ເມື່ອວັນເສົາວານນີ້ ປະທານາທິບໍດີບາຣັກ ໂອບາມາ ໄດ້ພົບປະກັບພວກທີ່ປຶກສາລະດັບ
ສູງ ດ້ານຄວາມໝັ້ນຄົງແຫ່ງຊາດ ເພື່ອທົບທວນມາດຕະການຕ່າງໆໃນການຮັກສາຄວາມ
ປອດໄພໃຫ້ແກ່ພິທີຂີດໝາຍວັນຄົບ 10 ປີ ຂອງການໂຈມຕີຂອງພວກກໍ່ການຮ້າຍ ເມື່ອ
ວັນທີ 11 ເດືອນກັນຍາ ປີ 2001 ນັ້ນ.
ບໍ່ໄດ້ມີການເປີດເຜີຍລາຍລະອຽດໃຫ້ຊາບ ແຕ່ການພົບປະກັນນີ້ແມ່ນໄດ້ມີຂຶ້ນ ໃນຂະນະ
ທີ່ພວກເຈົ້າໜ້າທີ່ຍັງເອົາມາດຕະການລະວັງໄພຢູ່ໃນລະດັບສູງ ຫລັງຈາກມີຂໍ້ມູນລັບວ່າ
ກຸ່ມອາລຄາອີດາ ອາດໄດ້ສົ່ງຊາຍສາມຄົນມາຍັງສະຫະລັດເພື່ອວາງລະເບີດລົດໂຈມຕີໃນ
ນະຄອນນີວຢ໊ອກແລະວໍຊິງຕັນດີຊີ ໃນໄລຍະທີ່ມີການຈັດພິທີຄົບຮອບ 10 ປີ ດັ່ງກ່າວນັ້ນ.
ໄດ້ມີການວາງຮັກສາຄວາມປອດໄພຢ່າງເຂັ້ມແຂງແລ້ວ ໃນແຫ່ງຕ່າງໆທົ່ວສະຫະລັດ ໃນຂະນະທີ່ວັນຄົບຮອບສິບປີໃກ້ເຂົ້າມາ ແລະພວກເຈົ້າໜ້າທີ່ຕໍາຫລວດກໍໄດ້ເພີ່ມການ ມີໜ້າປະຕິບັດການຂອງພວກເຂົາເຈົ້າ ໃນນີວຢ໊ອກ ແລະວໍຊິງຕັນດີຊີ ຫລັງຈາກໄດ້ຮັບ
ຂ່າວລັບເມື່ອຫລາຍມື້ຜ່ານມາແລ້ວ.
ພວກເຈົ້າໜ້າທີ່ກ່າວວ່າ ໄພຂົ່ມຂູ່ຂອງການໂຈມຕີທີ່ອາດເປັນໄປໄດ້ນັ້ນ ຈະບໍ່ຂັດຂວາງ
ການ ຈັດພິທີຄົບຮອບ ທີ່ກໍານົດໃສ່ວັນອາທິດມື້ນີ້ ຊຶ່ງເປັນວັນຄົບຮອບ 10 ປີພໍດີນັ້ນ.
ນອກນີ້ແລ້ວ ທໍານຽບຂາວຍັງກ່າວວ່າ ການຂົ່ມຂູ່ດັ່ງກ່າວຈະບໍ່ປ່ຽນແປງແຜນການຂອງ
ປະທານາທິບໍດີ ທີ່ຈະໄປຮ່ວມໃນພິທີ ຢູ່ບ່ອນທີ່ຖືກໂຈມຕີ ທີ່ນີວຢ໊ອກ ທໍານຽບຫ້າແຈ
ຫລືຕຶກແພນຕາກອນ ແລະທົ່ງທີ່ເມືອງ Shanksville ລັດເພນຊີລເວເນຍ.
ວັນເສົາວານນີ້ ພວກເຈົ້າໜ້າທີ່ໄດ້ປິດບາງສ່ວນຂອງສະໜາມບິນນານາຊາດ Dulles
International Airport ທີ່ຢູ່ໃກ້ນະຄອນຫລວງວໍຊິງຕັນດີຊີ ເພາະພົບເຫັນວັດຖຸທີ່
ຕ້ອງສົງໃສ ແຕ່ໄດ້ກ່າວໃນເວລາຕໍ່ມາ ວ່າ ບໍ່ພົບເຫັນຫຍັງທີ່ເປັນອັນຕະລາຍ.
