ປະທານາທິບໍດີສະຫະລັດ ທ່ານບາຣັກ ໂອບາມາ ກ່າວວ່າ ທ່ານມີຄວາມຈິງຈັງກ່ຽວກັບ
ການໃຊ້ກໍາລັງທະຫານໂຈມຕີອີຣ່ານ ຖ້າຫາກວ່າກຸງເຕຫະຣານສ້າງອາວຸດນີວເຄລຍ.
ຢູ່ໃນບົດສໍາພາດທີ່ເຜີຍແຜ່ໃນວັນສຸກວານນີ້ ປະທານາທິບໍດີ ໄດ້ກ່າວຕໍ່ວາລະສານ At-
lantic ວ່າ “ຊ່ອງທາງທຸກຢ່າງແມ່ນຍັງເປີດກວ້າງ” ກ່ຽວກັບອີຣານ ຊຶ່ງຮວມທັງການທີ່
ຈະ “ໃຊ້ກໍາລັງທະຫານ.”
ການໃຫ້ທັດນະນະດັ່ງກ່າວ ຂອງທ່ານໂອບາມາ ໄດ້ມີຂື້ນໃນຂະນະທີ່ໂລກພວມມີຄວາມ
ວິຕົກກ່ຽວກັບໂຄງການສ້າງນີວເຄລຍຂອງອີຣ່ານ ແລະຄວາມເປັນໄປໄດ້ທີ່ອາດຈະມີ
ການໂຈມຕີຈາກອິສຣາແອລ. ທ່ານກ່າວວ່າ ລັດຖະບານອິສຣາແອລຮັບຮູ້ໃນຖານະທີ່ເປັນ
ປະທານາທິບໍດີຂອງສະຫະລັດ ທ່ານຈະເຮັດແທ້ ໃນສິ່ງທີ່ທ່ານກ່າວອອກໄປນັ້ນ ດັ່ງທີ່
ທ່ານເວົ້າວ່າ “ຂ້າພະເຈົ້າແມ່ນກົງໄປກົງມາ ບໍ່ຂີ້ຕົວະ.”
ໂອກາດທີ່ຈະເກີດສົງຄາມລະຫວ່າງ ອິສຣາແອລກັບອີຣ່ານ ພ້ອມໆກັບຜົນເກີດຜົນສະ
ທ້ອນຕໍ່ຂົງເຂດແລະຕໍ່ໂລກ ແມ່ນຄວາມເປັນຫ່ວງເປັນໃຍທີ່ສຳຄັນຂອງປະທານາທິບໍດີ
ໂອບາມາ. ທ່ານຈະໄດ້ເປັນເຈົ້າພາບ ໃຫ້ການຕ້ອນຮັບນາຍົກລັດຖະມົນຕີອິສຣາແອລ
ທ່ານ Benjamin Netanyahu ທີ່ທໍານຽບຂາວໃນວັນຈັນຈະມານີ້.
ອີຣ່ານຊຶ່ງກ່າວອ້າງວ່າມີຄວາມກະຕືລືລົ້ນກ່ຽວກັບໂຄງການນິວເຄລຍໃນທາງສັນຕິນັ້ນ
ໄດ້ອອກຖະແຫລງການຫລາຍໆຄັ້ງ ທີ່ໃຫ້ຮ່ອງຮອຍວ່າ ຕົນພ້ອມແລ້ວຈະເປີດການ
ເຈລະຈາກັບນາໆຊາດ ແຕ່ວ່າໄດ້ວາງເງື່ອນໄຂຈຳນວນນຶ່ງ ໃນການເຈລະຈາດັ່ງກ່າວ.
ອິສຣາແອລ ແລະມະຫາອໍານາດຕາເວັນຕົກ ໄດ້ກ່າວຫາອີຣ່ານວ່າ ພະຍາຍາມສ້າງອາ
ວຸດນີວເຄລຍ ໂດຍໃຊ້ໂຄງການພະລັງງານນິວເຄລຍພົນລະເຮືອນເປັນເຄື່ອງປິດບັງແຕ່
ເປັນຂໍ້ຫາທີ່ເຕຫະຣານໄດ້ໃຫ້ການປະຕິເສດໄປແລ້ວ.
ທ່ານໂອບາມາກ່າວວ່າ ມັນຈະເປັນທີ່ຮັບເອົາບໍ່ໄດ້ຕໍ່ຫລາຍໆປະເທດຢູ່ໃນຂົງເຂດ ຖ້າ
ຫາກວ່າອີຣ່ານສາມາດມີອາວຸດນີວເຄລຍ ແລະປະເທດເຫຼົ່ານັ້ນບໍ່ມີ. ທ່ານກ່າວຕື່ມອີກ
ວ່າ “ອີຣ່ານຊຶ່ງເປັນທີ່ຮູ້ກັນດີວ່າ ໃຫ້ການສະໜັບສະໜຸນກຸ່ມກໍ່ການຮ້າຍຕ່າງໆ ເພາະ
ສະນັ້ນການຂົ່ມຂູ່ກ່ຽວກັບການແຜ່ຜາຍອາວຸດນິວເຄລຍຈຶ່ງມີຄວາມຮ້າຍແຮງເພີ່ມຂຶ້ນ.”
ທ່ານກ່າວວ່າ “ອັນຕະລາຍ ກ່ຽວກັບການມີອາວຸດນີວເຄລຍຂອງອີຣ່ານ ຊຶ່ງຫຼັງຈາກ
ນັ້ນຈະນຳໄປສູ່ການແຂ່ງຂັນຂອງປະເທດຕ່າງໆເພື່ອໃຫ້ມີອາວຸດດັ່ງກ່າວຢູ່ໃນຕາເວັນ
ອອກກາງນັ້ນເປັນສິ່ງທີ່ຂ້າພະເຈົ້າຄິດວ່າ ມັນເປັນອັນຕະລາຍຮ້າຍແຮງຕໍ່ໂລກ.”
ທ່ານໂອບາມາ ກ່າວຄຳປາໄສຕໍ່ຄະນະກຳມະການປະຊາສຳພັນອາເມຣິກັນອິສຣາແອລ
ທີ່ເອີ້ນຫຍໍ້ວ່າ IAPAC ທີ່ມີອິດທິພົນນັ້ນ ໃນວັນອາທິດນີ້.