ສະມາຊິກສະພາສູງທີ່ສໍາຄັນຄົນນຶ່ງຂອງສະຫະລັດກ່າວວ່າ ສະຫະລັດມີຄວາມພໍໃຈນໍາ
ຄວາມຄືບໜ້າຫວ່າງໝໍ່ໆມານີ້ ໃນການປະຕິຮູບໄປສູ່ປະຊາທິປະໄຕໃນມຽນມານັ້ນ ແຕ່
ກໍກ່າວວ່າ ລັດຖະບານໃໝ່ພົນລະເຮືອນແຕ່ໃນນາມຂອງມຽນມາ ຈະຕ້ອງຮັບປະກັນໃຫ້
ມີຄວາມທ່ຽງທໍາ ແລະເສຣີ ໃນການເລືອກຕັ້ງຮອບພິເສດ ໃນເດືອນເມສາທີ່ຈະມາເຖິງນີ້.
ທ່ານ John McCain ຜູ້ແທນອະວຸໂສໃນຄະນະກໍາມະການວ່າດ້ວຍກອງທັບຂອງສະພາ
ສູງ ໄດ້ກ່າວເຊ່ນນັ້ນໃນວັນອາທິດວານນີ້ ທີ່ນະຄອນຢາງກຸ້ງ ຫລັງຈາກໄດ້ພົບປະກັບປະ
ທານາທິບໍດີ Thien Sein ແລະພົບປະອີກຕ່າງຫາກກັບຜູ້ນໍາຝ່າຍຄ້ານເພື່ອປະຊາທິປະ
ໄຕ ທ່ານນາງ ອອງຊານ ຊູຈີ ຊຶ່ງທ່ານກ່າວວ່າ:
“ພວກເຮົາຮູ້ສຶກມີກໍາລັງໃຈ ນໍາເຫດການຕ່າງໆທີ່ເກີດຂື້ນໃນໝໍ່ໆມານີ້ ແຕ່ພວກເຮົາ
ກໍຮູ້ດີວ່າ ຍັງມີອີກຫລາຍສິ່ງຫລາຍຢ່າງທີ່ຈະຕ້ອງໄດ້ເຮັດອີກຢູ່.”
ເບິ່ງຮູບມຽນມາປ່ອຍນັກໂທດ:
ທ່ານ McCain ກ່າວວ່າ ທ່ານໄດ້ບອກປະທານາທິບໍດີມຽນມາວ່າ ລັດຖະບານມຽນມາ
ຈະຕ້ອງໄດ້ແກ້ໄຂບັນຫາການຂັດແຍ້ງທີ່ມີມານານກັບພວກຊົນເຜົ່ານັ້ນ ແລະສ້າງຄວາມ
ເຂ້ມແຂງໃຫ້ແກ່ການປົກຄອງດ້ວຍໂຕບົດກົດໝາຍ ກ່ອນທີ່ວໍຊິງຕັນຈະພິຈາລະນາຍົກເລິກ
ການລົງໂທດທາງດ້ານເສດທະກິດ ທີ່ໄດ້ປະກາດໃຊ້ຕໍ່ລັດຖະບານທະຫານ ທີ່ໄດ້ກ້າວລົງ
ຈາກອໍານາດ ໃນປີທີ່ຜ່ານມານັ້ນ.
ໃນມື້ວັນເສົາ ຄະນະຜູ້ແທນສະຫະລັດ ຊຶ່ງຮວມທັງສະມາຊິກສະພາສູງ Joseph Lieberman
ນໍານັ້ນ ກໍໄດ້ເພີ້ມຄວາມກົດດັນຕໍ່ຫວຽດນາມເຊ່ນກັນ ໂດຍຮຽກຮ້ອງໃຫ້ຫວຽດນາມປັບປຸງ
ໃຫ້ດີຂື້ນ ປະວັດດ້ານສິດທິມະນຸດຂອງຕົນ ຖ້າຫາກວ່າຮ່າໂນຍຕ້ອງການທີ່ຈະຂະຫຍາຍການ
ຮ່ວມມືທາງດ້ານທະຫານກັບວໍຊິງຕັນ.
