ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ອາຊ່ຽນສໍາມະນາເຝິກແອບ ຮັບມືກັບໂຣກລະບາດ ຮ້າຍແຮງ


ພະນັກງານ​ດ້ານ​ສາທາລະນະ​ສຸກ​ຈາກ 10 ກ່ວາປະ​ເທດ ໄປເຕົ້າໂຮມກັນ​ ​ຢູ່​ທີ່​ກໍາປູເຈຍ ​ໃນ​ສັບປະດານີ້(ທີ 15-21 ສິງຫາ)​​ ເພື່ອ​ຫລິ້ນ​ເກມເຝິກ​ແອບ​ອັນນຶ່ງ ​ທີ່ພວກ​ເຂົາ​ເຈົ້າ​ຫວັງ​ວ່າ ​ຈະ​ຊ່ອຍເຮັດ​ໃຫ້​ຂົງ​ເຂດ​ເອ​ເຊຍ​ຕາ​ເວັນອອກສຽງ​ໃຕ້​ ສາມາດ​ຮັບ​ມື​ໄດ້​ດີ​ຂຶ້ນ​ກັບ​ໂຣຄາພະຍາດ ທີ່​ແພ່​ລະບາດ​ໄປທົ່ວຢ່າງຕໍ່ເນື່ອງ​ນັ້ນ.

ໃນ​ເກ​ມເຝິກແອບທີ່​ວ່າ​ນີ້ ​ເປົ້າ​ໝາຍ​ແມ່ນ​ເພື່ອຄວບ​ຄຸມ​ການແພ່ລະບາດ​ຢ່າງຮ້າຍແຮງໄປທົ່ວ ຢ່າງຕໍ່ເນື່ອງຂອງ​ໂຣກຕິດ​ແປດ ຢູ່ໃນ​ຂົງ​ເຂດທີ່ສົມມຸດເອົາ ທີ່ໃຫ້ຊື່ວ່າ​ຂົງ​ເຂດ​ Pandemica ທີ່​ປະກອບ​ດ້ວຍ 6 ປະ​ເທດ​.

ພວກ​ທີ່​ມາ​ຮ່ວມ​ການ​ເຝິກ​ແອບ ຄື​ພວກ​ພະນັກງານ​ສາທາລະນະ​ສຸກ​ຈາກ​ກຸ່ມປະ​ເທດ​ອາຊ່ຽນ ສະຫະ​ປະຊາ​ຊາດ ສະຫະພາບ​ຢູ​ໂຣບ ສະຫະລັດ​ແລະ​ປະ​ເທດ​ອື່ນໆອີກ ແມ່ນ​ເອົາຈິງເອົາຈັງ ທີ່ສຸດ ກັບ​ການ​ເຝິກ​ແອບ​ຄັ້ງນີ້​.

ໃນ​ເວລາເລີ່ມຕົ້ນການ​ເຝິກ​ແອບ ​ທີ່ມີກໍານົດ 5 ມື້​ໃນ​ສັບປະດາ​ນີ້ ຢູ່ນະຄອນຫລວງພະນົມ ​ເປັນນັ້ນ ທ່ານ​ສຸຣິນ ພິດ​ສຸວັນ ​ເລຂາທິການໃຫຍ່​ຂອງອາ​ຊ່ຽນ ກ່າວ​ວ່າ ພວກ​ທີ່​ມາ​ຮ່ວມ​ການເຝິກແອບ ຈະ​ໄດ້ຮຽນຮູ້​ວິທີການ​ປະຕິບັດທີ່​ດີ​ທີ່ສຸດ​ຈາກ​ກັນແລະກັນ ​ແລະ​ທ່ານກ່າວ​ຕໍ່ ໄປ​ວ່າ ​ທີ່​ສໍາຄັນ​ເຊ່ນ​ກັນນັ້ນ​ ກໍ​ແມ່ນ​ວ່າ ​ເຂົາ​ເຈົ້າ​ຈະ​ໄດ້ຮູ້ຈັກຄຸ້ນເຄີຍກັບຄູ່​ຮ່ວມ​ງານຈາກປະ​ເທດ​ອື່ນໆ​ ຊຶ່ງ​ທ່ານ​ສຸຣິນ ພິດ​ສຸວັນ ​ກ່າວ​ຊີ້​ແຈງ​ດັ່ງ​ນີ້:

“ຂ້າພະເຈົ້າຄິດວ່າ ຖ້າມີເຄືອຂ່າຍທີ່​ໃກ້ຊິດ​ກັນ​ຫລາຍຂື້ນ ບໍ່ແມ່ນແຕ່ພະນັກງານ ສາທາລະນະສຸກເທົ່ານັ້ນ ແຕ່ໝົດທຸກພາກສ່ວນນໍາ ໃນຄວາມກຽມພ້ອມລະດັບ ຊາດ ສຳລັບຮັບ​ມື​ກັບຄວາມຫາຍະນະແບບນັ້ນ ມັນ​ກໍຈະສົ່ງຜົນ ທີ່ປະຕິບັດ​ໄດ້​ດີທີ່ສຸດ. ນັ້ນກໍຄືວ່າ ພວກເຂົາເຈົ້າຮູ້ຈັກກັນ ຮູ້ຈັກ​ເບີ​ໂທລະສັບ ແລະທີ່ຢູ່ຂອງກັນ ແລະກັນ ແລະພວກເຂົາເຈົ້າກໍຈະສືບຕໍ່ແຈ້ງຂ່າວໃຫ້ກັນແລະກັນຊາບວ່າ ກໍາລັງ​ເກີດສະຖານະການ​ແບບໃດຂື້ນ ໃນປະ​ເທດຂອງພວກເຂົາເຈົ້າ ເພື່ອວ່າ​ຈະ​ມີ​ການ​ເອົາ​ບາດກ້າວຮ່ວມກັນຢ່າງໄວ ໃນຖານະເປັນອົງການນຶ່ງດຽວກັນນັ້ນ​.”

ທ່ານ​ສຸຣິນກ່າວ​ວ່າ ສິ່ງ​ທ້າ​ທາຍ​ຕ່າງໆ ​ເຊ່ນ ການແພ່ລະບາດໄປທົ່ວຢ່າງຕໍ່ເນື່ອງຂອງ​ໂຣກ ຕິດ​ແປດ ວິກິດການ​ດ້ານ​ການ​ເງິນ ​ແລະ​ການ​ປ່ຽນ​ແປງ​ຂອງ​ດິນ​ຟ້າ​ອາກາດນັ້ນ ແມ່ນເປັນ​ບັນຫາໃຫຍ່​ໂພດ​ ສໍາລັບປະ​ເທດ​ໃດ​ນຶ່ງ​ ທີ່ຈະຮັບມືໄດ້ຕາມ​ລໍາພັງ​ ​ແລະ​ຕ້ອງການການ​ຕອບ​ ໂຕ້​ຈາກ​ຂົງ​ເຂດ ​ຫລື​ແມ່ນ​ແຕ່​ຈາກ​ໂລກ​ທັງ​ໝົດ​ ຮ່ວມກັນ.

ທ່ານ​ສຸຣິນກ່າວ​ຕື່ມ​ວ່າ ພາຍ​ໃນ​ປະ​ເທດ​ຕ່າງໆ​ນັ້ນ ການ​ຕໍ່ສູ້ກັບ​ໂຣກລະບາດ​ດັ່ງກ່າວ ​ແມ່ນ ​ຕ້ອງ​ການ​ການ​ຮັບ​ມື​ຂອງ​ສັງຄົມ​ທັງ​ປວງ ​ນອກ​ເໜືອ​ໄປ​ຈາກ​ພາກສ່ວນ​ສາທາລະນະ​ສຸກ ຊຶ່ງ ຮວມທັງ​ພາກສ່ວນສະໜອງອາ ຫານ​ການ​ກິນ ສາທາລະ​ນຸປະ​ໂພ​ກ ຄວາມ​ປອດ​ໄພຂອງ ປະຊາຊົນ​ແລະ​ການ​ຂົນສົ່ງ​ມວນ​ຊົນ​ນໍາ ​ແລະ​ທ່ານ​ສຸຣິນ​ເຕືອນ​ວ່າ ຄວາມ​ລົ້ມ​ແຫລວ​ໃນ​ການ ຕອບ​ໂຕ້​ຢ່າງຖືກຕ້ອງ​ເໝາະ​ສົມ ​ສາມາດ​ນໍາພາ​ໃຫ້​ເກີດ​ຄວາມ​ເສຍ​ຫາຍ ຫລື​ການພັງລົງ​ ທາງ​ດ້ານ​ສັງຄົມ​ແລະ​ເສດຖະກິດ​ຢ່າງ​ຮ້າຍ​ແຮງ​ໄດ້ ຊຶ່ງ​ທ່ານ​ຊີ້ແຈງຕື່ມວ່າ:

