ສື່ມວນຊົນແຫ່ງລັດຂອງຈີນສະແດງຄວາມເປັນຫ່ວງ ກ່ຽວກັບແຜນການປ້ອງກັນປະເທດ
ຂອງສະຫະລັດ ທີ່ຫາກໍເປີດເຜີຍໃຫ້ຮູ້ຫວ່າງໄວໆມານີ້ ໂດຍເຕືອນວ່າມັນສາມາດສ້າງ
ຄວາມເສຍຫາຍໃຫ້ແກ່ສາຍພົວພັນລະຫວ່າງສະຫະລັດແລະຈີນໄດ້.
ໜັງສືພິມ Global Times ຂອງພັກຄອມມິວນິດຈີນ ອ້າງຄໍາເວົ້າຂອງນັກຊ່ຽວຊານດ້ານ
ປ້ອງກັນປະເທດຂອງຈີນທ່ານນຶ່ງໃນວັນສຸກວານນີ້ ວ່າແຜນການປ້ອງກັນປະເທດຂອງ
ສະຫະລັດ ທີ່ປະກາດໃຫ້ຮູ້ນຶ່ງມື້ກ່ອນໜ້ານີ້ ແມ່ນແນເປົ້າໝາຍໃສ່ຈີນຢ່າງຈະແຈ້ງ.
ໜັງສືພິມສະບັບນີ້ອ້າງຄໍາເວົ້າຂອງທ່ານ Jin Canrong ນັກວິເຄາະເຫດການປະຈໍາມະຫາ
ວິທະຍາໄລ Renmin ທີ່ກ່າວວ່າ ສະຫະລັດມີຄວາມຮູ້ສຶກຖືກຂົ່ມຂູ່ໂດຍການຂະຫຍັບຂະ
ຫຍາຍທາງທະຫານຢ່າງໄວຂອງຈີນ ຊຶ່ງທ່ານເຕືອນວ່າ ຍຸດທະສາດໃໝ່ຂອງອະເມຣິກາຈະ
ເຮັດໃຫ້ກຸງປັກກິງມີຄວາມຮູ້ສຶກບໍ່ສະບາຍໃຈ ແລະສາມາດສ້າງຜົນກະທົບຕໍ່ສາຍພົວພັນ
ລະຫວ່າງສອງປະເທດໄດ້.
ປະທານາທິບໍດີສະຫະລັດ ທ່ານບາຣັກໂອບາມາ ປະກາດແຜນການປ້ອງກັນປະເທດໃໝ່ນີ້
ໃຫ້ຮູ້ໃນວັນພະຫັດຜ່ານມານີ້ ຊຶ່ງທ່ານກ່າວວ່າ ສະຫະລັດປັບປຸງການມີໜ້າຂອງຕົນໃຫ້ເຂັ້ມ
ແຂງຂຶ້ນໃນພາກພື້ນເອເຊຍປາຊີຟິກ ເຖິງແມ່ນສະຫະລັດຕັດຄ່າໃຊ້ຈ່າຍໃນການປ້ອງກັນ
ປະເທດຂອງຕົນລົງຫລາຍພັນລ້ານກໍຕາມ.
ເບິ່ງວີດີໂອລາຍງານປະທານາທິບໍດີໂອບາມາ ປະກາດແຜນຍຸທະສາດປ້ອງກັນປະເທດໃໝ່:
