ເກົາຫຼີເໝືອໄດ້ຢືນຢັນວ່າ ຜູ້ນໍາຂອງຕົນ ທ່ານ Kim Jong Un ນັ້ນໄດ້ແຕ່ງງານແລ້ວ ຊຶ່ງ
ເຮັດໃຫ້ການສັນນິຖານກັນມາເປັນເວລາຫລາຍອາທິດ ສິ້ນສຸດລົງ ກ່ຽວກັບວ່າແມ່ຍິງຄົນນຶ່ງ
ທີ່ໄດ້ຕິດຕາມເພິ່ນໃນຫລາຍໆງານ ໃນທີ່ສາທາລະນະເມື່ອໄວໆມານີ້ ແມ່ນຜູ້ໃດກັນແທ້.
ສື່ທາງການຂອງເກົາຫຼີເໝືອລາຍງານວ່າ ທ່ານ Kim ແລະສະຫາຍ Ri Sol Ju ໄດ້ໄປ
ທ່ຽວຊົມສວນສະນຸກ ທີ່ຫາກໍສ້າງໃໝ່ແຫ່ງນຶ່ງ ທີ່ກຸງ Pyongyang ໃນວັນພຸດວານນີ້
ຊຶ່ງເປັນຄັ້ງທໍາອິດທີ່ສື່ຂອງເກົາຫຼີເໝືອ ໄດ້ກ່າວເຖິງພັນລະຍາຂອງຜູ້ນໍາແລະກໍແຈ້ງຊື່
ຂອງເພິ່ນນໍາ, ແຕ່ລາຍງານບໍ່ໄດ້ກ່າວເຖິງວ່າ ທັງສອງແຕ່ງງານກັນເມື່ອໃດ ແລະບໍ່ໃຫ້
ລາຍລະອຽດໃດໆອີກ.
ທ່ານ Kim ໄດ້ຂຶ້ນກໍາຕໍາແໜ່ງເປັນຜູ້ນໍາປະເທດທີ່ຢູ່ຢ່າງໂດດດ່ຽວແຫ່ງນັ້ນ ແທນບິດາ ທ່ານ
Kim Jong Il ທີ່ໄດ້ເສຍຊີວິດລົງໃນເດືອນທັນວາຜ່ານມານີ້. ການເປີດຕົວຂອງສະຕີໝາຍເລກ
ນຶ່ງຂອງເກົາຫຼີເໝືອນີ້ ແມ່ນການເຄື່ອນໄຫວຫຼ້າສຸດທີ່ແຍກອອກມາຈາກ ລັກສະນະການນໍາພາ
ແບບລຶກລັບ ເກັບໂຕ ແລະໜ້າຕາເຄ່ງຂຶມຂອງທ່ານ Kim ຜູ້ພໍ່. ສ່ວນທ່ານ Kim Jong Un
ນັ້ນ ແມ່ນໄດ້ກ່າວປາໄສໃນທີ່ສາທາລະນະແລະໂອ້ລົມສົນທະນາແບບເປັນກັນເອງ ກັບບັນດາ
ທະຫານ ແລະປະຊາຊົນຄົນອື່ນໆນໍາອີກ.
ວີດີໂອພາສາເກົາຫລີ: