ລິ້ງ ສຳຫລັບເຂົ້າຫາ

ເກົາຫຼີໃຕ້ ສະຫຼອງໄຊຊະນະ ຈະໄດ້ເປັນເຈົ້າພາບ ຈັດງານ ກິລາໂອລິມປິກ

  • ໄພສານ ວໍຣະຈັກ

ຄະນະຜູ້ແທນເກົາຫຼີໃຕ້ ສະແດງຄວາມຊົມເຊີຍ ລຸນຫຼັງທີ່ມີການປະກາດວ່າ ເກົາຫຼີໃຕເປັນຜູ້ຊະນະການປະມູນ ໃນການຈັດການແຂ່ງຂັນກິລາໂອລິມປິກລະດູໜາວ ປີ 2018 (6 ກໍລະກົດ 2011)

ເກົາຫຼີໃຕ້ໄດ້ສະເຫຼີມສະຫຼອງດ້ວຍການຈູດບັ້ງໄຟດອກແລະໂຫ່ຮ້ອງສະແດງຄວາມດີອົກດີໃຈ
ພ້ອມ​ທັງ​ນໍ້າຕາ​ໄຫລ​ກໍ​ມີໃນວັນພຸດວານນີ້ ຫລັງ​ຈາກໄດ້ຮັບໄຊຊະນະໃນການປະມູນເປັນເຈົ້າ ພາບຈັດການແຂ່ງຂັນກິລາໂອລິມປິກລະດູໜາວປີ 2018.

ປະຊາຊົນທີ່ເມືອງຕາກອາກາດ Pyeongchang ໄດ້ສະແດງຄວາມປາບປື້ມຍິນດີເປັນທີ່ສຸດ
ເມື່ອ​ໄດ້​ຍິນຂ່າວວ່າ ເມືອງຂອງເຂົາເຈົ້າໄດ້ຊະນະນະຄອນ Munich ຂອງເຢຍຣະມັນ ແລະ
ເມືອງ Annecy ຂອງຝຣັ່ງ. ເມືອງ Pyeongchang ໄດ້ຮັບ​ຄະ​ແນນສຽງສ່ວນຫຼາຍ ໃນ
ການປ່ອນບັດ ຂອງຄະນະກຳມະການ ກິລາໂອລິມປິກສາກົນ ຊຶ່ງມີຂຶ້ນ ທີ່ເມືອງ Durban
ອາຟຣິກາໃຕ້ໃນຕອນເຊົ້າຂອງວັນພຸດວານນີ້.

ຝູງຊົນໄດ້ໄປເຕົ້າໂຮມກັນຢູ່ບ່ອນແລ່ນສະກີຂອງເມືອງ Pyeongchang ເພື່ອລໍຮັບຟັງການ
ຕັດສິນໃຈຂອງຄະນະກຳມະການກິລາໂອລິມປິກ.

ທີ່ເມືອງ Durban ປະທານາທິບໍດີເກົາຫຼີໃຕ້ ທ່ານ Lee Myung-Bak ກ່າວວ່າຂ່າວດັ່ງ
ກ່າວນີ້ແມ່ນໄຊຊະນະສຳລັບຊາວເກົາຫຼີໃຕ້ທັງມວນ. ທ່ານໄດ້ຈັບມືກັບນາງ Kim Yu-Na
ນັກແລ່ນສະເກັດເຕັ້ນລະ​ບໍາເທິງນໍ້າກ້ອນ ຂອງເກົາຫຼີໃຕ້ ທີ່ຄອງ​ຕໍາ​ແໜ່​ງແຊ້ມໂລກແມ່ຍິງ
ໂອລິມປິກ ທີ່ດີ​ໃຈ​ຈົນນໍ້າຕາຊຶມ. ກ່ອນ​ໜ້າ​ນັ້ນ ໃນມື້ວານນີ້ທ່ານ Lee ໄດ້ກ່າວຄຳປາໄສ
ເປັນພາສາອັງກິດທີ່ບໍ່ຄອຍໄດ້ເຫັນກັນ ເພື່ອຊັກຊວນໃຫ້ສະມາຊິກຂອງຄະນະກຳມະການ
ກິລາໂອລິມປິກສາກົນ ປ່ອນບັດເລືອກເອົາເມືອງ Pyeongchang.

ສ່ວນຫົວໜ້າຄະນະປະມູນຂອງເກົາຫຼີໃຕ້ ທ່ານ Cho Yang-Ho ກ່າວວ່າ ມັນເປັນວັນທີ່
ແສນດີໃຈທີ່ສຸດວັນນຶ່ງຂອງປະເທດຂອງທ່ານ.

ເມືອງ Pyeongchang ໄດ້ຂໍປະມູນຈັດການແຂ່ງຂັນກິລາໂອລິມປິກລະດູໜາວເປັນຄັ້ງທີ
3 ຫຼັງຈາກໄດ້ປລາໄຊຢ່າງຫວຸດຫວິດ ໃນການປະມູນຈັດການແຂ່ງຂັນກິລາໂອລິມປິກລະດູ
ໜາວໃນປີ 2010 ແລະປີ 2014 ໃຫ້ແກ່ນະຄອນ Vancouover ຂອງການາດາແລະ
ເມືອງ Sochi ຂອງຣັດເຊຍ ຕາມລຳດັບ.

XS
SM
MD
LG