ຫົວໜ້າກວດການີວເຄລຍສະຫະປະຊາຊາດກ່າວວ່າ ການຢ້ຽມຢາມອີຣ່ານເປັນເວລາ
2 ມື້ ໄດ້ເສັດສິ້ນລົງແລ້ວ ຊຶ່ງທີມນັກກວດກາຂອງທ່ານບໍ່ສາມາດໄປຢ້ຽມຢາມສະຖານ
ທີ່ທາງທະຫານທີ່ສໍາຄັນແຫ່ງນຶ່ງໄດ້ ແລະບໍ່ມີຂໍ້ຕົກລົງໃດໆກັບກຸງເຕຫະຣ່ານກ່ຽວກັບ
ການຢ້ຽມຢາມສະຖານທີ່ດັ່ງກ່າວຕື່ມອີກ.
ທ່ານ Herman Nackaerts ຫົວໜ້າກວດກາຂອງອົງການພະລັງປະລະມະນູສາກົນ
ຫຼື IAEA ໃຫ້ຄວາມເຫັນດັ່ງກ່າວ ໃນວັນພຸດມື້ນີ້ທີ່ກຸງ Vienna ລຸນຫລັງກັບຄືນຈາກ
ອັນທີ່ອົງການ IAEA ເອີ້ນວ່າ ການໂອ້ລົມສົນທະນາທີ່ຜິດຫວັງກັບບັນດາເຈົ້າໜ້າທີ່ອີ
ຣ່ານນັ້ນ.
ທ່ານ Nackaerts ກ່າວວ່າ ບາດກ້າວຕໍ່ໄປຂອງອົງການ IAEA ຈະມີການຕັດສິນໃຈ
ກັນຫລັງຈາກທີມກວດກາຂອງທ່ານລາຍງານຕໍ່ຫົວໜ້າ ອົງການພະລັງປະລະມະນູສາ
ກົນແລະພວກສະມາຊິກສະພາອໍານວຍການ ຊຶ່ງມີໝາຍກໍານົດທີ່ຈະພົບປະກັນໃນຕົ້ນ
ເດືອນໜ້ານີ້.
ໃນຖະແຫລງການສະບັບນຶ່ງໃນເຊົ້າວັນພຸດມື້ນີ້ ພະແນກການດັ່ງກ່າວຂອງສະຫະປະ
ຊາຊາດກ່າວວ່າ ອີຣ່ານໄດ້ປະຕິເສດຕໍ່ຄໍາຂໍຮ້ອງຂອງ ທີມກວດກາເພື່ອຢາກໄປກວດ
ເບິ່ງໂຮງງານໃຫຍ່ Parchin ໃກ້ໆກັບກຸງເຕຫະຣ່ານ ທີ່ມີຄວາມສົງໄສວ່າ ອາດເປັນ
ບ່ອນຜະລິດພະລັງນີວເຄລຍລັບໃຕ້ດິນນັ້ນແລະຖະແຫລງການສະບັບນີ້ກ່າວຕໍ່ໄປວ່າ
ອີຣ່ານໄດ້ປະຕິເສດຕໍ່ຄໍາຂໍຮ້ອງໃນທໍານອງຄ້າຍຄືກັນນີ້ ເວລາທີມນັກກວດກາຂອງອົງ
ການ IAEA ຢ້ຽມຢາມອີຣ່ານ ໃນທ້າຍເດືອນມັງກອນຜ່ານມານີ້.
