ຫົວໜ້າສະຖາບັນລາງວັນໂນແບລ ເວົ້າວ່າ 19 ປະເທດໄດ້ປະຕິເສດ ການເຊື້ອເຊີນໃຫ້ໄປຮ່ວມ ພິທີມອບລາງວັນໂນແບລ ຂະແໜງສັນຕິພາບ ຂອງສະຖາບັນ ທີ່ຈະຈັດຂຶ້ນໃນວັນສຸກທີ່ຈະມາເຖິງນີ້ ຊຶ່ງຂັດກັນກັບຄຳເວົ້າຂອງຈີນ ທີ່ກ່າວອ້າງວ່າ ປະເທດສ່ວນໃຫຍ່ໃຫ້ການສະໜັບສະໜຸນຕໍ່ຄຳຮຽກ ຮ້ອງຂອງຕົນ ທີ່ຂໍໃຫ້ຮ່ວມໃຈກັນບອຍຄອ໊ດພິທີມອບ ລາງ ວັນດັ່ງກ່າວ.
ຢູ່ໃນກອງປະຊຸມຖະແຫລງຂ່າວຕາມປົກກະຕິຂອງກະຊວງ ຕ່າງປະເທດຈີນ ໃນວັນອັງຄານວານນີ້ ໂຄສົກປະຈຳກະຊວງ ທ່ານນາງ Jiang Yu ໄດ້ກ່າວປະນາມ ພວກທີ່ໃຫ້ການສະໜັບສະໜູນແກ່ທ່ານ Liu Xiaobo ຜູ້ໄດ້ຮັບລາງວັນໂນແບລນັ້ນວ່າ ເປັນຄື “ຕົວຕະລົກສອງສາມຄົນຫລິ້ນລະ ຄອນນຳກັນ”. ທ່ານນາງເວົ້າວ່າ “ປະຊາຄົມນາໆຊາດສ່ວນໃຫຍ່” ຈະບໍ່ເຂົ້າຮ່ວມພິທີ ແລະກ່າວຕື່ມວ່າ “ມີຫລາຍກວ່າ 100 ປະເທດ” ທີ່ສະໜັບສະໜຸນທ່າທີຫລືຈຸດຢືນຂອງຈີນ.
ແຕ່ສະຖາບັນຮັບຜິດຊອບລາງວັນໂນແບລ ທີ່ນະຄອນຫລວງອອສໂລ ປະເທດ Norway ໄດ້ອອກຖະແຫລງການສະບັບນຶ່ງ ເວົ້າວ່າ ນອກຈາກຈີນແລ້ວ ມີແຕ່ 18 ປະເທດເທົ່ານັ້ນ ທີ່ຈະບໍ່ໄປຕາມການເຊື້ອເຊີນຂອງສະຖາບັນ “ຍ້ອນເຫດຜົນຫລາຍຢ່າງຕ່າງກັນ.” ຫົວໜ້າ ລາງວັນໂນແບລ ທ່ານ Geir Lundestad ບອກກັບອົງການຂ່າວສານຂອງຝຣັ່ງ Agence France Presse ວ່າ ມີ 44 ປະເທດແລ້ວທີ່ໄດ້ຕອບຮັບວ່າ ຈະໄປຮ່ວມ ງານມອບລາງວັນດັ່ງກ່າວນັ້ນ.
ບໍ່ເປັນທີ່ແຈ້ງຂາວເທື່ອວ່າ ມີຈັກປະເທດໄດ້ຮັບບັດເຊີນກັນແທ້.
ເຈົ້າໜ້າທີ່ຮັບຜິດຊອບລາງວັນໂນແບລເວົ້າວ່າ ຈີນໄດ້ທຳການປຸກລະດົມ ຢ່າງບໍ່ເຄີຍມີມາກ່ອນ ເພື່ອບໍ່ຢາກໃຫ້ບັນດາປະເທດຕ່າງໆ ສົ່ງຜູ້ຕາງໜ້າ ຂອງພວກເຂົາເຈົ້າໄປຮ່ວມງານ ທີ່ໃຫ້ກຽດແກ່ ທ່ານ ຫລີວ ຊຽວໂບ, ນັກເຄື່ອນໄຫວ ເພື່ອສິດທິມະນຸດ ທີ່ກຳລັງຮັບໃຊ້ໂທດຈຳຄຸກ 11 ປີ ຍ້ອນໄດ້ສົ່ງເສີມໃຫ້ມີການປະຕິຮູບ ໄປສູ່ປະຊາທິປະໄຕຢ່າງກວ້າງ ຂວາງ ໃນຈີນນັ້ນ.
ສະຖາບັນລາງວັນໂນແບລ ໄດ້ບົ່ງຊື່ພວກປະເທດທີ່ໄດ້ປະຕິເສດການເຊື້ອເຊີນໄປຮ່ວມງານ
ນີ້ວ່າ ມີຄື ຣັດເຊຍ, ກາຊັກສຕັງ, ໂຄລຳເບຍ, ຕູນີເຊຍ, ຊາອູດີ ອາເຣເບຍ, ປາກິສຖານ,
ເຊີເບຍ, ອີຣັກ, ອີຣ່ານ, ຫວຽດນາມ, ອັຟການິສຖານ, ເວເນຊູເອລາ, ຟີລິບປິນ, ອີຈິບ,
ຊູແດນ, ຢູເຄຣນ, ກຸຍບາ ແລະ ໂມຣອກໂກ.
ຈີນໄດ້ຂູ່ວ່າ ຈະມີ “ຜົນສະທ້ອນ” ຕິດຕາມມາ ສຳລັບພວກປະເທດທີ່ຈະໄປຮ່ວມພິທີມອບ ລາງວັນໂນແບລ ໃຫ້ທ່ານ ຫລີວ ຊຽວໂບ ນັ້ນ.
