ລິ້ງ ສຳຫລັບເຂົ້າຫາ

ສະຫະລັດຊ່ອຍເຫຼືອ ເຂດລຸ່ມແມ່ນໍ້າຂອງ

  • ໄພສານ ວໍຣະຈັກ

ສະຫະລັດ ກ່າວວ່າ ໃນປີນີ້ ຕົນຈະໃຊ້ຈ່າຍເງິນ 187 ລ້ານ ໂດລາ ເພື່ອຊຸກຍູ້ ໂຄງການ ສາທາລະນະສຸກ ການສຶກສາ ແລະສະພາບແວດລ້ອມ ໃນເຂດລຸ່ມ ແມ່ນໍ້າຂອງ.

ກະຊວງການຕ່າງປະເທດ ສະຫະລັດ ກ່າວວ່າ ໂຄງການເຫຼົ່ານີ້ ໄດ້ມີການຕົກລົງກັນ ໃນມື້ວັນພະຫັດ ຜ່ານມາ ໃນການພົບປະ ທີ່ນະຄອນຫຼວງ ຮ່າໂນ່ຍ ລະຫວ່າງ ລັດຖະມົນຕີ ການຕ່າງປະເທດ ສະຫະລັດ ທ່ານນາງ HILLARY CLINTON ແລະຄູ່ຕຳແໜ່ງ ຂອງທ່ານນາງ ຈາກ ກຳປູເຈຍ ສປປ ລາວ ໄທ ແລະ ຫວຽດນາມ.

ເງິນກ້ອນໃຫຍ່ທີ່ສຸດ ຄື 147 ລ້ານໂດລາ ຈະຖືກນຳໄປໃຊ້ ສຳລັບໂຄງການ ສາທາລະນະສຸກ ຮວມທັງ ການດຳເນີນ ຄວາມພະຍາຍາມ ເພື່ອຫຼຸດຜ່ອນ ການແຜ່ລະບາດ ຂອງໄຂ້ຍຸງ ຫຼືໄຂ້ປ່າມາເລເຣຍ ແລະເຊື້ອ HIV ແລະໂຣກເອດສ໌.

ອີກ 22 ລ້ານໂດລາ ຈະຖືກນຳໄປໃຊ້ ໃນດ້ານສະພາບແວດລ້ອ ມຮວມທັງ ໂຄງການໃໝ່ ເພື່ອຊ່ອຍຂົງເຂດດັ່ງກ່າວ ກະກຽມຮັບມື ກັບຜົນກະທົບ ຈາກການປ່ຽນແປງ ຂອງດິນຟ້າອາກາດ.

ນອກນັ້ນ ກະຊວງການຕ່າງປະເທດ ສະຫະລັດ ຍັງໄດ້ປະກາດວ່າ ອີກ 18 ລ້ານໂດລາ ຈະຖືກນຳໄປໃຊ້ ສຳລັບໂຄງການ ການສຶກສາ ຮວມທັງ ການສົນທະນາຫາລື ກ່ຽວກັບວ່າ ຈະນຳເອົາ ລະບົບອິນເຕີແນັດ ໄປສູ່ເຂດຊົນນະບົດ ທີ່ສອກຫຼີກຫ່າງໄກ ໄດ້ແນວໃດ.

ສະຫະລັດ ແລະ 4 ປະເທດພາຄີ ປະກອບເປັນ ສະມາຊິກ ຂອງກຸ່ມລິເລີ້ມ ລຸ່ມແມ່ນໍ້າ ຂອງ. ກຸ່ມດັ່ງກ່າວ ໄດ້ປະຊຸມກັນ ເປັນເທື່ອທຳອິດ ໃນປີກາຍນີ້.

XS
SM
MD
LG