ການຊອກຄົ້ນຫາພວກທີ່ຫາຍສາບສູນ ຍັງດໍາເນີນຕໍ່ໄປ ໃນວັນສຸກມື້ນີ້ ໃນມະຫາ
ສະມຸດອີນເດຍ ຫລັງຈາກເຮືອບັນທຸກອົບພະຍົບທີ່ແອອັດໄປດ້ວຍຜູ້ຄົນລຳນຶ່ງໄດ້
ຫລົ້ມຢູ່ນອກຝັ່ງຂອງເກາະຄຣິສມາສທີ່ສອກຫຼີກຫ່າງໄກຂອງອອສເຕຣເລຍ.
ເຮືອລໍາດັ່ງກ່າວ ຊຶ່ງໄດ້ບັນຈຸພວກພະຍາຍາມຊອກຫາບ່ອນລີ້ໄພປະມານ 200 ຄົນ
ໄດ້ຫລົ້ມໃນວັນພະຫັດວານນີ້ ແລະນາຍົກລັດຖະມົນຕີອອສເຕເລຍ ທ່ານ ນາງ
Julia Gillard ໄດ້ກ່າວຕໍ່ພວກນັກຂ່າວ ບໍ່ດົນຫລັງຈາກການເກີດເຫດວ່າ ໄດ້ມີການ
ສູນເສຍຊີວິດ ຢ່າງຫລວງຫຼາຍ.
ເຈົ້າໜ້າທີ່ຮັກສາຄວາມປອດໄພໃນການເດີນເຮືອທາງທະເລ ກ່າວໃນວັນສຸກນີ້ວ່າ
ຢ່າງໜ້ອຍ 109 ຄົນໄດ້ຖືກຊ່ວຍຊີວິດໄວ້ໄດ້. ເຂົາເຈົ້າຖືກນໍາໄປໄວ້ທີ່ສູນຄຸມຂັງ
ທີ່ເກາະຄຣິສມາສ. ລັດຖະມົນຕີກະຊວງພາຍໃນຂອງອອສເຕຣເລຍທ່ານ Jason
Clare ກ່າວວ່າ ມີໂອກາດຢູ່ທີ່ພວກຫາຍສາບສູນຈໍານວນ 90 ຄົນນັ້ນ ຍັງມີຊີວິດຢູ່.
ອອສເຕເລຍ ເປັນປາຍທາງທີ່ສຳຄັນ ສຳຫຼັບພວກທີ່ຫຼົບໜີຈາກຄວາມທຸກຍາກລໍາບາກ
ຈາກປະເທດທີ່ປະສົບໄພສົງຄາມ ເຊ່ນວ່າ ອັຟການິສຖານ ອີຣັກ ແລະສຣີລັງກາ. ສ່ວນ
ໃຫຍ່ຂອງພວກອົບພະຍົບເຫຼົ່ານີ້ພາກັນແອອັດຢູ່ສູນຄຸມຂັງ ທີ່ເກາະຄຣິສມາສ ແລະຢູ່
ແຜ່ນດີນໃຫ່ຍຂອງອອສເຕເລຍ.
ໃນເດືອນທັນວາປີ 2010 ຜ່ານີ້ ພວກພະຍາຍາມຊອກຫາບ່ອນລີ້ໄພ ປະມານ 50 ຄົນ
ໄດ້ເສຍຊີວິດ ເວລາເຮືອໄມ້ທີ່ຮົ່ວຂອງເຂົາເຈົ້າ ໄດ້ແລ່ນເຂົ້າຕຳໜ້າຜາທີ່ ສູງຊັນຂອງ
ເກາະຄຣິສມາສ.