ບັນດາເຈົ້າໜ້າທີ່ເມັກຊິໂກກ່າວວ່າ ຢ່າງໜ້ອຍ 40 ຄົນເສຍຊີວິດ ເວລາເກີດຄວາມວຸ້ນວາຍ
ຢູ່ຄຸກແຫ່ງນຶ່ງໃນວັນອາທິດວານນີ້ ໃນພາກເໜືອຂອງເມັກຊິໂກ.
ບັນດາເຈົ້າໜ້າທີ່ກ່າວວ່າ ໄດ້ເກີດການຕໍ່ສູ້ກັນຂຶ້ນໃນເຊົ້າວານນີ້ ລະຫວ່າງພວກນັກໂທດ
ແລະພວກເຈົ້າໜ້າທີ່ຍາມຄຸກໃນຄຸກ Apodoca ຕັ້ງຢູ່ນອກເມືອງ Monterrey ນັ້ນ.
ເຈົ້າໜ້າທີ່ຄົນນຶ່ງກ່າວວ່າ ທາງການສາມາດຄວບຄຸມສະຖານະການໃນຄຸກໄວ້ໄດ້ຄືນ
ໃນເວລາຕໍ່ມາ.
ພວກສະມາຊິກຄອບຄົວຄົນໂທດໄດ້ພາກັນໄປເຕົ້າໂຮມ ຢູ່ນອກຄຸກ ລໍຖ້າຟັງລາຍລະອຽດ
ຕ່າງໆກ່ຽວກັບເຫດການດັ່ງກ່າວແລະສະຖານະພາບຂອງພວກສະມາຊິກຄອບຄົວຂອງ
ຕົນໃນຄຸກນັ້ນ.
ການຕໍ່ສູ້ກັນຢ່າງຮຸນແຮງທີ່ຍັງຜົນເຮັດໃຫ້ມີຜູ້ເສຍຊີວິດນັ້ນ ແມ່ນເກີດຂຶ້ນເປັນບາງຄັ້ງ
ບາງຄາວໃນຄຸກເມັກຊິໂກ ຊຶ່ງລາງເທື່ອເກີດຂຶ້ນເນື່ອງການເປັນປໍລະປັກກັນລະຫວ່າງ
ພວກກຸ່ມຄ້າຢາເສບຕິດທີ່ມີອິດທິພົນນັ້ນ. ໃນເດືອນແລ້ວນີ້ ນັກໂທດ 31 ຄົນເສຍຊີວິດ
ໃນລະຫວ່າງເກີດ ຄວາມວຸ້ນວາຍໃນຄຸກແຫ່ງນຶ່ງ ໃນພາກເໜືອຂອງເມັກຊິໂກເຊ່ນກັນ.
