ຈີນກ່າວວ່າ ຕົນຈະໃຈເຢັນແລະອົດທົນໃນການກົດດັນໃຫ້ສະຫະລັດແລະພັນທະມິດຂອງ
ສະຫະລັດ ເຂົ້າຮ່ວມໃນການປຶກສາຫາລືຫົກຝ່າຍເພື່ອລົດຜ່ອນ ຄວາມເຄັ່ງຕຶງໃນແຫຼມ
ເກົາຫຼີລົງນັ້ນ.
ລັດຖະມົນຕີການຕ່າງປະເທດຈີນ ທ່ານ ຢັງ ຈີ້ຈີ ໄດ້ບອກສໍານັກງານຂ່າວຊີນຫົວຂອງ
ທາງການຈີນ ໃນວັນອາທິດວານນີ້ວ່າ ປັກກິ່ງຈະສືບຕໍ່ຜັກດັນໃຫ້ມີການສົນທະນາຫາລື
ສຸກເສີນຂຶ້ນພາຍໃນເດືອນນີ້ ເຖິງແມ່ນວ່າທາງສະຫະລັດ, ເກົາຫຼີໃຕ້ແລະຍີ່ປຸ່ນ
ຈະບໍ່ເຕັມໃຈກໍຕາມ.
ເຈົ້າໜ້າທີ່ຂັ້ນສູງທາງການທູດຂອງ ສະຫະລັດ, ເກົາຫຼີໃຕ້ແລະຍີ່ປຸ່ນ ໄດ້ພົບປະກັນ
ທີ່ກຸງວໍຊິງຕັນ ໃນອາທິດແລ້ວນີ້ ໃນການສະແດງທ່າທີເປັນອັນນຶ່ງອັນດຽວກັນຕໍ່ອັນທີ່
ພວກເຂົາເຈົ້າເອີ້ນວ່າ ເປັນການເກາະຜິດແລະການກະທໍາແບບ ກະຫາຍສົງຄາມຂອງ
ເກົາຫຼີເໜືອ ເມື່ອບໍ່ນານມານີ້.
ທັງສາມຄູ່ພັນທະມິດດັ່ງກ່າວ ເວົ້າວ່າ ຈີນແມ່ນມີບົດບາດສໍາຄັນໃນການດໍາເນີນຄວາມ
ພະຍາຍາມທາງການທູດໃນອານາຄົດ ແຕ່ກໍໄດ້ປະຕິເສດຕໍ່ການເຊື້ອເຊີນຂອງຈີນ
ໃຫ້ໄປຮ່ວມໃນການສົນທະນາຫາລືສຸກເສີນກັບເກົາຫຼີເໜືອນັ້ນ.
ລັດຖະມົນຕີຕ່າງປະເທດຈີນ ທ່ານ ຢັງ ຈີ້ຈີ ກ່າວວ່າຄວາມເຄັ່ງຕຶງຈະຜ່ອນຄາຍລົງ
ກໍຕໍ່ເມື່ອວ່າທຸກໆພັກຝ່າຍ ສະແດງອອກເຖິງຄວາມຈິງໃຈແລະເຮັດວຽກຮ່ວມກັນ.