ທ່ານ Ryan Crocker ເອກອັກຄະລັດຖະທູດສະຫະລັດປະຈໍາອັຟການີສຖານກ່າວວ່າ
ການທີ່ປາກີສຖານບໍ່ເຂົ້າຮ່ວມກອງປະຊຸມນານາຊາດທີ່ຈະມາເຖິງນີ້ ກ່ຽວກັບອັຟການີສ
ຖານນັ້ນ ຈະເປັນເລື່ອງທີ່ໜ້າເສຍໃຈ ແຕ່ກໍຈະບໍ່ທໍາລາຍຄວາມກ້າວໜ້າຂອງອັຟການິສ
ຖານ ຫລືວ່າ ປ່ຽນແປງຜົນທີ່ຈະອອກມາຂອງກອງປະຊຸມນີ້ແຕ່ຢ່າງໃດ.
ໃນການໃຫ້ສໍາພາດກັບວີໂອເອ ພະແນກພາສາອັຟການີສຖານ ເມື່ອວັນເສົາວານນີ້ ທ່ານ
Crocker ກ່າວວ່າ ມັນຈະເປັນການສູນເສຍໂອກາດ ອັນດີຂອງປາກີສຖານ ຖ້າຫາກປາກີ
ສຖານບໍ່ຍອມເຂົ້າຮ່ວມກອງປະຊຸມ ກ່ຽວກັບອະນາຄົດຂອງອັຟການີສຖານ ທີ່ມີກໍານົດ
ຈະເລິ່ມຂຶ້ນໃນວັນຈັນມື້ອື່ນນີ້ ທີ່ນະຄອນຫລວງບອນ ຂອງປະເທດເຢຍຣະມັນ.
ພວກເຈົ້າໜ້າທີ່ປາກີສຖານໄດ້ກ່າວຊໍ້າແລະຊໍ້າອີກວ່າ ພວກຕົນຈະບໍ່ເຂົ້າຮ່ວມກອງປະຊຸມ
ນານາຊາດທີ່ກຸງບອນນັ້ນ ເພື່ອປະທ້ວງການໂຈມຕີທາງອາກາດຂອງກຸ່ມເນໂຕ້ເມື່ອທ້າຍ
ເດືອນຜ່ານມານີ້ ທີ່ຍັງຜົນໃຫ້ທະຫານປາກີສຖານເສຍຊີວິດ 24 ຄົນ ຢູ່ໃກ້ເຂດຊາຍແດນ
ຕິດກັບອັຟການີສຖານ ນັ້ນ.
ທ່ານນາງ Hillary Clinton ລັດຖະມົນຕີຕ່າງປະເທດສະຫະລັດ ໄດ້ໂທລະສັບຫານາຍົກ
ລັດຖະມົນຕີປາກີສຖານ ທ່ານ Yousuf Raza Gilani ເມື່ອວັນເສົາວານນີ້ ເພື່ອສະແດງ
ຄວາມເສົ້າໂສກເສຍໃຈອີກຄັ້ງ ນຶ່ງຕໍ່ຄອບຄົວຂອງພວກທະຫານປາກີສຖານທີ່ເສຍຊີວິດໄປ
ນັ້ນ ແລະຕໍ່ ປະຊາຊົນປາກີສຖານ. ນອກນີ້ແລ້ວ ຖະແຫລງການສັ້ນໆສະບັບນຶ່ງຂອງ
ກະຊວງຕ່າງປະເທດສະຫະລັດຍັງເນັ້ນຍໍ້າ ເຖິງຄວາມເຄົາລົບນັບຖືຂອງ ສະຫະລັດຕໍ່ອະທິ
ປະໄຕຂອງປາກີສຖານ ແລະຄວາມໝາຍໝັ້ນທີ່ຈະປະຕິ ບັດງານຮ່ວມກັນ ເພື່ອໃຫບັນລຸ
ຈຸດປະສົງທີ່ມີຮ່ວມກັນ ບົນພື້ນຖານແຫ່ງຜົນປະໂຫຍດ ແລະຄວາມເຄົາລົບນັບຖື ຊຶ່ງກັນ
ແລະກັນນັ້ນ.
