ນາຍົກລັດຖະມົນຕີຍີ່ປຸ່ນແລະຈີນ ໄດ້ພົບປະຫາລືກັນ
ຢູ່ນອກກອງປະຊຸມສຸດຍອດອາຊ່ຽນ ທີ່ຫວຽດນາມ
ໃນວັນເສົາວານນີ້ ໃນຄວາມພະຍາຍາມເພື່ອຫາທາງ
ຫລົດຜ່ອນຄວາມເຄັ່ງຕຶງ ລະຫວ່າງສອງປະເທດອໍາ
ນາດໃນຂົງເຂດ.
ທ່ານ Naoto Kan ນາຍົກລັດຖະມົນຕີຍີ່ປຸ່ນ ແລະ
ຄູ່ຕໍາແໜ່ງຈາກປະເທດຈີນ ທ່ານ ເຫວິນ ເຈ້ຍບາວໄດ້
ມີກໍານົດຈະພົບປະກັນເມື່ອວັນສຸກຜ່ານມາ ແຕ່ການ
ພົບປະກັນໄດ້ຖືກລົບລ້າງ ຫລັງຈາກປັກກິ່ງກ່າວຫາ
ໂຕກຽວວ່າ “ທໍາລາຍບັນຍາກາດ ສໍາລັບການເຈລະຈາ
ກັນ”.
ຍີ່ປຸ່ນແລະຈີນໄດ້ພົວພັນນໍາການຂັດແຍ້ງທີ່ຂົມຂື່ນ
ລະຫວ່າງກັນ ກ່ຽວກັບໝູ່ເກາະ Senkaku ຫລືທີ່ຈີນເອີ້ນວ່າໝູ່ເກາະ Diaoyu ທີ່ທັງຝ່າຍ
ຕ່າງກໍອ້າງເອົາກໍາມະສິດ.
ລັດຖະມົນຕີຕ່າງປະເທດສະຫະລັດ ທ່ານນາງຮິລແລຣີ ຄລິນຕັນ ທີ່ໄດ້ ໄປເຂົ້າຮ່ວມກອງ
ປະຊຸມສຸດຍອດກັບອາຊ່ຽນທີ່ກຸງຮາໂນຍ ໄດ້ສະເໜີທີ່ຈະອໍານວຍໃຫ້ຄວາມສະດວກໃນການ
ເຈລະຈາລະຫວ່າງຈີນແລະ ຍີ່ປຸ່ນນັ້ນ ໂດຍກ່າວວ່າ ສະຫະລັດບໍ່ມີທ່າທີໃດໆຕໍ່ອະທິປະໄຕ
ຂອງໝູ່ເກາະດັ່ງກ່າວ.
ນອກນີ້ແລ້ວ ທ່ານນາງຄລິນຕັນ ໄດ້ສະແດງຄວາມຍິນດີນໍາການລົງ ນາມຂອງຫວຽດນາມ
ໃນສົນທິສັນຍາຕໍ່ຕ້ານການທໍລະມານ ຂອງອົງການສະຫະປະຊາຊາດ ຊຶ່ງທ່ານນາງກ່າວວ່າ
ມັນເປັນຜົນໂດຍກົງຂອງການໂອ້ລົມສົນທະນາກັບສະຫະລັດ ກ່ຽວກັບສິດທິມະນຸດນັ້ນ.
ຕໍ່ມາໃນຕອນບ່າຍວັນເສົາວານນີ້ ທ່ານນາງຄລິນຕັນໄດ້ບິນອອກຈາກ ຮ່າໂນຍ ໄປກໍາປູເຈຍ
ບ່ອນຈຸດແວ່ແຫ່ງຕໍ່ໄປຂອງການຢ້ຽມຢາມຂົງ ເຂດເອເຊຍ-ປາຊິຟິກ ເປັນເວລາ 13 ວັນຄັ້ງ
ນີ້ແລະ ທ່ານນາງໄດ້ ຢຸດແວ່ທີ່ເກາະໄຫໜັນທາງພາກໃຕ້ຂອງຈີນ ເປັນເວລາສັ້ນໆ ເພື່ອພົບ
ປະກັບ ທ່ານ Dai Bingguo ທີ່ປຶກສາຄະນະລັດຖະບານຈີນ ເພື່ອເນັ້ນຢໍ້າທ່າທີຂອງສະ
ຫະລັດກ່ຽວກັບກໍລະນີພິພາດເລື້ອງດິນແດນ ລະຫວ່າງຈີນກັບຍີ່ປຸ່ນນັ້ນ.