“ຖ້າຫາກພວກເຮົາຂາດຄວາມລະມັດລະວັງແລ້ວ ແນ່ນອນວ່າ ມັນກໍຈະບ່ອນ​ທໍາ ລາຍການເຕີບໂຕທາງເສດຖະກິດຂອງພວກເຮົາເອງ ແລະຄວາມສາມາດກັບຄືນ ສູ່ສະພາບເດີມຂອງພວກເຮົາໃນສ່ວນພູມິພາກນັ້ນໄດ້. ມັນເປັນເລຶ່ອງທໍາມະຊາດ ທີ່ວ່າປະຊາ​ຊາດທັງໝົດເຫລົ່ານີ້ ຄວນຈະປຸ້ມລຸມກັນ ແລະຮັບປະກັນວ່າ ແຕ່ລະ ປະເທດຈະບໍ່ຖືກກະທົບ ຢ່າງຮ້າຍແຮງກ່ວາ​ອີກ​ປະ​ເທດ​ນຶ່ງ ແລະບໍ່ມີປະ​ເທດໃດ ຢາກຈະເປັນຕົວເຊຶ່ອມໂຍງທີ່ອ່ອນແອ ໃນວົງ​ໂສ້ປ້ອງກັນດັ່ງກ່າວນີ້​.”

ທ່ານ​ສຸຣິນກ່າວ​ວ່າ ​ໂລກເຮົາ​ໄດ້ລອດ​ພົ້ນ​ຈາກ​ການລະບາດ​ຂອງ​ໂຣກ SARS ​ໃນ​ປີ 2003 ​ມາໄດ້ ໂດຍບໍ່ໄດ້ຮັບຜົນກະທົບຮ້າຍແຮງປານໃດ. ​ໃນປີນັ້ນ ໄດ້ມີ​ເຊື້ອ​ໄວຣັສໃໝ່​ໂຜ່ໂຕຂຶ້ນມາ​ ​ໃນ​ພາກ​ໃຕ້​ຂອງ​ຈີນ ​ແລະ​ໄດ້​ແພ່​ລາມ​ໄປ​ທົ່ວ​ໂລກ​ຢ່າງ​ໄວ. ປະຊາຊົນ​ຫລາຍ​ພັນ​ຄົນ​ໄດ້​ເຂົ້າໂຮງໝໍ​ ຍ້ອນປອດ​ອັກ​ເສບ​ຫລື​ປອດ​ບວມ ​ແລະ​ຫລາຍ​ກວ່າ 800 ຄົນ​ໄດ້​ເສຍຊີວິດ​ ກ່ອນ​ຈະ​ຄວບ​ຄຸມ​ໂຣກນີ້ໄດ້ ໂດຍການເອົາ​ມາດ​ຕະການ​ກັກ​ໂຕ​ຜູ້​ປ່ວຍ​ຢ່າງເຂັ້ມ​ງວດ ຢູ່​ໃນ​ຫລາຍ​ປະ​ເທດ​.

ທ່ານ​ສຸຣິນ ກ່າວ​ວ່າ ຜົນ​ຂອງ​ການ​ເຝິກ​ແອບ​ໃນສັບປະດານີ້ ກໍຄວນ​ຈະ​ແມ່ນຂົງ​ເຂດ​ນຶ່ງ ທີ່ ​ສາມາດ​ຮັບ​ມື​ກັບສະຖານະ​ການ​ແພ່ລະບາດຂອງ​ໂຣກຕິດ​ແປດ​ຄັ້ງ​ຮ້າຍ​ແຮງ​ທີ່​ສຸດ ​ທີ່​ອາດ​ ເກີດ​ຂຶ້ນ​ໄດ້ນັ້ນ ໂດຍໃຫ້ມີ​ຄວາມ​ເສຍຫາຍ​ນ້ອຍທີ່ສຸດ ​ແລະ​ຊ່ອຍ​ໃຫ້​ປະເທດອື່ນໆໃນໂລກ ໄດ້ຖອດຖອນບົດຮຽນ​ທີ່​ຖືກຕ້ອງເຊ່ນ​ກັນ.

XS
SM
MD
LG