:
“ໃນກອງປະຊຸມລັດຖະມົນຕີສຶກສາອາຊ່ຽນຄັ້ງທີ 8 ນີ້ ພວກເຮົາໄດ້ທົບທວນຄືນກຳນົດວິໄສທັດທິດທາງແຜນການ ແລະການຈັດວຽກບຸລິມະສິດ ຂອງການພັດທະນາການສຶກສາ ໃນກອບອາຊ່ຽນ ພາຍຫຼັງປີ 2015 ໂດຍສະເພາະແມ່ນແຜນພັດທະນາການສຶກສາ ໃນລະຍະ 2016-2020 ແນໃສ່ເພື່ອຫລຸດຜ່ອນຊ່ອງວ່າງລະຫວ່າງບັນດາປະເທດສະມາຊິກອາຊ່ຽນດ້ວຍກັນ.”
ໂດຍກ່ອນໜ້ານີ້ ກະຊວງສຶກສາຯຂອງລາວ ໄດ້ລົງນາມໃນຂໍ້
ຕົກລົງການພັດທະນາເພື່ອຍົກລະດັບຄຸນນະພາບດ້ານວຸດທິ
ການສຶກສາໃນລາວຮ່ວມກັນກັບອົງການ UNESCO ໂດຍມີ
ເປົ້າໝາຍທີ່ຈະດຳເນີນການພັດທະນາວຸດທິການສຶກສາໃນລະ
ດັບມະຫາວິທະຍາໄລຂອງລາວ ໃຫ້ໄດ້ມາດຕະຖານດຽວກັນກັບ
ປະເທດສະມາຊິກເກົ່າຂອງອາຊ່ຽນ ຊຶ່ງຈະເຮັດໃຫ້ນັກສຶກສາ
ລາວສາມາດທຽບໂອນໜ່ວຍກິດ ເພື່ອເດີນທາງໄປສຶກສາຕໍ່ໃນ
ທຸກປະເທດໃນອາຊ່ຽນດ້ວຍກັນໄດ້ ເຊັ່ນດຽວກັນກັບນັກສຶກສາ
ຈາກທຸກປະເທດໃນອາຊ່ຽນກໍສາມາດເດີນທາງມາສຶກສາຕໍ່ຢູ່ມະຫາວິທະຍາໄລໃນລາວໄດ້ດ້ວຍເຊັ່ນກັນ.
ແຕ່ຢ່າງໃດກໍຕາມ ທ່ານພັນຄຳ ກໍຍອມຮັບວ່າ ໄດ້ມີການປອມແປງໃບປະກາດສະນີຍະບັດການຈົບການສຶກສາໃນລະດັບຕ່າງໆ ເກີດຂຶ້ນຢູ່ໃນລາວແລ້ວໃນປັດຈຸບັນນີ້ ໂດຍໄດ້ກວດພົບ ປະກາດສະນີຍະບັດປອມຈົບຊັ້ນມັດທະຍົມປາຍຈຳນວນ 176 ໃບ ແລະຈົບບາງຄະນະໃນມະຫາວິທະຍາໄລຂອງລັດຖະບານ ແລະເອກະຊົນຈຳນວນໜຶ່ງ.
ຍິ່ງໄປກວ່ານັ້ນ ກໍຍັງກວດພົບວ່າມີພະນັກງານລັດຈຳນວນໜຶ່ງ ທີ່ນຳໃຊ້ໃບປະກາດສະນີຍະບັດປອມ ຊຶ່ງຕໍ່ກໍລະນີດັ່ງກ່າວນີ້ ກໍໄດ້ມີການດຳເນີນມາດຕະການເອົາຜິດຕາມລະບຽບກົດໝາຍຕໍ່ພະນັກງານລັດເຫຼົ່ານັ້ນແລ້ວ ສ່ວນບັນດາຜູ້ຈັດທຳ ແລະນັກຮຽນ ນັກສຶກສາ ທີ່ໃຊ້ໃບປະກາດສະນີຍະບັດປອມນັ້ນ ກໍຈະຖືກດຳເນີນຄະດີຕາມ ກົດໝາຍເຊັ່ນດຽວກັນ.
ສ່ວນກ່ຽວກັບມາດຕະການແກ້ໄຂບັນຫາ ການປອມແປງ ໃບປະກາດສະນີຍະບັດ ໃນ
ລະຍະຕໍ່ໄປນີ້ ທ່ານພັນຄຳ ໄດ້ໃຫ້ການ ຊີ້ແຈງວ່າ ທາງກະຊວງຯ ໄດ້ອອກຄຳສັ່ງແນະນຳ
ໃຫ້ທຸກອົງການຈັດຕັ້ງ ທັງພາກລັດ ແລະເອກະຊົນ ເປັນເຈົ້າການ ຕິດຕາມ ແລະກວດກາ
ເອກະສານ ທີ່ຢັ້ງຢືນວຸດທິການສຶກສາ ຂອງຜູ້ທີ່ຢູ່ໃນການຄຸ້ມຄອງຂອງອົງການຕົນ ນັບ ທັງຜູ້ທີ່ສະໝັກເຂົ້າເຮັດວຽກໃໝ່ດ້ວຍ ໂດຍຖ້າຫາກກວດພົບວ່າ ມີການນຳໃຊ້ ໃບປະກາດ ສະນີຍະບັດປອມ ກໍໃຫ້ດຳເນີນການຕາມກົດໝາຍໃນທັນທີ.
ນອກຈາກນີ້ ກະຊວງສຶກສາທິການຯ ກໍຍັງຈະດຳເນີນການ ປັບປຸງຄືນໃໝ່ລະບົບ ການ
ຕິດຕາມ ການເຂົ້າຮຽນ ຜົນການຮຽນ ແລະການເຄື່ອນຍ້າຍຂອງນັກຮຽນ ນັກສຶກສາ
ນັບແຕ່ມື້ທຳອິດ ຂອງການຮຽນຈົນເຖິງມື້ຈົບການສຶກສາ ທັງໃນສະຖາບັນການສຶກສາ
ຂອງລັດ ແລະເອກະຊົນທົ່ວປະເທດອີກດ້ວຍ.
