ລິ້ງ ສຳຫລັບເຂົ້າຫາ

ສຫະລັດວ່າ ການ​ປະຕິ​ຮູບ ​ດ້ານ​ການ​ເມືອງ​ຂອງ​ຈີນ ຍັງລ້າຫຼັງຫຼາຍ

  • ທອງປານ ເທບວົງສາ
  • ວັນນະສອນ​ ແກ້ວດາຣາ

ທ່ານ Michael Posner ລັດຖະມົນຕີ​ຊ່ວຍວ່າການ​ຕ່າງປະ​ເທດ​ສະຫະລັດ ຮັບຜິດຊອບ​ກິດຈະການ​ດ້ານ​ສິດທິ​ມະນຸດ

​ເຈົ້າໜ້າ​ທີ່​ສະຫະລັດ​ກ່າວ​ວ່າ ການ​ປະຕິ​ຮູບ​ດ້ານ​ການ​ເມືອງ​ຂອງ​ຈີນ ຍັງລ້າຫຼັງຫຼາຍ ສົມ​ທຽບ​ໃສ່ຄວາມ​ຈະ​ເຣີນ​ເຕີບ​ໂຕ​ທາງ​ເສດຖະກິດ​ຂອງ​ ປະ​ເທດ​ນັ້ນ.

ບັນດາ​ຜູ້ຕາງໜ້າ​ຈາກ​ສອງ​ປະ​ເທດ ຄື​ສະຫະລັດ ​ແລະ​ຈີນ ​ໄດ້​ພົບ​ປະກັນ ສໍາລັບ​ການ​ໂອ້​ລົມ​ສົນ​ທະນາ​ປະ​ຈໍາປີ ດ້ານ​ສິດທິ​ມະນຸດ​ ໃນ​ຕົ້ນ​ອາທິດ​ນີ້.

ທ່ານ Michael Posner ລັດຖະມົນຕີ​ຊ່ວຍວ່າການ​ຕ່າງປະ​ເທດ​ສະຫະລັດ ຮັບຜິດຊອບ​ກິດຈະການ​ດ້ານ​ສິດທິ​ມະນຸດ ​ທີ່​ເປັນຫົວໜ້າຄະນະ​ຜູ້​ແທນຝ່າຍ​ສະຫະລັດ ບອກ​ບັນດາ​ຜູ້​ສື່​ຂ່າວ​ເມື່ອ​ວັນ​ພຸດ​ວານ​ນີ້​ວ່າ ສະຖາ​ນະການ​ດ້ານ​ສິດທິ​ມະນຸດ​ໂດຍ​ລວມຢູ່​ໃນ​ຈີນ​ໃນ​ປັດຈຸບັນ​ນີ້ ຍັງ​ສືບ​ຕໍ່​ເຊຶ່ອມ ​ໂຊມ​ລົງ​ໄປ​ນັບ​ມື້.

ທ່ານ​ໂພສ​ເນີ ກ່າວ​ວ່າ ຫຼາຍໆ​ຄົນ​ຖືກ​ຈັບ​ກຸມ​ຄຸມ​ຂັງ ຢູ່​ໃນ​ຈີນ ອັນ​ເປັນພາກສ່ວນນຶ່ງ​ຂອງ​ແບບ​ແຜນ​ການ​ຈັບ​ກຸມ​ແລະ​ກັກ​ຂັງຕາມ​ອໍາ​ເພີ​ໃຈ ພວກ​ໃດ​ທີ່​ທ້າ​ທາຍ​ຕໍ່ການ​ປະຕິບັດ​ງານ​ຂອງທາງ​ການ ​ແລະ​ນະ​ໂຍບາຍ​ຕ່າງໆຢູ່​ໃນ​ຈີນ​ນັ້ນ.

ທ່ານ​ໂພສ​ເນີ​ ກ່າວວ່າ ໃນ​ລະຫວ່າງ​ກອງ​ປະຊຸມ​ເມື່ອ​ວັນ​ຈັນ​ແລະ​ວັນ​ອັງຄານ​ຜ່ານ​ມາ​ນີ້ ​ສະຫະລັດ​ໄດ້​ຮຽກຮ້ອງ​ໃຫ້​ຈີນ ປ່ອຍ​ຕົວ​ບັນດາ​ທະນາຍ ຄວາມ​ນັກ​ເຄຶ່ອນ​ໄຫວ ທີ່​ນິຍົມ​ປະຊາທິປະ​ໄຕ​ທັງຫຼາຍ ທີ່​ຖືກ​ຈໍາ​ຄຸກ​ຢູ່​ໃນ ​ເວລາ​ນີ້ ​ຍ້ອນ​ການ​ສະໜັບສະໜຸນ​ທາງ​ກົດ​ໝາຍ​ຂອງ​ພວກ​ເຂົາ​ເຈົ້າ​ ຕໍ່ ບັນດາ​ລູກ​ຄວາມ​ຂອງ​ພວກ​ເຂົາ​ເຈົ້າ ທີ່​ຕໍາ​ໜິຕິຕຽນການ​ປະຕິບັດ​ທີ່​ບໍ່​ຊອບ​ທໍາ​ຂອ​ງລັດຖະບານ​ຈີນ​ນັ້ນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG